Лұқа 24 - Zhana Osiet

¹ Олар сол сенбі өткеннен кейінгі бірінші күні таң ата өздерінің дайындап қойған жұпар иісті заттары мен майларын алып, қабірге келеді.

² Келген кезде қабірдің аузындағы тастың алынып тасталғанын көреді.

³ Ішіне кіргенде, олар сол жерден Иеміз Исаның денесін таппайды.

⁴ Олар бұл жағдайды түсіне алмай абдырап тұрғанда, киімдері жалт-жұлт етіп жарқыраған екі ер адам пайда болып, олардың алдына келіп тұра қалады.

⁵ Қорқып кеткен әйелдер жүздерін төмен түсірген сәтте олар: -Тіріні өлгендердің арасынан неге іздеп жүрсіңдер? -деді.

⁶ Ол мұнда жоқ, Ол өлімнен қайта тіріліп кетті. Ол Ғалилеяда жүрген кезінде өздеріңе не айтқанын естеріңе түсіріңдер:

⁷ -«Адам Ұлын осы әлемдегі күнәкар адамдардың қолына ұстап береді, сонда Оны айқышқа апарып шегелейді, ал үшінші күні Ол өлімнен қайта тіріледі». Ол сендерге осылай айтып еді ғой, - деді.

⁸ Тек осы кезде ғана Оның айтқан сөздері олардың естеріне түседі және

⁹ қабірден қайтып келген соң, осы болған жағдайдың бәрін олар Исаның он бір шәкіртіне, кейін басқаларына да жеткізеді.

¹⁰ Олар: мағдалалық Мәриям мен Жоханна және Жақыптың шешесі Мәриям болатын. Сонымен қатар, олармен бірге басқа әйелдер де болды, олар да осы жағдайды өзге де елшілерге айтып береді.

¹¹ Алайда олар үшін бұл бос сөз сияқты болып көрінді, сондықтан олар бұған аса сене алмады.

¹² Петір орнынан тұра салып, қабірге жүгіріп барады. Еңкейіп, төменге қараған кезде, Оның орнында тек денесін ораған матаның жатқанын көрді. Ол осы жағдайға таңғалып, кері қайтады.

¹³ Міне, сол күні олардың арасында болған екі шәкірті Иерусалимнен шығып, он бір шақырым қашықтықта орналасқан (алпыс стадий, бір стадий 185 метрге тең) Эммаус деген қалаға кетіп бара жатты.

¹⁴ Сонда олардың жол бойы бір-біріне айтқан әңгімесі де осы болған оқиға жайында болатын.

¹⁵ Сонымен, олар осылай өзара пікір таластырып, әңгімелесіп келе жатқан кезде, Исаның Өзі жақын барып, олармен қатар жүрді.

¹⁶ Алайда олардың көздерін біреу жауып тастағандай, Оны таныған жоқ.

¹⁷ Иса: -Сендер не жайында сөйлесіп келе жатырсыңдар? -деп олардан сұрады. Сол кезде олардың қабақтары түсіп, бір орында тұрып қалды.

¹⁸ Содан кейін Клеопа* есімді біреуі Исаға жауап беріп: -Басқа елден келсең де, осы Иерусалимде тұрып жатырсың, соңғы күндері осында қандай жағдайдың болғаны туралы білмейсің бе? - деді.

¹⁹ -Не болды? -деді Иса. -Назареттік Иса деп аталып кеткен бір ер адам болды, -деді олар Исаға. -Ол Өзінің сөзімен де, ісімен де Құдайдың және халықтың алдында Өзінің күшті пайғамбар екенін дәлелдеді.

²⁰ Алайда біздің бірінші бас қызметкерлер мен басшылар Оны өлтіру үшін, сатқындықпен ұстап берді, сөйтіп, Оны айқышқа шегелетті.

²¹ Ал біз болсақ, Исраилге бостандық алып беретін Сол деп үміттенген едік. Осы жағдайдың болғанына, міне, үшінші күн болды.

²² Алайда бізбен бірге болған әйелдер таң ата қабірге барып,

²³ ол жерден Оның денесін таппай, Оның өлімнен қайта тіріліп кеткені туралы айтқан періштелерді көріп келгені бізді таңғалдырып тұр.

²⁴ Осыдан кейін біздің арамыздағы кейбіреулері де сол қабірге барып, әлгі әйелдер айтқандай, Оның денесінің сол қабірде болмағанын көріп қайтып келді, - деді.

²⁵ Сонда Иса оларға: -Ой, түйсіксіздер-ай! Барлық пайғамбарлардың айтып кеткеніне сенудің орнына, сендер түсінуге қандай баяу едіңдер!?

²⁶ Ал Мәсіх осының бәрін басынан өткізуге тиіс болған. Тек содан кейін ғана Ол Өзінің даңқына бөленуге тиіс емес пе еді? - деді.

²⁷ Содан кейін Иса оларға сонау Мұсадан бастап, одан кейінгі пайғамбарлардың барлығы сол Жазбаларда Өзі туралы не жазғанын қамтып айтып беріп, оның мәнін оларға түсіндірді.

²⁸ Сонымен, олар өздері бара жатқан ауылға жақындап қалғанда, Иса ары қарай жүретін сыңай танытты.

²⁹ Бірақ екеуі Оны одан әрі жібергілері келмегендіктен, Исаға: -Бізбен бірге қалғаның жақсы болады, өйткені кеш те түсіп, күн де батып кетті, -деді. Сонда Иса олармен бірге қалмақ болып, үйге кірді.

³⁰ Иса дастарқан басына жантайып, олармен бірге ас ішуіне тура келді. Ол нанды алып, батамен жарылқап, оларға нанды үзіп берді. Міне, сол сәтте

³¹ олардың көздері ашылып, сонда ғана олар Оны таныды! Алайда Ол оларға көрінбей қалды.

³² Олар бір-біріне: -Ол жол бойы бізге Жазбаның мәні мен мағынасын ашып айтып берген кезде, біздің жүректерімізде жалындап жанған от пайда болды емес пе?! - десті.

³³ Олар сол сәтте орындарынан тұрып, Иерусалимге қайта оралды. Сол жерде олар бірге жиналып жүрген он бір шәкіртті және олармен бірге болған басқаларды да іздеп тауып алды.

³⁴ Сөйтіп, олар Иеміздің шынымен қайта тірілгенін және Оның Шимонға да көрінгені туралы айтып берді.

³⁵ Бұған қоса олар жолда болған оқиға жөнінде және оларға Исаның нанды үзіп берген кезде, олардың Исаны қалай танып-білгендерін де айтып берді.

³⁶ Олар осыны айтып жатқан кезде, Иса келіп, олардың ортасына тұра қалып: -Сендерге тыныштық тілеймін! -деді.

³⁷ Сол кезде олардың қорыққандары соншалық, олар бір рухты (елесті) көріп тұрған болармыз деп ойлады.

³⁸ Иса оларға: -Сендердің неге соншама естерің шығып кетті? Неліктен жүректеріңе күдік кірді?

³⁹ Міне, Менің қолдарым мен аяқтарыма қараңдаршы. Мен -Соның Өзімін! Кәне, қолдарыңмен ұстап көріңдер, өйткені рухта Менікі сияқты дене мен сүйек болмайды, -деді.

⁴⁰ Иса осылай деп, оларға Өзінің қолдары мен аяқтарын көрсетті.

⁴¹ Алайда олар қуаныштан бұған не сенерін, не сенбесін білмей тұрған кезде, Иса: -Мұнда жейтін бірдеңелерің бар ма? - деп сұрады олардан.

⁴² Сонда олар Исаға піскен балықтың бір бөлігін берді.

⁴³ Исан оны алып, олардың көз алдында тұрып жеді.

⁴⁴ -Мен өздеріңмен бірге болған кезде, Мұсаның Таурат кітабы мен пайғамбарлар Жазбаларында, Зәбүр жырларында Мен жайында айтылған сөздердің бәрі осылай орындалуы тиіс деп сендерге айтып едім ғой, -деді оларға Иса.

⁴⁵ Осылай Иса Жазбаның мәнін олардың ой-санасына түсінікті етіп ашып берді.

⁴⁶ -Сонымен, Жазбада Мәсіх осылай азап шегіп, үшінші күні Ол өлімнен қайта тіріледі деп жазылған, - деді Ол.

⁴⁷ Бұл (оқиға) Оның атын атап, тәубе еткенде, барлығының күнәлары кешірілуі үшін және Оның есімі Иерусалимнен бастап барлық халықтарға жария болу үшін болды.

⁴⁸ Сендер осының бәріне куә болдыңдар.

⁴⁹ Енді Әкемнің өздеріңе берген уәдесі көктен келеді, Мен соны сендерге жіберемін. Сол жоғарыдан келіп, өздеріңе қонатын күшті қабылдағанға дейін, сендер ешқайда кетпей, осы қалада қалыңдар, - деді.

⁵⁰ Иса оларды қаланың сыртына ертіп шығып, Бетанияға дейін шығарып салды. Иса қолын жайып, оларға батасын берді.

⁵¹ Ол бата беріп тұрған күйі аспанға көтеріле бастады, сөйтіп, олардан алыстап, одан да жоғары көкке көтеріліп кетті.

⁵² Шәкірттері Оның алдында тізе бүгіп, тағзым еткен соң, зор қуанышпен Иерусалимге қайта оралды,

⁵³ содан кейін ғибадатханаға барып, барлық уақыттарын сонда өткізіп, Құдайды мадақтайтын болды.