Лұқа 4 - Zhana Osiet

¹ Киелі Рухқа толған Иса Иорданнан келгеннен кейін, Оны Рух жетелеп, елсіз жерге алып барды.

² Ол сол жерде қырық күн бойы сайтанның азғыруында болды. Сол күндер аяқталғанша Ол ештеңе жемеді, тек сол күндер аяқталғанда Ол ашыққанын сезді.

³ Сол кезде шайтан Оған: -Егер де Сен Құдайдың Ұлы болсаң, мына тас нанға айналсын деп бұйрық берші, -деді.

⁴ Сонда Иса оған былай деп жауап берді: -«Адам тек нанмен ғана өмір сүрмейді», - деп Жазбада жазылған.

⁵ Осыдан кейін сайтан Оны биік жерге апарып, осы әлемдегі барлық патшалықты Оған бір сәтте көрсетті.

⁶ Сайтан Оған: -Осылардың бүкіл билігін және атақ-даңқын да Саған беремін, өйткені осының бәрі маған берілген, сондықтан мен оны кімге бергім келсе, соған беремін.

⁷ Егер Сен маған басыңды иіп, тағзым ететін болсаң, осылардың бәрі Сенікі болады, - деді.

⁸ Сонда Иса оған былай деп жауап қайырды: -«Тек жаратушы Құдай Иеңе ғана тағзым етіп, тек жалғыз Оған ғана қызмет ет», - деп жазылған.

⁹ Одан кейін сайтан Оны Иерусалимдегі ғибадатхананың биік қабырғасының қырына тұрғызып қойды да, Оған мынаны айтты: -Егер де Сен Құдайдың Ұлы болсаң, осы арадан Өзіңді төмен қарай тастап жібер.

¹⁰ Өйткені: «Сені аман сақтап қалу үшін, Ол Өзінің періштелеріне бұйрық беріп қояды,

¹¹ сонда Сен аяғыңды тасқа ұрып алмауың үшін, олар Сені қолдарына көтеріп алып жүреді», -деп жазылған ғой.

¹² Сол кезде Иса оған былай деді: -«Өзіңнің Жаратушы Құдай Иеңді еркінсіп сынаушы болма», -деп те жазылған.

¹³ Осылай сайтан өзінің барлық сынақтарын аяқтаған соң, Исаны уақытша тастап кетіп қалды.

¹⁴ Иса Рухтың күшіне кенеліп, Ғалилеяға қайтып келді. Сонда Ол туралы хабар сол аймақтың бәріне жайылып кетті.

¹⁵ Иса синагогаларға барып, оларға тәлім берді, олардың бәрі Оны сыртынан мақтайтын.

¹⁶ Бірде Иса Өзі өсіп, тәрбие алған Назарет қаласына келді, сол кез әдеттегі сенбі күні болғандықтан, Ол синагогаға кірді. Содан кейін жазбадағы үзіндіні оқу үшін орнынан тұрды.

¹⁷ Сол кезде Оған Ишая пайғамбардың шиыршық кітабын оқуға берді. Ол кітапты ашып, Жазбаның мына жерін тауып оқыды:

¹⁸ «Иеміздің Рухы Менің бойымда, Ол Мені майлап, Ізгі хабарды жарлыларға жеткізгенімді, тұтқындағылардың бостандыққа шығатынын, соқырлардың көздерінің ашылатынын, қайғы-қасіретпен жүргендерді босататын

¹⁹ Жаратқан Иеміздің мейірімі жария болатын жылының мезгілі келіп жеткенін жарияласын деп жіберді», -деп оқып шықты.

²⁰ Содан кейін Ол шиыршық кітапты орап, оны қызметкерге берді де, келіп отырды. Сол синагогада болғандарың бәрі Оны ала көздерімен атып, Оған тесіле қарап қалды.

²¹ Алайда Иса оларға: -Бүгін Жазбадан не естісеңдер, сол орындалды, - деді.

²² Бәрі Оның айтқанын қолдап, Оның аузынан шыққан осы мейірімді сөздеріне таңданып: -Бұл Жүсіптің ұлы емес пе еді? - десті.

²³ Ал Иса оларға: -Осындағы әрбіреуің Маған: «Дәрігер болсаң, ең алдымен, Өзіңді емдеп ал», -деген мақалды есіме салып және тағы да Маған:«Қапарнаумда жасаған көп істерің туралы естідік, енді оны осы жерде, Өз отаныңда, істеп көр деп отырған боларсыңдар», - деді.

²⁴ -Мен сендерге шындықты айтайын: ешбір пайғамбарды өз елінде қабылдаған емес, -деді Иса оларға.

²⁵ Шындығын айтар болсам, Ілияс өмір сүрген күндері аспан үш жыл алты айға жабылып қалды, сонда бүкіл жер бетінде алапат ашаршылық болды, сол кезде Исраилде көптеген жесірлер бар еді.

²⁶ Сонда Құдай Ілиясты солардың бірде-біреуіне жіберген жоқ, оны тек Сидондағы Сарептада тұратын бір жесір әйелге ғана жіберді.

²⁷ Ал пайғамбар Елішенің кезінде де Исраилде алапеспен ауырғандар өте көп болды, сонда тек сириялық Нағыманнан басқасының ешқайсысы аурудан тазаланған жоқ, - деді.

²⁸ Осыны естігеннен кейін синагогада болғандардың бәрі қатты ашуланды.

²⁹ Орындарынан атып тұрып, Исаны қаланың сыртына қуып шығарды да, Оны өздерінің қаласы салынған биік төбеге алып шығып, Оны сол төбеден төмен қарай лақтырып жібермекші болды.

³⁰ Алайда Иса олардың ортасын жарып өтіп, сол жерден кетіп қалды.

³¹ Ол төмен түсіп, Ғалилеядағы Қапарнаум қаласына барды, әр сенбі сайын оларға тәлім беріп жүрді.

³² Оның берген тәліміне олар қатты таңғалатын, өйткені Оның айтқан сөздерінде ерекше бір билік бар болатын.

³³ Сол синагогада сайтанның таза емес рухы бойын билеп алған бір адам бар болатын, сол қатты дауыстап:

³⁴ -Оу, Назареттік Иса, бізде Сенің нең бар еді? Сен бізді құрту үшін келдің бе? Сенің кім екеніңді мен білемін! Сен Киелі Құдайдан келдің! - деді.

³⁵ Алайда Иса оған: -Үніңді өшіріп, одан шық! -деп сайтанға тыйым салды. Сонда сайтан оны ортаға алып шығып, құлатып жықты да, ешбір зиян келтірместен одан шығып кетті.

³⁶ Осы жағдайдан кейін сондағылардың бәрін қорқыныш билеп, олар бір-біріне: -Таза емес рухтарға бұйырғанда шығып кететіндей мына сөзде қандай билік пен күш бар? -десті.

³⁷ Осылайша, Иса туралы хабар сол аймақтың бәріне тарап кетті.

³⁸ Иса синагогадан шыққан соң, Шимонның үйіне келді. Шимонның енесі безгекпен ауырып, ыстығы қатты көтеріліп жатқан болатын. Үйдегілер Оған оның жағдайын айтып, Одан көмек беруді өтінді.

³⁹ Сонда Иса оның қасына барып, ыстыққа тыйым салғанда, ыстығы түсіп, сол сәтте орнынан тұрды да, оларға қызмет ете бастады.

⁴⁰ Күн батар кезде әр түрлі дертпен ауыратындардың барлығын Исаның алдына алып келді, Иса олардың әрқайсысына қолын қойып, оларды сауықтырды.

⁴¹ Олардың көбінен жындар шыққан кезде: -Сен -Құдайдың Ұлысың! -деп айғайлады. Олар Оның Мәсіх екенін білетіндіктен, Иса оларға тыйым салып, айтуға рұқсат бермеді.

⁴² Келесі күні Иса сол жерден шығып, елсіз жерге кетіп қалды. Адамдардың бәрі Оны іздей бастады, Оны тауып алған соң жібергілері келмей, сол жерде қалуын өтінді.

⁴³ Бірақ Иса оларға: -Мен басқа қалаларға да барып, Құдай Патшалығы туралы Ізгі хабарды жеткізуім керек, себебі Мен сол үшін де жіберілгенмін, - деді.

⁴⁴ Ол Яһудеяның синагогаларына барып, уағыздап жүрді.