Марқа 1 - Zhana Osiet

¹ Құдайдың Ұлы Иса Мәсіх туралы Ізгі хабардың басы былай басталады:

² «Міне, Сенің алдыңда Саған жол дайындап қоятын хабаршымды жіберемін», -деп Ишая пайғамбардың жазбасында жазылғандай:

³ «Иемізге жол дайындаңдар! Оның жолдарын түзетіңдер!» -деген дауыс айдаладан шықты.

⁴ Міне, Жақия атты суға батырып шомылдырушы айдалаға келіп: «Күнәларыңның кешірілгенінің белгісі ретінде тәубе етіп, ой -ниеттеріңді өзгертіп, суға батырылып шомылудан өтіңдер!» - деп уағыздап жүрді.

⁵ Сонда бүкіл Яһудея елі мен Иерусалимнің адамдары оған келді. Сөйтіп, олар өз күнәларын мойындап, Иордан өзенінде Жақия арқылы с уға батырылып шомылудан өтті.

⁶ Жақия түйе жүнінен киім киетін, беліне қайыс белбеу тағып, шегірткемен және жабайы араның балымен тамақтанатын.

⁷ Ол өзінің уағызында: -Міне, менен кейін Құдіретті Біреу келе жатыр, мен, тіпті, еңкейіп, Оның аяқ киімінің бауын байлап беруге де лайықсызбын.

⁸ Мен сендерді суға батырып шомылдырдым, ал Ол сендерді Киелі Рухқа шомылдыратын болады.

⁹ Сол күні Ғалилеядағы Назарет қаласынан келген Иса Иордан өзенінде суға батырып шомылудан Жақия арқылы өтті.

¹⁰ Міне, сол сәтте аспан ашылып, көгершінге ұқсаған Рухтың Оған келіп қонғанын ол көрді.

¹¹ Сонда көктен: -Сен -Менің сүйікті Ұлымсың! Мен Саған ризамын! - деген дауыс шықты.

¹² Сол сәтте Рух Исаны айдалаға апарып тастады.

¹³ Сонда Ол қырық күн бойы айдалада шайтанның азғыруында болды әрі жабайы аңдардың ортасында жүрді, періштелер Оған қызмет етті.

¹⁴ Жақия ұсталғаннан кейін, Иса Ғалилеяға келіп, Құдайдың Ізгі хабарын жариялап:

¹⁵ -Құдайдың Патшалығы орнайтын мезгіл жақындады! Тәубе етіп, Ізгі хабарға сеніңдер! - деп уағыздап жүрді.

¹⁶ Иса бірде Ғалилея көлінің жағасымен өтіп бара жатып, ауларын көлге салып жатқан Шимонды және Оның бауыры Әндірді көрді. Олар балықшылар болатын.

¹⁷ Сонда Иса оларға: -Менің соңымнан еріңдер, Мен сендерді адамдарды аулаушы етемін, - деді.

¹⁸ Сол мезетте олар ауларын тастады да, Оның соңынан ерді.

¹⁹ Ол тағы біраз жүргеннен кейін, қайықта ауларын жамап отырған Зеведейдің ұлдары Жақыпты және оның ағасы Жоханды көрді.

²⁰ Иса оларды да бірден шақырып алды. Олар сонда әкелері Зеведейді жұмысшыларымен бірге қайықта қалдырып, Оның соңынан ерді.

²¹ Сонымен, олар Қапарнаумға келді. Ол синагогаға барып тәлім берді, бұл күн сенбі болатын.

²² Сол жердегі адамдар Оның берген тәліміне таң-тамаша болды, себебі Ол Таурат заңын зерттеушілер сияқты емес, керісінше, ерекше бір билікпен тәлім берді.

²³ Дәл осы уақытта олардың синагогасында бір рухы таза емес адам айғай салды:

²⁴ -Назареттік Иса, сенің бізде нең бар? Бізді құртуға келдің бе? Сенің Кім екеніңді білемін! Сені киелі етіп, Құдай жіберді!

²⁵ Иса оған: -Үніңді өшір де, одан шық! -деп тыйым салды.

²⁶ Сонда әлгі таза емес рух оны қалшылдатып, қатты айғайлап, одан шығып кетті.

²⁷ Бәрінің зәрелері ұшып, бір-біріне: -Бұл не? Билік ететін жаңа ілім бе? Ол, тіпті, таза емес рухтарға да бұйрық береді, ал олар Оған бағынады! - деп жатты.

²⁸ Сөйтіп, Иса туралы бұл хабар сол сәтте-ақ бүкіл Ғалилея өлкесіне тарап кетті.

²⁹ Жақып пен Жоханды ертіп алып, синагогадан шыға сала, олар Шимон мен Әндірдің үйіне келді.

³⁰ Шимонның енесінің ыстығы көтеріліп, төсекте жатқан еді, мұны сол сәтте Исаға айтты.

³¹ Сонда Иса оған жақындап келіп, қолынан ұстап тұрғызғанда, оның қызуы қайтты, Шимонның енесі оларға қызмет ете бастады.

³² Кеш түсіп, күн батқан кезде, сол жердегі аурулар мен жын соққандардың бәрін Исаға алып келді.

³³ Бүкіл қала адамдары Шимонның есігінің алдына жиналды.

³⁴ Сол күні Иса көптеген адамдарды әр түрлі ауруларынан сауықтырды, олардан көптеген жындарды қуып шығарды. Ол жындарды сөйлетпей тастады, өйткені жындар Оның Кім екенін білді.

³⁵ Таң атуға таяғанда, әлі де қараңғылық басып тұрған кезде, Иса ерте тұрып, сыртқа шықты. Оңаша жерге барып, мінәжат етті.

³⁶ Сонда Шимон мен қасындағылар Исаның артынан іздеп шықты,

³⁷ Оны тауып алған соң: -Сені бәрі іздеп жатыр, -деді Оған.

³⁸ -Жүріңдер, басқа ауылдарға да барайық, Мен сол жерлерде уағыздауға тиіспін, өйткені Мен сол үшін келдім, - деді оларға.

³⁹ Сөйтіп, Ол бүкіл Ғалилеядағы синагогаларға кіріп, сонда уағыз айтып, жындарды қуып шығарды.

⁴⁰ Сонда алапеспен ауырған біреу Исаға келді, Оның алдына тізерлеп отыра қалып, Оған жалбарынып: -Егер қаласаң, Мені тазарта аласың, - деді.

⁴¹ Оған жаны ашыған Иса қолын созып, тигізді де: -Тазарғаныңды қалаймын! - деді.

⁴² Сол сәтте әлгі адамнан алапес кетіп, ол тап-таза болды.

⁴³ Иса ауруды қуып шыққан соң, қатал түрде оған ескертіп:

⁴⁴ -Байқа, ешкімге ештеңе айтпа, алайда ғибадатхана қызметкеріне барып, өзіңді көрсет. Сөйтіп, өзіңнің тазаланғаның үшін, Мұсаның бұйрығына сай құрбандық бер. Бұл оларға куәлік болсын, - деді.

⁴⁵ Сол адам шыға салып, болған жағдайды көп адамға жариялап айта бастады. Сондықтан да Иса сол қалаға ашық кіре алмай, айдалада қалып қойды, сонда да Оған жан -жақтан адамдар ағылып келіп жатты.