Марқа 11 - Zhana Osiet

¹ Олар Иерусалимге жақындап, Зәйтүн тауының етегінде орналасқан Бетфаге мен Бетания аулына таяу келген кезде, Иса екі шәкіртіне тапсырма беріп:

² -Сендер қарсы алдарыңдағы ауылға барыңдар, оған бірден кірген кездеріңде ешбір адам мінбеген жас есектің байлаулы тұрғанын байқайсыңдар, соны шешіп, осында алып келіңдер.

³ Егер біреу сендерге: «Мұнымен не істейсіңдер? -деп сұраса, -бұл Иемізге керек», -десеңдер, оны сол сәтте осында жібереді.

⁴ Олар барып, қақпаның сырт жағындағы көшеде байлаулы тұрған жас есекті тауып, оны шешіп алды.

⁵ Сол жерде тұрғандардың кейбіреуі оларға: -Жас есекті неге шешіп алдыңдар? - деді.

⁶ Шәкірттері Иса оларға қалай айтқан болса, солай жауап берді, сонда олар оларды жібере салды.

⁷ Олар Исаға жас есекті алып келіп, үстіне өздерінің киімдерін жапты, Иса сол есектің үстіне отырды.

⁸ Сол кезде олардың көпшілігі өздерінің киімдерін, ал басқалары ағаштың жапырақ жайған бұтақтарын даладан кесіп әкеліп, жолға төсеп тастады.

⁹ Сонда ең алдында кетіп бара жатқандары да, соңында еріп келе жатқандары да: -Осанна! Иеміздің атымен Келген жарылқансын! - деп айқайлады.

¹⁰ Бабамыз Дәуіттің Патшалығы жарылқанып келді! Көктегі Патшаға Осанна! - деді.

¹¹ Осылай Иса Иерусалимдегі ғибадатханаға келіп кірді. Бәрін қарап шыққанша, кеш те түсіп кетті. Сонда Иса он екі шәкіртімен бірге сол жерден шығып, Бетанияға қарай кетті.

¹² Келесі күні олар Бетаниядан шығып келе жатқанда, Иса қарнының ашқанын сезді.

¹³ Ол алыстан жапырақтары жайқалған бір інжір ағашын көріп, одан бір жеміс табылып қалар деген оймен сол ағашқа келгенде, тек жапырақтарынан басқа еш нәрсе таппады. Інжір ағашының жеміс беретін уақыты әлі келмеген еді.

¹⁴ Сонда Иса ағашқа: -Енді ғасырлар бойы сенің жемісіңнен ешкім ешқашан жемесін! -деді. Оның шәкірттері мұны естіп тұрды.

¹⁵ Содан кейін Иса Иерусалимге келді. Ол ғибадатханаға кіріп, сол жердегі сатып алушылар мен сатушыларды қуып шықты, ақша айырбастаушылардың үстелдерін және көгершін сатып отырғандардың орындықтарын төңкеріп тастады,

¹⁶ осылайша олардың ешқайсысына заттарын ғибадатхана арқылы әрі-бері алып жүрулеріне рұқсат бермеді.

¹⁷ «Менің үйім барлық халықтардың мінәжат ететін үйі болуы тиіс», -деп жазылған жоқ па? Ал сендер оны қарақшылардың ордасына айналдырып жібердіңдер, -деп оларды үйрете бастады.

¹⁸ Мұны естіген бірінші бас қызметкерлер мен Таурат заңын зерттеушілер Исаны қалай өлтірудің амалын іздестіре бастады. Олар Исадан қорқатын, себебі бүкіл халық Исаның іліміне таңғалып жүрген болатын.

¹⁹ Кеш болған кезде, Олар қаланың сыртына шықты.

²⁰ Олар таңертең қайтадан інжір ағашының қасынан өткенде, оның тамырынан бастап қурап қалғанын көрді.

²¹ Петір мұны есіне түсіріп: -Ұстаз! Қараңыз! Сіз қарғаған інжір ағашы қурап қалыпты! - деді.

²² - Құдайға деген сенімдерің болсын! - деді оларға Иса.

²³ Сендерге шындықты айтайын, егер де біреу мына тауға: «Көтеріліп, теңізге лақтырыл!» -деп айтып, жүрегінде соған күмәнданбай, айтқаны сеніммен орындалатынына сенсе, сол болады.

²⁴ Осы арқылы сендерге айтарым: -Мінәжат етіп, бір нәрсе сұрайтын болсаңдар, соны алдық деп сенсеңдер, сол сендердің өмірлеріңде орындалады.

²⁵ Мінәжат етіп тұрған сәттеріңде, біреуге деген реніштерің болса, оны кешіріңдер, сонда сендердің Көктегі Әкелерің сендердің де күнәларыңды кешіретін болады, - деді.

²⁶ Егер кешірмесеңдер, сендердің Көктегі Әкелерің де сендердің күнәларыңды кешірмейді.

²⁷ Олар қайтадан Иерусалимге келді. Иса ғибадатхананы аралап жүрген кезде, Оған бірінші бас қызметкерлер мен Таурат заңын зерттеушілер мен ақсақалдар келіп:

²⁸ -Бұлардың бәрін қандай билікпен істеп жүрсің? -деді олар. -Сен істеп жүрген билікті Саған кім берді? -деді Оған.

²⁹ Сендерден бір нәрсе сұрайын. Егер де Маған жауап берсеңдер, осыларды қандай билікпен істеп жүргенімді сендерге айтамын, - деді Иса.

³⁰ Жақияның шомылдыруы көктен келді ме әлде адамнан болды ма? Маған осыған жауап беріңдерші! - деді.

³¹ Сонда олар мұны өзара талқылай бастады: -Егер де: «Көктен», -деп айтсақ, онда Ол: «Сендер не үщін оған сенбедіңдер?» - дейді.

³² «Адамнан», -деп айтуға олар халықтан қорықты, өйткені олардың бәрі Жақияны шынымен пайғамбар деп қабылдайтын.

³³ -Біз мұны білмейміз, -деп жауап берді сонда олар Исаға. -Ендеше, осы нәрселерді қандай билікпен істеп жүргенімді Мен де сендерге айтпаймын, -деді Иса оларға.