Марқа 7 - Zhana Osiet

¹ Бірде фарисейлермен бірге Иерусалимнен келген бірнеше Таурат заңын зерттеушілер жиналып, Исаның қасына барды.

² Сонда олар Оның шәкірттерінің біразы әдеттегідей қолдарын жумай тамақ жеп отырғанын көріп қалады.

³ Фарисейлер мен яһудейлердің бәрі қолдарын жумай ас ішпейтін, олар өздерінің ата-бабаларының салт-дәстүрін осылай ұстанатын.

⁴ Сондықтан олар сауда-саттық орындарынан келген кезде алдымен жуынбай, ас ішпейтін. Сонымен қатар, олар құмыраларды, кеселерді және мыс ыдыстарды және төсек-орындарын да сумен жуып, тазартып тұратын. Олар осындай ережелерді өте қатты ұстанатын болған соң, Исадан:

⁵ -Сенің шәкірттерің неге ата бабалардың салт-дәстүрімен жүрмейді? Неге қолдарын жумай тамақ жейді? -деп сұрады.

⁶ Сонда Иса оларға: -Ей, екіжүзділер, сендер туралы Ишая пайғамбар дұрыс айтқан, -деді. «Бұл халық Мені тек аузымен ғана құрметтейді, ал олардың жүректері Менен тым алыста,

⁷ өйткені олар өз тәлімдерінде тек адамдардың өсиетіне сүйенеді, ал Мені құр бекер құрметтейді», -деп жазылған Жазбада.

⁸ Сендер Құдайдың өсиетін қалдырып, адамдардың салт-дәстүрін ұстанасыңдар, - деді.

⁹ Иса оларға тағы да былай деді: -Өз салт-дәстүрлеріңді орнату үшін, Құдайдың өсиетінен бас тартуды жақсы білесіңдер.

¹⁰ Мұса: «Өз әке-шешеңді құрметте» және «Кім әке-шешесіне жаман сөз айтатын болса, сол өлім жазасына кесілетін болсын», - деген.

¹¹ Ал сендер: -Егер де адам өз әке-шешесіне: «Сендердің менен көретін игіліктерің менің Құдайға берген құрбандық сыйым болсын», - деп айтса болды,

¹² оның әке-шешесіне жасағысы келетін игі ісін жасатпайсыңдар.

¹³ Сол сияқты осыған ұқсас көп нәрселерді орындап, өз салт-дәстүрлеріңе бола Құдайдың сөзін жоққа шығарып жүрсіңдер, - деді.

¹⁴ Осыдан кейін Иса халықты қайтадан Өзіне шақырып алып: - Бәрің де Мені тыңдап, ұғып алыңдар, - деді.

¹⁵ Сырттан кірген еш нәрсе адамды арамдай алмайды, керісінше, адамды оның ішінен шығатын нәрселер арамдайды, - деді.

¹⁶ Кімнің құлағы бар болса, сол тыңдап алсын. (Көне жазбаларды осы сөздер жоқ).

¹⁷ Иса халықты қалдырып, үйге кірген кезде, шәкірттері Одан осы нақыл сөздің астарының мағынасы жайында сұрады.

¹⁸ Сонда Иса оларға: -Сендер де осыны түсінбедіңдер ме? Сырттан кірген ешбір нәрсе адамды арамдай алмайтынын сендер неге түсінбей тұрсыңдар?

¹⁹ Себебі сол нәрсе адамның жүрегіне бармайды, тек асқазанына барып түседі де, одан кейін сыртқа шығады, сондықтан да барлық ас таза болып саналады.

²⁰ Адамды арамдайтын -оның ішінен шыққан нәрсе, -деді Ол.

²¹ Жаман ойлардың бәрі адамның ішкі дүниесінен, оның жүрегінен шығады, олар: жыныстық азғындық, ұрлық, кісі өлтіру,

²² неке адалдығын бұзу, бақталастық, зұлымдық, қулық, тәртіпсіздік (бейбастақтық), көрсеқызарлық, Құдайға тіл тигізу, тәкаппарлық, санасыздық.

²³ Осындай жаман нәрселердің бәрі адамның ішкі жан дүниесінен шығады, сондықтан адамды тек осылар арамдайды, - деді.

²⁴ Осыдан кейін Иса сол жерден Тир өңіріне аттанды. Сол жаққа келгенде, Ол ешкімнің де Өзі жөнінде білгенін қаламады, бірақ та Ол сол жерде де жасырын болып қала алмады.

²⁵ Бір әйел Ол туралы сол сәтте біліп қойды, оның қызының бойында табиғаты таза емес рух болған, сонда әлгі әйел келіп, Оның аяғына жығылды.

²⁶ Әйел грек ұлтынан әрі сирофиникиялық болатын. Әйел Исадан оның қызының бойындағы жынды қуып шығаруын өтінді.

²⁷ -Ең алдымен, балалар тойып алсын, қоя тұр. Тегінде, балалардың нанын алып, күшіктерге тастаған жақсылық емес, - деді Ол әйелге.

²⁸ -Ием, үстел астындағы күшіктер де сол балалардан түскен қоқымдарды жейді ғой, -деп жауап берді әлгі әйел.

²⁹ Сонда Иса әлгі әйелге: -Осылай жауап бергенің үшін, сен енді бара берсең болады, өйткені сенің қызыңның бойындағы жын шығып кетті, - деді.

³⁰ Жаңағы әйел үйіне қайта оралғанда, қызының төсекте тыныш жатқанын және жынның одан шығып кеткенін байқады.

³¹ Иса Тир өңірінен шығып, қайтадан Сидон аймағы арқылы жүрді, Он қала өлкесінің ортасымен өтіп, Ғалилея көліне келді.

³² Сол жерде Оған саңырау, тілі мүкіс біреуді алып келді де, Исадан оған қол қоюын өтінді.

³³ Иса оны халықтан бөлек алып шығып, саусағын оның құлағына тықты, саусағына түкіріп, тіліне тигізді,

³⁴ көкке қарап күрсінді де: -Эффафа! -деді. (Мағынасы «Ашыл!» дегенді білдіреді)

³⁵ Сонда оның құлағы сол сәтте ашылып, тілі шешіліп, анық сөйлей бастады.

³⁶ Иса оларға осы жөнінде ешкімге айтпауын бұйырды. Алайда Ол қанша тыйым салса да, олар соғұрлым Ол туралы көбірек жариялай берді.

³⁷ Адамдар бұған қатты таңғалып: -Оның істеген істерінің бәрі жақсы: саңыраулар естіп, мылқаулар сөйлеп жатыр, -деді.