Лұқа 5 - Zhana Osiet

¹ Бірде мынадай жағдай болды. Иса Гинесәрет көлінің жағасында тұрды, Құдай сөзін тыңдағысы келген халық Оны жағадан ығыстыра бастады.

² Осы кезде Иса көлдің жағасында тұрған екі қайықты көрді, балықшылар қайықтан түсіп, балық аулайтын ауларын жуып жатқан еді.

³ Сонда Ол Шимон отырған қайыққа мініп, жағадан алысырақ барып тұруын одан өтінді де, қайықта отырып халыққа тәлім берді.

⁴ Содан кейін Иса сөзін аяқтады да, Шимонға қарап: -Енді тереңдеу жерге барып, балық аулайтын ауларыңды сол жерге салыңдар, - деді.

⁵ Сонда Шимон: -Тәлімгер, біз түні бойы еңбек етсек те, ештеңе аулай алмадық, егер Сен солай десең, ауларды салайын, - деді.

⁶ Олар осылай істегенде, ұсталған балықтың көптігі соншама, тіпті, балыққа салған аулары жыртыла бастады.

⁷ Олар келесі қайықтағы жолдастарына белгі беріп, оларды көмекке шақырды. Сөйтіп, олар аулаған балықтарын екі қайыққа толтырғанда, қайықтары ауыр салмақтан суға бата бастады.

⁸ Осыны көрген Шимон Исаның аяғына жығылып: -Ием, менен аулақ кеткеніңді қалаймын, өйткені мен күнәкар адаммын! - деді.

⁹ Себебі балық аулап жатқан кезде оның өзін де және қасындағылардың бәрін де қорқыныш биледі.

¹⁰ Осындай жағдай Шимонға жолдас болып жүрген Зебедейдің ұлдары Жақып пен Жоханда да болды. Сонда Иса Шимонға: -Енді сен дәл осы кезден бастап, адамдарды аулайтын боласың, қорықпа! - деді.

¹¹ Олар қайықтарын жағаға шығарды да, бәрін сол жерге тастап, Исаның артынан еріп кетті.

¹² Иса сол жердегі қалалардың біріне келгенде, бүкіл денесін алапес басып кеткен бір адам кездесті. Ол Исаны көре салып, Оның аяғына жығылып: -Ием, егер қалауың болса, мені тазарта аласың, - деді.

¹³ Иса оған қолын тигізді де: -Тазаланғаныңды қалаймын! -деді. Сол сәтте ол алапестен арылып, сауығып кетті.

¹⁴ Иса оған осыны ешкімге айтпауын бұйырды да: -Енді бар да, өзіңді Құдайдың қызметкеріне көрсет және оларға өзіңнің таза болғаныңның дәлелі ретінде куәлік болу үшін, Мұсаның берген бұйрығына сай ұсынатын тартуыңды апарып бер, - деді.

¹⁵ Сонымен, Иса туралы хабар бұрынғыдан бетер көп айтылып, жан-жаққа тарап кетті. Көптеген халық Оны тыңдау үшін және ауруларынан сауығып кету үшін Оған ағылып келіп жатты.

¹⁶ Иса елсіз жерге Өзі бөлек барып, мінәжат етіп жүрді.

¹⁷ Осындай күндердің бірінде Ғалилея мен Яһудея аймақтарының ауылдарынан және Иерусалимнен келген фарисейлер мен заңды үйретушілер Иса тәлім берген жерде отырды. Жаратқан Иеміздің сауықтыратын күші Исада болды.

¹⁸ Міне, сол кезде бірнеше ер адам төсекте сал болып жатқан бір адамды көтеріп, Исаның алдына жақынырақ апарып қоятын бос жерді іздестіре бастады.

¹⁹ Бірақ адамдар өте көп болғандықтан, Оған жақындатып апаратын жолды таба алмай, олар оны үйдің төбесіне алып шығып, сол жерден төсенішімен төмен қарай Исаның алдына түсірді.

²⁰ Иса олардың осы сенімдерін көргенде: -Ей, адам, сенің күнәларың кешірілді! - деді.

²¹ Сол сәтте әлгі фарисейлер мен Таурат заңын зерттеушілер: «Құдайдың атына осылай тіл тигізіп тұрған Бұл Кім? Бір Құдайдан басқа күнәларды Кім кешіре алады?» - деп іштерінен ойлады.

²² Олардың осы ойларын біле қойған Иса: -Неге сендердің жүректеріңде осындай ой бар?

²³ Қайсысын айту оңайырақ: «Сенің күнәларың кешірілді!» -деген бе? Немесе: «Орныңнан тұр да, жүріп кет!» -деген бе?

²⁴ Алайда жер бетіндегі күнәларды кешіре алатын биліктің тек Адам Ұлында ғана бар екенін сендердің білулерің қажет, -деді де, сал болып жатқанға: -Саған айтып тұрмын, орныңнан тұрып, төсенішіңді ал да, үйіңе бар, - деді.

²⁵ Сол сәтте әлгі адам олардың көзінше орнынан тұрды да, өзі жатқан төсенішін алып, Құдайды мадақтап, үйіне кетті.

²⁶ Болған жағдайға бәрі қайран қалды, бір жағынан Құдайды мадақтаса, бір жағынан оларды қорқыныш та биледі. -Біз бүгін адам сенгісіз нәрселер көрдік, -деді олар.

²⁷ Иса сол жерден шығып бара жатып, арнайы салық жинайтын жерде отырған Леуі есімді салық жинаушыны көріп: - Соңымнан ер, - деді оған.

²⁸ Ол орнынан тұрды да, бәрін тастап, Исаның соңынан ерді.

²⁹ Леуі Исаны сыйлап, өз үйіне қонаққа шақырып, үлкен той жасады. Салықшылардың көбі сол жерге келді және басқалары да олармен бірге сонда жайғасып, ас ішіп отырды.

³⁰ Сол кезде фарисейлер мен Таурат заңын зерттеушілер Исаның шәкірттеріне келіп: -Сендер неге салық жинаушылармен және күнәкарлармен бірге ас ішіп отырсыңдар? - деп күңкілдей бастады.

³¹ Иса оларға: -Дәрігерге дені саулар емес, керісінше, аурулар мұқтаж.

³² Мен әділдерді емес, күнәкарларды тәубеге шақыру үшін келдім, - деді.

³³ Сонда олар Исаға: -Жақияның шәкірттері жиі ораза ұстап, мінәжат етеді, фарисейлердікі де солай істейді, тек Сенікі ғана ішіп-жеумен жүр, - деді.

³⁴ Сол кезде Иса: -Күйеу жігітпен бірге тойда жүрген ұлдарға (қонақтарға) ораза ұстаңдар деп мәжбүрлеуге бола ма? - деді.

³⁵ Күйеу жігітті олардан тартып алып кететін күн туады, тек сол күндері олар ораза ұстайтын болады, - деді.

³⁶ Иса осыдан кейін оларға астарлап айта бастады: -Ешкім де жаңа сырт киімнен қиып алынған жамаумен ескі киімді жамамайды, егер солай істесе, жаңа киімді құртады және жаңа киімнен алынған жамау ескі киімге сәйкес келмейді.

³⁷ Ешкім де жаңа шарапты ескі торсыққа құймайды, егер солай істесе, жаңа шарап ескі торсықты жарып жібереді, сөйтіп, шарап та төгіледі, торсықтар да бүлінеді,

³⁸ сондықтан жаңа шарапты тек жаңа торсыққа құйып сақтау керек.

³⁹ Ескі шарапты ішкен әркім: «Тек ескі шарап жақсы», -деп айтады, себебі жаңа шарапты қаламайды.