Лұқа 7 - Zhana Osiet

¹ Иса Өзіне ден қойып, тыңдап тұрған халыққа сөзін айтып болған соң, Қапарнаумға келді.

² Бір жүзбасының өте жақсы көретін құлы қатты ауырып, өлім аузында жатқан болатын.

³ Ол Иса туралы естіп: «Менің құлымды сауықтырып берсінші», -деген өтінішін білдіріп, яһудейлердің ақсақалдарын Оған жіберді.

⁴ Сонда олар Исаға келіп: -Осы адам Сенің көмек беруіңе лайық,

⁵ себебі ол біздің халқымызды жақсы көреді және ол бізге синагога салып берді, - деп өтініп сұрады.

⁶ Сонда Иса олармен бірге жүріп кетті. Иса оның үйіне таяп қалғанда, жүзбасы Оған өзінің достарын жіберіп: -Мырзам, әуре болмай-ақ қой, өйткені менің шаңырағымның астына Сенің келуіңе мен лайықты емеспін.

⁷ Сол үшін де менің Саған баруға батылым жетпеді, өйткені мен өзімді соған лайықтымын деп санамаймын, тек менің құлымның сауығып кетуіне сөзіңді айтшы.

⁸ Себебі мен де билікке бағынатын адаммын әрі өзіме бағынышты сарбаздарым да бар. Олардың біреуіне бар десем барады, басқаларына кел деп десем келеді, құлыма да мынаны істе десем, ол соны істейді, - деді.

⁹ Оның осылай дегенін естіп, таңғалған Иса Өзінің артынан еріп келе жатқан халыққа бұрылып: -Сендерге айтарым: Мен дәл осындай үлкен сенімді Исраилден кездестірген емеспін, - деді.

¹⁰ Исаға жібергендер үйге қайтып келгенде, әлгі құлдың сауығып кеткенін көрді.

¹¹ Осыдан кейін Иса Найын атты қалаға барды. Сонда Исаның соңынан Оның шәкірттерімен бірге көптеген халық ілесіп жүрді.

¹² Иса сол қаланың қақпасына жақындап қалған кезде, бір ананың өлген баласының денесін шығарып келе жатты. Әйел жесір болатын, сол қаланың көптеген адамдары сол әйелдің қасында жүрді.

¹³ Иса бұл жағдайды көргенде, Иеміздің жесір әйелге жаны ашыды: - Жылама, - деп оны жұбатты.

¹⁴ Сосын Ол табытқа жақындап келіп, оған қолын тигізді. Табытты көтеріп келе жатқан адамдар тоқтай қалды. Сонда Иса: - Бозбала, саған айтамын, орныңнан тұр! - деді.

¹⁵ Сонда өліп қалған әлгі бала орнынан тұрып отырды да, сөйлей бастады, Иса оны анасының қолына тапсырды.

¹⁶ Сол жерде болғандардың бәрін үрей биледі, сонда да олар Құдайды мадақтап: -Біздің арамыздан ұлы пайғамбар шықты! Себебі Құдай Өзінің халқына келді! - деді.

¹⁷ Яһудея жеріндегі барлық аймаққа Иса туралы айтылған сөз тарап кетті.

¹⁸ Жақияның шәкірттері осы болған оқиға жайында оған жеткізді. Сонда Жақия өзінің бір-екі шәкіртін шақырып алып,

¹⁹ оларды Иемізге жіберіп: -Келуге тиісті Сенбісің әлде біз басқа біреуді күтейік пе? - деп сұратты.

²⁰ Сонымен, әлгі ер адамдар Исаға келіп, былай деді: -Бізді суға батырып шомылдырушы Жақия жіберді, ол: «Келуге тиісті Сенбісің? Немесе басқаны күтейік пе?» -деп сұрап жатыр.

²¹ Иса сол сәтте көптеген адамдарды ауру-сырқауларынан және таза емес рухтардан сауықтырып, зағип адамдардың көбіне көре алатынмүмкіндік сыйлаған болатын.

²² Сонда Иса оларға: -Зағиптар көріп, жүре алмағандар жүріп, алапестер тазаланып, құлағы мүкістер естіп, өлгендер қайта тіріліп жатыр, ал кедейлер Iзгі хабарды естуде, осы көргендеріңді де, естігендеріңді де Жақияға айтып барыңдар.

²³ Маған сенімсіздік танытпағандар бақытты, - деді.

²⁴ Жақияның хабаршылары кетіп қалған соң, Иса халыққа Жақия туралы былай деп айта бастады: -Сендер елсіз жерге нені көруге бардыңдар? Жел тербеткен қамысты ма?

²⁵ Сонымен, нені көруге бардыңдар? Жібек киім киінген адамды ма? Алайда сәнді киім киіп, ағыл-тегіл молшылықта тұрып жатқандар тек патшалардың сарайында ғана болады.

²⁶ Сонымен, не көруге бардыңдар? Пайғамбарды ма? Иә, Менің сендерге айтарым: - Ол-пайғамбардан да үлкен.

²⁷ Ол туралы Жазбада: «Міне, Мен Сенен бұрын Сенің алдыңда жүріп, Сенің жолыңды дайындап қоятын елшімді жіберемін», -деп алдын ала жазылып қойылғанның нағыз өзі.

²⁸ Сендерге айтатын болсам: әйел затынан туғандардың ішінде Жақиядан жолы үлкен басқа ешкім болған емес. Алайда Құдай патшалығында кім кішік болса, сол үлкені болады, - деді.

²⁹ Осыны естігеннен кейін бүкіл халық та, салық жинаушылар да, Құдайдың әділдігін әрі Жақияның суға батырып шомылдырушы екенін мойындады.

³⁰ Фарисейлер мен Таурат заңын зерттеушілер оның суға батырылып шомылдыруынан өтпегендіктен, Құдайдың өздеріне берілген еркінен бас тартты.

³¹ -Сонымен, осы ұрпақтың адамдарын кіммен салыстыруға болады? Олар кімге ұқсайды?

³² Олар сауда алаңында отырып алып: «Біз сендерге сыбызғы тартып берсек те сендер билемейсіңдер, біз сендерге жоқтау әнін айтып берсек те сендер жыламайсыңдар», -деп бір-біріне дауыстап айғайлап жүрген балаларға ұқсайды.

³³ Өйткені нан да жемейтін, шарап та ішпейтін Жақия келгенде: «Оның бойында жын бар», - дедіңдер.

³⁴ Ал (тамақ) жейтін, ішетін Адам Ұлы келгенде: «Міне, мынау адам тамақ жеп, шарап ішеді әрі салық жинаушылармен де, күнәкарлармен де дос болып жүр», -дедіңдер.

³⁵ Алайда Даналықтың ісінің әділ екенін оның бүкіл балалары дәлелдеп береді, - деді.

³⁶ Бірде фарисейлердің біреуі Исаны ас ішуге үйіне шақырды. Иса үйге кіріп, дастарқан басына барып жайғасып отырды.

³⁷ Міне, сол кезде осы қалада күнәкар деп саналатын бір әйел әлгі фарисейдің үйінде Исаның ас ішіп отырғанын біліп, қыш ыдысқа құйылған мира майын сонда алып келді.

³⁸ Исаның аяқ жағына отырып алып, Оның аяғына көз жасын төкті, сосын оны шашымен құрғатып сүртті, Оның аяғын сүйіп, мира майын жаға бастады.

³⁹ Исаны қонаққа шақырған фарисей осыны көріп: «Егер де Ол пайғамбар болса, онда Өзіне қолын тигізіп отырған әйелдің кім және қандай әйел екенін білер еді, өйткені ол-күнәкар әйел», - деп іштей ойлады.

⁴⁰ Сол кезде Иса оған: -Шимон, Мен саған бір нәрсе айтайын деп едім, - деді. - Ұстаз, айта беріңіз, - деді ол.

⁴¹ -Бір қарыз берушінің екі борышкері болыпты, біреуі оған бес жүз, ал екіншісі елу күміс ақша қарыз екен.

⁴² Олардың қарызын өтеуге ақшалары болмағандықтан, қарыз беруші олардың екеуінің де қарызын кешіріпті. Қалай ойлайсың, осы екеуінің қайсысы оны көбірек жақсы көретін болады? - деді.

⁴³ Шимон: -Менің ойымша, кімнің қарызы көп кешірілгені, -деп жауап берді. Сонда Иса оған: -Сенің ойың дұрыс, - деді.

⁴⁴ Содан кейін әлгі әйелге бұрылып тұрып, Шимонға: -Мына әйелді көріп тұрсың ба? Мен сенің үйіңе кірген кезде, сен Маған аяқ жуатын су да бермедің, ол Менің аяғымды көз жасымен жуып, оны шашымен сүртіп шықты.

⁴⁵ Сен Мені сүймедің, ол кіргеннен бері Менің аяқтарымды сүюін тоқтатпады.

⁴⁶ Сен менің басыма май жақпадың, ол мира майын Менің аяқтарыма жағып шықты.

⁴⁷ Сондықтан, саған айтарым: -Оның күнәларының көбі кешіріледі, өйткені ол өте қатты жақсы көрді, ал кім аз жақсы көрсе, соған кешірім де аз болады, - деді.

⁴⁸ Осыдан кейін Иса әлгі әйелге: -Сенің күнәларың кешірілді, -деп оның күнәларының кешірілгені туралы айтты.

⁴⁹ Сонда олармен қатар ас ішіп отырғандар іштерінен: «Күнәларды кешіретіндей соншама Бұл Кім Өзі?» -деп ойлады.

⁵⁰ Иса жаңағы әйелге: -Сенімің сені құтқарды, енді тыныштықпен бара бер, - деді.