Марқа 15 - Zhana Osiet

¹ Таңертең ерте бірінші бас қызметкерлер мен ақсақалдар және Таурат заңын зерттеушілер, жоғарғы кеңесшілер алқасы бәрі бірігіп, шешім шығарған соң, Исаны байлап, Пилаттың қолына апарып тапсырды.

² Сонда Пилат Исадан: -Сен яһудейлердің Патшасысың ба? -деп сұрады. -Сен өзің осылай айтып тұрсың, -деп жауап берді Иса.

³ Бірінші бас қызметкерлер Исаға көптеген айыптаулар тақты.

⁴ Сонда Пилат Одан тағы да сұрады: -Сонымен, Сен ешқандай да жауап бермейсің бе? Сені қаншама адам айыптап тұр, қара!

⁵ Иса оған ешқандай да жауап қайтармады, бұл Пилатты таңғалдырды.

⁶ Мейрам кезіңде халықтың сұрауы бойынша Пилат бір тұтқынды босатып жіберетін.

⁷ Сол уақытта бүлік шығарған көтерілісшілермен байланысы болған және көтеріліс кезінде адам өлтірген Бараба есімді біреу тұтқында отырған болатын.

⁸ Сол жерге жиналған халық Пилатқа келіп, одан олардың өтінішін орындауын талап етті.

⁹ -Сендер Менің яһудейлердің Патшасын босатып бергенімді қалайсыңдар ма? - деп сұрады Пилат олардан.

¹⁰ Ол бірінші бас қызметкерлердің Исаны қызғаныштан ұстап бергенін білетін.

¹¹ Бірақ бірінші бас қызметкерлер тек Барабаны ғана босатуды сұрауын алдын ала айтып, халықты дайындап қойған болатын.

¹² -Сонда сендер яһудейлердің Патшасы деп өздерің атаған Адамға менің не істегенімді қалайсыңдар? -деп олардан тағы сұрады.

¹³ -Оны айқышқа шегеле! -деп олар тағы да айқай салды.

¹⁴ -Ол қандай жамандық істеді? -деп сұрады Пилат олардан. Сонда олар одан бетер қатты дауыстап: -Оны айқышқа шегеле! - деп айқайлады.

¹⁵ Осыдан кейін Пилат халыққа жағу үшін Барабаны босатып берді де, Исаны қамшымен дүрелетіп, айқышқа шегелеуге тапсырды.

¹⁶ Жасақшылар Исаны ауланың ішкі жағындағы претория деп аталатын жерге алып барған соң, сол жердегі Римнің бүкіл әскери бөлімшесін сонда жинады. (600 адамдай).

¹⁷ Бұдан кейін олар Исаға патшалар киетін қызылкүрең түсті шапан кигізіп, шомырттың тікенді бұтасынан өрілген тәжді Оның басына кигізіп қойды да:

¹⁸ -Яһудейлердің Патшасы жасасын! -деп Оған сәлем бере бастады.

¹⁹ Содан кейін қамысты таяқпен Оның басынан ұрды, Оның бетіне түкіріп, Оның алдына тізерлеп иіліп, тағзым еткен түр көрсетті.

²⁰ Сөйтіп, Оны әбден келемеждеп, жәбірлеп болған соң, олар Оның үстіндегі патшалар киетін қызылкүрең шапанды шешіп алып, Оған Өзінің киімдерін қайта кигізді де, Оны айқышқа шегелеу үшін ауладан алып шықты.

²¹ Жол-жөнекей ауылдан келген, өзі киренейлік, Ескендір мен Руттың әкесі Шимон есімді біреуді ұстап алып, оны Исаның айқыш ағашын алып жүруге мәжбүрледі.

²² Олар Исаны Ғолғота деген жерге алып келді. (Бұл сөз аударғанда «Маңдайтөбе» дегенді білдіреді.)

²³ Сол жерде Оған мираның ащы дәмі бар шарап ұсынды, бірақ Иса одан ішпеді.

²⁴ Сосын олар Исаны айқышқа шегелеп қойып, Оның киімдерін өзара бөліп алмақ болды да, кім не алатынын анықтау үшін, жеребе тастады.

²⁵ Исаны айқышқа уақыттың үшінші бөлігі (яғни таңғы сағат тоғыз) кезінде шегелеген болатын.

²⁶ Оған таққан айыпты, яғни, «Яһудейлердің Патшасы» деген жазуды, Оның бас жағына жазып, іліп қойды.

²⁷ Онымен бірге екі қарақшыны: біреуін Оның оң жағына, екіншісін Оның сол жағына айқышқа шегеледі.

²⁸ Осылайша, Жазбадағы: «Оны қылмыскерлердің қатарына жатқызатын болады», - деген сөз орындалды.

²⁹ Оның қасынан өткендер Оған тіл тигізіп, бастарын шайқап: -Сен ғибадатхананы қиратып, оны үш күнде қайта тұрғызамын деп едің,

³⁰ енді айқыштан түсіп, Өзіңді құтқарып ал! - десті.

³¹ Бірінші бас қызметкерлер мен Таурат заңын зерттеушілер де бір-біріне: -Басқаларды құтқарды, ал Өзін-Өзі құтқара алмады, - деп Исаны мазақ қылды.

³² -Егер де Бұл Өзі -Мәсіх, Өзі Исраилдің Патшасы болса, онда айқыштан түссін, біз соны көріп, сенетін боламыз, -десті. Исаның Өзімен бірге айқышқа шегеленгендер де Оған тіл тигізді.

³³ Сағат алтының кезінде (яғни түскі он екі) барлық жерді қара түнек басты. Сол қара түнек тоғызыншы сағатқа (яғни түстен кейінгі үшке) дейін созылды.

³⁴ Сағат тоғыздың (түстен кейінгі үш) кезінде, Иса қатты дауыстап: -Элой, Элой, лэма савахтани? -деді. (Мұның аудармасы: «Құдайым Менің, Құдайым Менің, Сен Мені не үшін қалдырып кеттің?» - деген мағына береді).

³⁵ Осыны естіген сол жерде тұрған кейбіреулер: -Ол Ілиясты шақырып жатыр! Тыңдашы! - деді.

³⁶ Біреу жүгіріп барып, қышқыл сірке суына сорғышты батырып алды да, оны ұзын таяқтың басына іліп, Оған ішкізіп тұрып: -Күте тұрайық, Ілияс Оны түсіріп алуға келер ме екен, соны көрейік, - деді.

³⁷ Иса қатты дауыстап, содан кейін жан тапсырды.

³⁸ Сол кезде ғибадатханадағы шымылдық жоғарыдан төмен қарай ортасынан қақ айырылып, екіге бөлінді.

³⁹ Исаға жақын және қарама-қарсы тұрған римдік жүзбасы Оның қалай жан тапсырғанын көргенде: -Бұл Адам, шынымен де, Құдайдың Ұлы болған екен! - деді.

⁴⁰ Алыстан бәрін бақылап, қарап тұрған мына әйелдер: мағдалалық Мәриям мен кіші Жақып пен Жүсіптің анасы Мәрия және Саломия да сол жерде болды.

⁴¹ Иса Ғалилеяда болған кезде, олар Оның соңынан еріп, Оған қызмет еткен болатын. Сол жерде Исамен бірге Иерусалимнен еріп келгендер де болды.

⁴² Осы күн сенбінің алдындағы дайындық күні болғандықтан, кеш батып, қараңғы түсе бастағанда,

⁴³ кеңестің белсенді мүшесі болған және өзі де Құдайдың Патшалығының келуін күтіп жүрген арамеялық Жүсіп батылдықпен Пилатқа барып, Исаның өлі денесін сұрап алды.

⁴⁴ Пилат Исаның тез өліп қалғанына таңғалып, Римдік әскердің жүзбасын өзіне шақырып алып: -Оның өлгеніне көп болды ма? - деп сұрады.

⁴⁵ Оның өлгенін Рим әскерінің жүзбасынан біліп алған соң, ол Исаның өлі денесін Жүсіптің алуына рұқсат берді.

⁴⁶ Жүсіп денені жерге түсіріп, зығырдан тоқылған жұқа матаға орап, Оны жартастан ойып жасалған қабірге апарып қойды да, қабірдің есігін жалпақ таспен бекітті.

⁴⁷ Мағдалалық Мәриям мен Жүсіптің анасы Мәрия Исаның денесін қайда апарып қойғанын көрді.