Марқа 8 - Zhana Osiet

¹ Сол күндері тағы да халық көп жиналып қалды, алайда олардың жейтін тамақтары болмағандықтан, Иса шәкірттерін шақырып алып, былай деді:

² -Мына халыққа жаным ашып тұр, олардың Менімен бірге жүргеніне, міне, үш күн болды, олардың жейтін тамақтары да қалмады.

³ Егер де оларды үйлеріне аш жіберетін болсам, онда олар орта жолда әлсіреп қалады және олардың біразы алыс жерлерден келді, - деді.

⁴ Сонда Исаның шәкірттері: -Осы иен далада оларды тойдыру үшін кім нан тауып бере алады?! - деді Оған.

⁵ Иса олардан: -Қанша нандарың бар? -деп сұрады. Олар: - Жетеу, - деп жауап берді.

⁶ Сонда Иса халыққа жерге жайғасып отыра беруін бұйырды да, жеті нанды алып, ризашылығын білдірген соң, нанды үзіп-үзіп, Өзінің шәкірттеріне берді, олар халыққа таратып берді.

⁷ Сонымен қатар, оларда тағы да біраз балық бар болатын, Иса оған да ризашылығын білдіріп, оны да халыққа таратып беруін бұйырды.

⁸ Бәрі жеп, тойып алды, артылып қалғанын жинап алғанда жеті себет толды.

⁹ Сол жерде, шамамен, төрт мыңға тарта адам болған еді. Сосын Иса халықты таратып жіберді де,

¹⁰ Өз шәкірттерімен бірден қайыққа отырып, Далманута жеріне келді.

¹¹ Исаның алдынан фарисейлер шығып, Онымен дауласа бастады. Оны сынау үшін, Одан көктің көмегімен кереметтер жасауын талап етті.

¹² Иса терең күрсініп, оларға: -Осы ұрпақ неге керемет іздейді? Сендерге шындықты айтайын: бұл ұрпаққа ешқандай да керемет берілмейді, - деді.

¹³ Иса оларды қалдырып, қайтадан қайыққа отырды да, келесі жағаға кетті.

¹⁴ Сол уақытта шәкірттері өздерімен бірге нан алуды ұмытып кеткен болатын, қайықта өздерімен алып шыққан бір ғана нандары болған еді.

¹⁵ Иса оларды сақтандырып: -Фарисейлер мен Иродтың жақтастарының ашытқыларынан сақтанып жүріңдер, абай болыңдар! - деді.

¹⁶ Сонда шәкірттері нан алмаған соң айтқан шығар деп, бір-бірімен айтыса бастады.

¹⁷ Мұны біле қойған Иса: -Нанымыз жоқ деп, немене талқыға салып отырсыңдар? Әлі де түсінбедіңдер ме? Әлде жүректерің тас болып қалған ба? - деді оларға.

¹⁸ Көздерің болса да көрмей, құлақтарың болса да естімей жатырсыңдар ма?

¹⁹ Мен бес нанды бес мың адамға бөліп бергенімде, қалған қалдығынан қанша себет толтырып жинап алғандарың естеріңде жоқ па? -деді. Шәкірттері Оған: -Он екі себет, -деп жауап берді.

²⁰ -Ал жеті нанды төрт мың адамға бөліп бергенімде, оның қалдығынан қанша себет толтырып жинап алып едіңдер? Шәкірттері Оған: - Жетеу, - деп жауап берді.

²¹ -Осыны әлі де түсінбей отырсыңдар ма? -деді Иса оларға.

²² Содан кейін олар Бетсайдаға келгенде, Исаға бір зағип адамды әкеліп, Одан қолын сол адамға тигізуін өтінді.

²³ Иса жаңағы зағип адамның қолынан ұстап, ауылдың шетіне алып шықты да, оның көзіне түкіріп, қолын қойып: - Бірдеңе көріп тұрсың ба? - деп сұрады.

²⁴ Ол жан-жағына қарап: -Ағашқа ұқсаған, қозғалып жүрген адамдарды көріп тұрмын, - деді.

²⁵ Иса оның көзіне қолын қайтадан қойды, сонда ол көре бастады, оның көзі қайтадан қалпына келіп, бәрін анық көретін болды.

²⁶ Иса оны үйіне шығарып салып тұрып: -Ауылға кірмей -ақ қой! - деді оған.

²⁷ Иса сол жерден шығып, Өзінің шәкірттерімен бірге Філіп-Кесариясы деген елді мекенге аттанды. Ол жолда келе жатып, шәкірттерінен: -Адамдар Мені Кім деп жүр? -деп сұрады.

²⁸ Олар Исаға: -Біреулері суға батырып шомылдырушы Жақия десе, кейбіреулері -Ілияс, ал басқалары -пайғамбарлардың біреуі, - деп жүргенін айтты.

²⁹ Иса олардан: -Ал сендер Мені Кім деп жүрсіңдер? -деп сұрады. Сонда Петір: -Сен-Мәсіхсің! -деп жауап берді.

³⁰ Алайда Иса оларға Өзі туралы ешкімге айтпауға тыйым салды.

³¹ Осыдан бастап Иса оларға былай деп үйрете бастады: -Енді Адамның Ұлы көп қасірет шегеді. Ақсақалдар мен бірінші бас қызметкерлер, Таурат заңын зерттеушілер Оны қабылдамай, өлімге кеседі, алайда Ол үш күннен кейін қайта тірілетін болады, - деді.

³² Ол бұл туралы ашық айтты. Алайда Петір Оны бөлек алып шығып, Оған қарсылық білдіре бастады.

³³ Иса шәкірттеріне бұрылды, Оларға қарап тұрып, Петірге: -Менен аулақ кет, сайтан! Өйткені сен Құдайдың емес, адамның қалауын ойлап тұрсың, -деп оған тыйым салды.

³⁴ Осыдан кейін Иса Өз шәкірттерімен бірге халықты да шақырып алып: -Егер де кімде-кім Менің артымнан ергісі келсе, онда ол өзінен бас тартсын және өз айқышын алып, Менің соңымнан еретін болсын, - деді оларға.

³⁵ Себебі кім өз өмірін сақтап қалғысы келсе, ол оны жоғалтады, егер де кім өз өмірін Мен үшін және Ізгі хабар үшін қиятын болса, онда ол оны сақтап қалады.

³⁶ Егер адам бүкіл әлемге ие болып, ал өз өміріне зиян келтірсе, ол одан қандай пайда көреді?

³⁷ Немесе адам өз жанын сатып алу үшін не бере алады?

³⁸ Осы азғын әрі күнәкар ұрпақ Менен және Менің айтқан сөзімнен ұялып, бас тартатын болса, Адам Ұлы Өз Әкесінің атақ -даңқына бөленіп, Өзінің киелі періштелерімен келген сәтте, Ол да одан бас тартатын болады, - деді.