Марқа 3 - Zhana Osiet

¹ Осыдан кейін Иса қайтадан синагогаға келді. Сол жерде қолы семіп қалған бір адам бар еді.

² Қаскөй адамдар осы адамды Иса сенбі күні де сауықтырар ма екен деп, Оның сыртынан мұқият бақылады және осы ісі арқылы Оны айыптау үшін сылтау іздеді.

³ Сонда Иса қолы семіп қалған әлгі адамға: -Ортаға кел, -деді де,

⁴ олардан былай деп сұрады: -Әрбір сенбіде қалай істеген дұрыс: жақсылықты ма әлде жамандықты ма? Адам жанын құтқару керек пе әлде құрту керек пе? Алайда олар еш жауап қатпады.

⁵ Иса сонда оларға ашулы көзбен қарап, жүректерінің қатыгездігіне қайғырып, әлгі адамға: -Қолыңды соз! -деді. Ол қолын созғанда, қолы бұрынғы қалпына келді.

⁶ Фарисейлер сол жерден шыққаннан кейін, Иродтың жақтастарымен бірігіп, Исаны тез арада құртпақ болып, шешім қабылдады.

⁷ Иса Өз шәкірттерімен бірге көлге қарай бет алды. Оның соңынан ілескендердің көбі ғалилеялықтар болатын, бұған қоса Яһудеядан

⁸ және Иерусалимнен, Идумеядан, Иорданның арғы бетінен, сонымен қатар, Тир мен Сидонның маңайындағылар да Оның жасаған істері жайлы естіп, көптеп ағылып Исаға келіп жатты.

⁹ Сол жерде халық өте көп болғандықтан және Өзін қалың топ қысып тастамасын деген оймен Ол шәкірттеріне алдын ала айтып, қайық дайындатып қойды.

¹⁰ Сонымен, Иса олардың көбін сауықтырды, әр түрлі дерті барлар Оған қолдарын тигізіп қалу үшін, жанталаса Исаға қарай ұмтылды.

¹¹ Ал таза емес рухтар Исаны көргенде, Оның алдына құлап, айғайлап: - Сен- Құдайдың Ұлысың! - деді Оған.

¹² Бірақ Иса Өзінің Кім екені жайлы ашық айтуға олардың бірталайына тыйым салды.

¹³ Осыдан кейін Ол тауға көтерілді де, Өз қалауымен таңдап алғандарын қасына шақырды. Олар Оның жанына келді.

¹⁴ Сонда олардың он екісін елшілер деп атады және оларды уағыз айтуға жіберіп тұру үшін, әрқашан Өзінің қасында болғанын қалады.

¹⁵ Сонымен қатар, оларға жындарды қуып шығаратын билік берді.

¹⁶ Сөйтіп, он екісін елшілікке дайындап, Шимонға Петір деген ат қойды,

¹⁷ ал Зеведейдің ұлдары Жақып пен оның бауыры Жоханға Боанергеске (арамей тілінде «күркіреген күннің ұлдары») деген ат қойды.

¹⁸ Осылармен бірге Әндір, Філіп, Бартолмай, Матай, Тома, Алфейұлы Жақып, Тадей, Қананит Шимон

¹⁹ және Өзін сатып кеткен Иуда Исқариот та болды.

²⁰ Содан кейін олар үйге келді, алайда халық тағы да сол жерге көп жиналып алды, сондықтан олардың тамақ ішуге де уақыттары болмады.

²¹ Мұны естіген Исаның туыстары келіп, Оны алып кетпек болды, себебі олар Оны «есінен адасқан» деп ойлап жүрген болатын.

²² Иерусалимнен келген Таурат заңын зерттеушілер: -Оның бойында белзебүл бар, өйткені Ол жындарды тек жындардың басшылығымен ғана қуып шығарып жүр, -деді.

²³ Сонда Иса оларды Өзіне жақынырақ шақырып алып, астарлы әңгіме айтып берді. «Шайтан шайтанды қалай қуып шыға алады?

²⁴ Егер де патшалық өзара жауласып, бөлінетін болса, сол патшалық нық тұра алмайды.

²⁵ Әрбір үй іші де өзара жауласып, бөлінетін болса, сол үй де нық тұра алмайды.

²⁶ Егер де шайтан өзіне-өзі қарсы шығатын болса, онда оның да жауласып, бөлінгені, ол да нық тұра алмағандықтан, оның ақыры жақын.

²⁷ Сол сияқты күштінің үйіне кіріп, оның заттарын тонау үшін, ең алдымен, оны байлап тастау қажет, тек содан кейін ғана оның үйін тонайтын мүмкіндік туады».

²⁸ Сендерге шындықты айтайын: Адам баласының Құдайға қарсы күнәлары және олардың айтқан қорлау сөздері қанша рет жасалса да кешіріледі,

²⁹ ал Киелі Рухты біреу қорлап, Оған тіл тигізетін болса, өмір бойы оған кешірім болмайды, керісінше, сол күнәсі үшін ол мәңгілікте жауап беретін болады, - деді.

³⁰ Иса мұны олардың: «Оның бойында таза емес рух бар», - деген сөздеріне байланысты айтқан еді.

³¹ Сол жерге Исаның анасы мен бауырлары келді, сыртта тұрып, біреуді жіберіп, Оны шақыртты.

³² Сол кезде көптеген адам Исаны айналдыра қоршап отырған болатын, сонда Оған: -Сенің анаң мен бауырларың және қарындастарың Сені іздеп келді, олар Сені сыртта күтіп тұр, - деді.

³³ Иса оларға: -Кім Маған ана және кім Маған бауыр? -деді.

³⁴ Жан-жағына қарап: -Міне, Менің анам мен бауырларым, -деп Өзі жауап берді.

³⁵ Егер кімде-кім Құдайдың еркін орындаса, сол Маған бауыр, қарындас және ана болады, - деді.