Марқа 12 - Zhana Osiet

¹ Бұдан кейін Иса оларды мынадай нақыл сөздермен үйрете бастады: «Бір адам жүзім бағын отырғызып, оны қоршап, шырын сығатын ор қазып, мұнара тұрғызып болған соң, оны жүзімшілерге жалға беріп, өзі алыс елге кетіп қалады.

² Уақыты келген кезде, Ол өзінің жүзім бағының жемісін алмақ болып, жүзімшілерге өзінің құлын жібереді.

³ Бірақ жүзімшілер оны ұстап алып, ұрып-соғып, құр қол қайтарады.

⁴ Сонда қожайыны оларға басқа бір құлын тағы жібереді, олар оның басын жарып, абыройын төгеді.

⁵ Жүзім бағының иесі оларға басқа құлын тағы жібереді, олар оны өлтіріп тастайды. Сонымен, жүзімшілер олардың көбін ұрып-соғып, енді біреулерін өлтіре береді.

⁶ Жүзім иесінің бір баласы бар еді, ол баласын жақсы көретін, ең соңында ол өзінің ұлын оларға жіберіп тұрып: «Менің ұлымнан ұялатын шығар», - деп ойлайды.

⁷ Алайда әлгі жүзімшілер бір-біріне: «Бұл мұрагер ғой, оны өлтірейік, жүріңдер. Сонда оның мұрасы біздікі болады», - дейді.

⁸ Олар оны ұстап алып, өлтіріп, жүзім бағының сыртына лақтырып тастайды.

⁹ Енді жүзім бағының иесі оларға не істейді? Жаңағы жүзімшілердің көзін құртып, жүзім бағын басқаларға береді.

¹⁰ Сендер Жазбада: «Үй салып жатқа н құрылысшылардың керек емес деп бас тартқан тасы енді басты іргетасқа айналды.

¹¹ Бұл Иемізден болды, бізге осыны көру ғажайып бір керемет емес пе!» - деп жазылғанын оқымадыңдар ма?

¹² Осы айтылған нақыл сөздің өздеріне арналып айтылғанын олар түсінді, сондықтан Исаны ұстап алудың жолын іздей бастады, бірақ халықтан қорыққандықтан, Оны сол жерде қалдырып, кетіп қалды.

¹³ Содан кейін олар Исаны Өз сөзінен ұстауға тырысып, Оған бірнеше фарисейлер мен Иродтың жақтастарын жіберді.

¹⁴ Сонда Исаға келгендер: -Ұстаз! Біз Сенің шыншыл екеніңді білеміз, біреуге жағымпаздану деген Сенің ойыңа да келмейді. Сондықтан да адамның бет-жүзіне қарамайсың, осылай Құдайдың жолындағы шындықты үйретіп жүрсің. Рим патшасына салық төлеу керек пе, жоқ па? Оны төлейік пе әлде төлемейік пе? - деді.

¹⁵ Иса олардың екіжүзділігін білгендіктен: -Неменеге Мені сынап тұрсыңдар? Маған бір динарий әкеліп беріңдерші, Мен көрейін, - деді оларға.

¹⁶ Олар бір динарийді Исаға әкеліп берді. Иса оларға: -Мынаған кімнің бейнесі салынған және кімнің есімі жазылған? -деді. -Рим патшасының, -деп жауап берді олар.

¹⁷ -Ендеше Рим патшасынікін Рим патшасына, ал Құдайдікін Құдайға беріңдер, -деді Иса. Олар Оның берген бұл жауабына таңғалды.

¹⁸ Бұдан кейін қайтадан тірілу болмайды деп санайтын саддукейлер де Исаға келді. Оған тағы да былай деп сұрақ қойды:

¹⁹ -Ұстаз! Егер де біреудің бауырының баласы болмай жатып, қайтыс болып кетсе әрі оның әйелі жесір қалатын болса, онда әлгі әйелге ағасының інісі үйленіп, оның ұрпағын ары қарай жалғастыруды Мұса бізге жазып кеткен.

²⁰ Жеті ағайынды жігіттер болыпты, біріншісі бір әйелге үйленді, алайда ұрпақ қалдырмай өліп кетті.

²¹ Екіншісі де сол әйелге үйленді, ол да ұрпақ қалдырмай қайтыс болды, үшіншісімен де дәл солай болды.

²² Осылай, жетеуі де арттарынан ұрпақ қалдыра алмады. Осы болған жағдайлардан кейін әлгі әйел де дүниеден өтеді.

²³ Сол қайта тірілу болған кезде әлгі әйел олардың қайсысына әйел болады? Өйткені олардың жетеуі де бір әйелге үйленген еді ғой, - деп сұрады.

²⁴ -Сендер не Жазбаны, не Құдайдың күшін білмегендіктен, адасып жүрсіңдер, солай емес пе? -деді де бұл сұраққа былай деп жауап берді:

²⁵ -Өлгендер қайта тірілгеннен кейін не үйленбейді, не күйеуге де шықпайды. Олар тек көктегі періштелер секілді болады.

²⁶ Өлгендердің қайта тірілетіні туралы Мұсаның кітабындағы лаулап жанған тікенді бұта оқиғасынан: «Мен - Ыбырайымның Құдайымын, Мен - Ысқақтың Құдайымын, Мен - Жақыптың Құдайымын», -деп Құдайдың айтқанын оқымап па едіңдер?

²⁷ Сондықтан Ол -өлгендердің емес, тек тірілердің Құдайы. Сендер қатты адасып жүрсіңдер, - деді.

²⁸ Сонда олардың дауларын естіп тұрған бір Таурат заңын зерттеуші жақын келіп, Исаның оларға жақсы жауап бергенін көріп: -Өсиеттердің қайсысы бірінші болып саналады? - деп сұрады Одан.

²⁹ Иса оған: -Басты өсиет мынау: «Исраил, тыңдап ал! Біздің Иеміз - Құдай, жалғыз Иеміз де тек Сол болады.

³⁰ Өзіңнің Құдай Иеңді шын жүрегіңмен, бүкіл жан дүниеңмен және бар ақыл -ойыңмен, барлық күш -қуатыңмен сүй».

³¹ Екінші өсиет мынау: «Өзіңнің жақыныңды өзіңді сүйгендей сүй». Осылардан басқа үлкен өсиет жоқ, -деді.

³² Таурат Заңын зерттеуші: -Ұстаз, керемет екен! Сен шындықты айттың, тек бір ғана Құдай бар, Одан басқа ешқандай да Құдай жоқ.

³³ Сондықтан да Оны бар жүрекпен, барлық ақыл-ойыңмен, барлық күшіңмен сүйіп және өзіңді сүйгендей жақыныңды сүйе білу-толықтай өртелетін құрбандық пен сый-тартудан да бағалы, - деді.

³⁴ Сонда Иса оның өте орынды жауап бергенін көріп: -Құдай Патшалығынан алыс емес екенсің, -деді оған. Осыдан кейін Одан бір нәрсе сұрауға ешкімнің батылы бармады.

³⁵ Иса ғибадатханада тәлім беріп тұрып: -Таурат заңын зерттеушілер Мәсіхті Дәуіттің Ұлы деп неге айтқан? -деп сұрады.

³⁶ Дәуіттің өзі Киелі Рухтың жетегімен: «Ием Менің Иеме: -Сенің жауларыңның тізесін бүккізіп, оларды Сенің аяқтарыңның астына салып бергенімше, Менің оң жағымда отыр», - деп айтқан болатын.

³⁷ Егер Дәуіттің өзі Оған «Ием» деп айтса, сонда Ол қалайша Дәуіттің Ұлы болады? -деді. Сонымен, көптеген халық Оны бар ынталарымен тыңдады.

³⁸ Иса Өз тәлімінде: -Таурат заңын зерттеушілерден аса сақ болыңдар. Олар ұзын етекті киімдерін киіп алып, сауда алаңдарында жүріп, сендердің сәлем бергендеріңді жақсы көреді.

³⁹ Синагогаларда құрметті орынға отырса, кешкі аста төрге шығып алады.

⁴⁰ Сөйтіп, олар жесірлердің үйіндегісін ішіп-жеп, көзге түсу үшін көп мінәжат ететін болады. Алайда оларды үлкен жаза күтіп тұр, - деді.

⁴¹ Содан кейін Иса қазына салатын сандыққа қарама-қарсы отырып, халықтың сандыққа мыс ақшаларын қалай салып жатқандарын бақылаумен болды. Байлардың көбісі молырақ салды.

⁴² Бір өте кедей жесір әйел, бір кодрант құрайтын екі ұсақ тиынын әкеліп салды.

⁴³ Сол кезде Иса Өз шәкірттерін шақырып алып: -Сендерге шындықты айтайын: мына кедей, өзі жесір әйел қазына сандығына бәрінен де көп салды.

⁴⁴ Себебі көбі өздерінен артылғандарын салса, ол өзінің мұқтаждығына қарамай, күнкөрісіне қажетті нәрсенің бәрін салды, - деді оларға.