Марқа 13 - Zhana Osiet

¹ Ғибадатханадан шығып келе жатқан Исаға Оның бір шәкірті: -Ұстаз! Мына тастардың қалай қаланып, мына ғибадатхананың қалай салынғанына қарашы! -деді.

² -Сенің көріп тұрғаның осы үлкен ғимарат па? Осы жерге қаланған тастардың бірде-бірі қалмай, бәрі де қиратылады, - деді Иса оған.

³ Иса ғибадатханаға қарама-қарсы Зәйтүн тауында отырған кезде, Петір, Жақып, Жохан және Әндір жеке келіп:

⁴ -Бұл қашан және қандай белгілерден осы нәрсенің орындалғанын білуге болатынын бізге айтшы, -деп сұрады Одан.

⁵ -Сендерді біреу алдап кетпесін, байқаңдар, -деп оларға Иса сөзін бастады.

⁶ Көптеген адам: «Бұл -Менмін», -деп Менің атымнан келіп, көп адамдарды алдайды.

⁷ Сол кезде болып жатқан соғыстар мен қақтығыстар туралы естисіңдер, алайда одан қорықпаңдар, бұл болуға тиіс, өйткені бұл әлі де соңы емес.

⁸ Сонда халық-халыққа, патшалық -патшалыққа қарсы көтеріліп, әр жерде жер сілкіністері мен ашаршылық болады, алайда бұл тек толғақ азабының бастамасы ғана.

⁹ Сендер өздеріңе мықты болыңдар! Сендерді синедериондағыларға* (жоғарғы кеңесшілер алқасына) ұстап береді, синагогалар мен басшылар алдына апарып, ұрып-соғады. Сонда сендер Мен үшін патшалардың алдында тұрасыңдар, оларға Мен туралы куәлік бересіңдер.

¹⁰ Сөйтіп, осы Ізгі хабар, ең алдымен, барлық халықтарға жариялануы тиіс.

¹¹ Сендерді қай кезде ұстаса да, қай жаққа апарса да, алдын ала не айту керектігін уайымдамаңдар. Сол сәтте өздеріңе не берілсе, соны оларға айтыңдар. Өйткені сол кезде сендер емес, Киелі Рух сөйлейтін болады.

¹² Сонда бауыры бауырын өлімге қиып, әкесі баласына, балалары ата-аналарына қарсы шығып, оларды өлімге душар етеді.

¹³ Осылайша, Менің атыма бола, барлығына жеккөрінішті боласыңдар. Ал осының соңына дейін кім шыдаса, тек сол ғана құтқарылатын болады.

¹⁴ Сонда «жексұрын жиренішті нәрсенің» қаңырап бос қалған немесе тұрмайтын жерде тұрғанын көргенде, оқып отырғандар түсініп алсын, яһудеядағылар тауға қашсын.

¹⁵ Егер біреу үйдің төбесінде болса, ол төмен түспесін немесе бір нәрсе алу үшін өзінің үйіне де кірмесін.

¹⁶ Кім далада болса, өзінің сыртқы киімін алуға қайтып келмесін.

¹⁷ Сол күндері жүкті әйелдер мен бала емізіп жүргендер үшін қайғылы күн болады.

¹⁸ Осы нәрселер қыста болмай-ақ қойсын деп мінажат етіңдер,

¹⁹ өйткені сол күндері Құдай әлемді жаратқан кезден бастап, осы күнге дейін ешқашан болып көрмеген және болмайтын қайғы-қасіретке толы кезең болады.

²⁰ Егер де Иеміз сол күндерді қысқартпағанда, ешбір пенде құтқарыла алмайтын еді. Алайда алдын-ала таңдалғандары үшін, Ол сол күнді қысқартты.

²¹ Сол кезде сендерге біреу: «Мәсіх, міне, мұнда! Қараңдар!» немесе «Әне, Ол анау жерде! Қараңдар!» -деп айтса, оған сенбеңдер.

²² Өйткені сол кезде жалған мәсіхтер мен жалған пайғамбарлар келіп, көрініске өтірік нышан беріп, жалған кереметтер жасап, бар мүмкіндіктерін қолданып, керек болса таңдалғандарды да алдайды.

²³ Сендер осыны көрген кезде абай болыңдар! Сендерге бәрін алдын ала айтып тұрмын.

²⁴ Сол қайғылы, қасіретті күндерден кейін «күн қарауытып, айдың өзі жарық бермей,

²⁵ көктегі жұлдыздар құлап, көктегі күштер шайқалатын болады».

²⁶ Cол уақытта Адам Ұлының Өзінің құдіретті күшімен және Өзінің ұлы даңқымен бұлттарда келе жатқанын адамдар көретін болады.

²⁷ Сонда Ол әлемнің төрт бұрышына періштелерін жіберіп, жердің ана шеті мен көктің мына шетінен Өзінің таңдап алғандарын жинап алады.

²⁸ Інжір ағашына қарап, содан үлгі алыңдар, оның сабақтары жұмсарып, жапырақтары шыға бастағанда, жаздың таяғанын білесіңдер.

²⁹ Сол сияқты сендер тура осылай болып жатқан оқиғаларды көрген кездеріңде, болатын нәрсенің есікке таяп қалғанын білесіңдер.

³⁰ Сендерге шындықты айтайын: осы ұрпақ жоғалмай тұрып, осының бәрі орындалатын болады.

³¹ Осы аспан мен жер де жойылатын болады, ал Менің сөздерім ешқашан жойылмайды.

³² Алайда сол күн немесе сол сағат ешкімге: не көктегі періштелерге, не Ұлға да белгісіз, ол тек Әкенің Өзіне ғана аян.

³³ Сондықтан өте сергек болыңдар, өйткені осы кездің қай уақытқа келіп қалатынын сендер білмейсіңдер.

³⁴ Өзі басқа жаққа кетіп бара жатқан адам үйін құлдарына қалдырып, оларға басқаратын билік беріп және әркімге өз жұмысын бөліп береді, есікте тұратын күзетшіге де да сергек болуды бұйырады.

³⁵ Сол секілді сендер де сергек болыңдар, өйткені үй иесінің қай уақытта келетінін: кешке ме, не түн ортасында ма немесе әтеш шақырғанда ма, не таңға жуық па, сендер оны білмейсіңдер.

³⁶ Ол аяқастынан келіп, сендердің ұйықтап жатқан кездеріңнің үстінен түспесін.

³⁷ Сендерге тағы да айтамын, бәріңе де айтарым: сергек болыңдар! - деді.