Марқа 16 - Zhana Osiet

¹ Сенбі күн өткен соң, мағдалалық Мәриям мен Жақыптың шешесі Мәрия және Саломия Исаның денесін майлау үшін хош иісті май сатып әкелді.

² Сенбіден кейін аптаның бірінші күні таңсәріде, күн енді шыға бастағанда, олар қабірге барды.

³ Олар: «Қабірдің аузындағы жалпақ тасты бізге кім ашып берер екен?» -деп бір-біріне айтып келе жатқан болатын.

⁴ Бірақ олар келгенде, тастың орнынан алынып тасталғанын көреді, ал тас өте үлкен болатын.

⁵ Олар қабірге кірген кезде, оң жақта аппақ киіммен отырған жас жігітті көріп, зәрелері ұшады.

⁶ -Айқышқа шегеленген назареттік Исаны іздеп жүрсіңдер ғой! Қорықпаңдар! Ол қайта тірілді! Ол мұнда жоқ. Міне, Оның жатқан жерін қараңдар.

⁷ Енді Оның шәкірттері мен Петірге барып айтыңдар. Оның Өзі сендерге айтқанындай, Ол сендерден бұрын Ғалилеяға барады. Оны сол жерде көресіңдер, - деді ол.

⁸ Олар қорыққандарынан қалтырап, аң-таң болған күйде қабірден шығып, алыстау жерге қашып барады. Олардың үрейленгені соншалық, ешкімге еш нәрсе деп айтпады.

⁹ Иса қайта тірілген соң, сенбіден кейінгі бірінші күні таңертең ерте, ең алдымен, Өзі жеті жынын қуып шыққан мағдалалық Мәриямға көрінді.

¹⁰ Мәриям кезінде Исамен бірге жүрген болатын, енді қазір қайғырып, Оны жоқтап, жылап жүргендерге барып, хабар берді.

¹¹ Бірақ шәкірттері Исаның тірілгеніне де, Оны Мәриямның көргеніне де сенбеді.

¹² Осыдан кейін Иса өз мекендеріне жолда кетіп бара жатқан екеуіне басқа бейнеде көрінді.

¹³ Сонда олар да қалғандарына барып, хабар берді, бірақ оларға да сенбеді.

¹⁴ Ең соңында Иса дастарқан басында ас ішіп отырған Өзінің он бір шәкіртіне келіп көрінді. Алайда Иса Өзінің өлімнен қайта тірілгеніне сенбей, олардың сенімсіздік көрсеткеніне және қасарысқан жүректеріне бола қапаланды.

¹⁵ Сонда Иса оларға: -Осы әлемдегі барлық адамдарға барып, Ізгі хабарды жариялаңдар.

¹⁶ Кім соған сеніп, шомылдырудан өтсе, сол құтқарылады, ал кім оған сенбесе, сол сотталады.

¹⁷ Сенушілердің сенімдерін дәлелдейтін белгі мынау: Менің атыммен жындарды қуып шығатын болады; жаңа тілде сөйлеп;

¹⁸ қолдарымен жылан да ұстайды; егер өлімге әкелетін бір нәрсе ішіп қойса, одан ешқандай да зиян шекпейтін болады; ауырған адамдарға қолдарын қойса, олар сауығатын болады, - деді.

¹⁹ Сонымен, Иса осының бәрін айтып болған соң, көкке көтеріліп кетті де, Құдайдың Оң жағына барып отырды.

²⁰ Ал шәкірттері барлық жерлерге барып уағыз айтты. Иеміз оларды жетелеп, айтқан сөздерін ғажайыптар арқылы қолдап отырды.