Лұқа 23 - Zhana Osiet

¹ Содан кейін олардың барлығы орындарынан тұрып, Исаны Пилатқа алып барды.

² Сол жерде олар: -Біз Мынаның халқымызды азғырып, Рим патшасына алым-салық төлеуге кедергі жасағанын, Өзін Мәсіх Патшамын деп айтып жүргенін анықтадық, -деп Исаны айыптай бастады.

³ Пилат Исадан: -Сен яһудейлердің Патшасысың ба? -деп сұрады. -Сен өзің осылай айтып тұрсың, -деп Иса оған жауап қайырды.

⁴ Сонда Пилат бірінші бас қызметкерлер мен сол жердегі халыққа: -Мен Мына Адамнан ешқандай кінә таппай тұрмын, - деді.

⁵ Бірақ олар: -Ол бүкіл Яһудея мен сонау Ғалилеядан бастап осы жерге дейінгі халықтардың арасында Өзінің тәлімімен дүрбелең тудырып, оларды соған үйретіп жүр, - деп тұрып алды.

⁶ Мұны естіген Пилат: -Сонда бұл адам Ғалилеялық па? - деп сұрады.

⁷ Сөйтіп, Исаның Иродтың билігіне жататын аймақтан шыққанын білгеннен кейін, Пилат Оны сол күндері Иерусалимде жүрген Иродқа жіберді.

⁸ Ирод Исаны көргеніне қатты қуанды, өйткені ол Иса жайында естіп, Оны талайдан бері көргісі келіп, Оның жасаған кереметтерін де көруге құмартып жүрген болатын.

⁹ Ирод Исаға көптеген сұрақтар қойды, алайда Иса оның ешқайсысына да жауап берген жоқ.

¹⁰ Бірінші бас қызметкерлер мен Таурат заңын зерттеушілер сол жерде тұрып, Оны барынша айыптады.

¹¹ Иродтың өзі де әскерімен бірге Исаны қорлап, Оның мазақтап, Оның үстіне алқызыл ашық түсті киім кигізіп, Оны қайтадан Пилаттың өзіне жіберді.

¹² Бір қызығы, Осы уақытқа дейін бір-бірімен жауласып келген Пилат пен Ирод сол күні дос бола қалады.

¹³ Пилат бірінші бас қызметкерлер мен басшыларды және халықты өзіне шақырып алып, оларға былай дейді:

¹⁴ -Сендер Мына Адам халықты азғырып жүр деп, Оны менің алдыма алып келдіңдер. Міне, мен Оның ісін сендердің көз алдарыңда қарап, зерттеп, Оған қарсы тағылған кінәнің ешқайсысын бұл адамнан таба алмадым.

¹⁵ Сонымен қатар, Иродтың өзі де Одан еш нәрсе таппаған соң, Оны бізге қайтадан жіберіп отыр. Өйткені Оның істеген ісінен Оны өлім жазасына кесетіндей еш нәрсе табылмады.

¹⁶ Сондықтан Оны тек жазалап, содан кейін босатып жіберемін, - деді.

¹⁷ * Ал оның мейрамға қарсы абақтыда отырған бір тұтқынды босатып жіберетін әдеті болатын. (кейбір жерлерде осы аят жоқ)

¹⁸ Алайда сол жерде тұрғандардың барлығы: -Мынаны алып кет! Бізге анау Бараббаны босатып бер! -деп айғайлап тұрып алды.

¹⁹ Ал Барабба деген адам қалада бүлік шығарып, кісі өлтіргені үшін, абақтыға түскен болатын.

²⁰ Пилат Исаны босатып жібергісі келіп, оларға тағы да даусын көтеріп, сөйлей бастағанда:

²¹ -Оны айқышқа шегеле! Оны айқышқа шегеле! -деп олар қатты айғайлап қоймады.

²² Сол кезде Пилат олардан үшінші рет сұрады: -Мынау сонда қандай зұлымдық істеді? Мен Оны өлім жазасына кесетіндей ешбір кінә таппай тұрмын, сондықтан Оны тек жазалап, босатып жіберемін, - деді.

²³ Ал Олар одан бетер қатты айғайлап, Оның айқышқа шегеленуін талап етіп тұрып алды. Ақырында олар өздерінің айғайымен дегендеріне жетті.

²⁴ Олардың бұл талаптарын жүзеге асыру үшін, Пилат шешім қабылдады.

²⁵ Оларға бүлік шығарып әрі адам өлтіргені үшін абақтыға жабылған адамды босатып береді де, Исаны олардың талабына сай жазаға тартады.

²⁶ Олар Исаны алып бара жатып, өзінің егістік жерінен келе жатқан киринеялық Шимон деген біреуді ұстап алып, Исаның айқышын арқалатады да, оны Исаның соңынан жүргізіп қояды.

²⁷ Олардың соңынан көптеген халық және әйелдер еріп отырды, олар Оған жоқтау айтып, еңіреп жылап келе жатты.

²⁸ Сонда Иса оларға бұрылып: -Иерусалимнің қыздары, Мен үшін қайғырып, жыламаңдар, тек өздерің мен балаларың үшін жылаңдар.

²⁹ Бедеу, бала көтермеген және бала емізбеген әйелдер бақытты!» - деп айтылатын күндер туады.

³⁰ Сол кезде адамдар тауларға: «Біздің үстімізге құлаңдар!» -деп, ал төбелерге: «Бізді жаба тұрыңдаршы!» -деп айтатын болады,

³¹ өйткені жасыл желектей болған ағашқа осылай істеп жатса, онда қураған ағашпен не болмақ? - деді.

³² Исамен бірге өлім жазасына кесілген екі қарақшыны да қоса алып жүрді.

³³ Сонымен, олар Маңдайтөбе (Бас сүйек) деп аталатын жерге келген соң, Исаны айқышқа шегеледі, әлгі екі қарақшының біреуін Оның оң жағына, екіншісін Оның сол жағына айқышқа шегелеп, іліп қойды.

³⁴ Сол кезде Иса: -Әке, олардың осы істеп жатқан істерін кешіре гөр, өйткені олар не істеп жатқандарын білмейді, -деді. Сарбаздар өзара жеребе тастап, оның киімдерін бөлісумен болды.

³⁵ Халық осының бәрін көріп тұрды. Басшылар Оны мазақтап: -Басқаларды құтқарып алды! Егер де Ол Құдай таңдап алған Мәсіх болса, енді Ол Өзін-Өзі құтқарып алсын! - деп кекетті.

³⁶ Сарбаздар да Оны мазақтап, Исаның қасына барып, Оған сірке суы ұсынып тұрып:

³⁷ -Егер де Сен яһудейлердің Патшасы болсаң, онда Өзіңді-Өзің құтқарып алшы! - деп келекеледі.

³⁸ Өйткені Оның бас жағына: «Бұл-яһудилердің Патшасы», -деген жазу жазып қойған еді.

³⁹ Онымен бірге айқышқа шегеленген қарақшының біреуі де Оған тіл тигізіп: -Сен Мәсіх емессің бе? Өзіңді де, бізді де құтқарсаңшы! - деді.

⁴⁰ Сонда екіншісі оған жауап қатып, әлгіні сөгіп: -Сен Құдайдан қорықпайсың ба? Сен де осы үкімге кесілдің емес пе?

⁴¹ Біз өзіміздің істеген істерімізге лайықты болғандықтан, жазаланып тұрмыз, ал Ол ешбір жамандық істеген жоқ, -деді.

⁴² Осыдан кейін ол: -Иса, Өз Патшалығыңа барғанда, мені есіңе алшы, - деді.

⁴³ Иса оған: -Саған шындықты айтып тұрмын, сен бүгін Менімен бірге жұмақта боласың, - деді.

⁴⁴ Сол уақыт шамамен күндізгі сағат алтының кезі болатын, содан сағат тоғызға дейін, бүкіл жерді қара түнек басып,

⁴⁵ күн де жоғалып кетті, киелі бөлменің шымылдығы ортасынан төмен қарай қақ айырылды.

⁴⁶ Сол кезде Иса қатты айғайлап: -Әке, Сенің қолыңа рухымды тапсырамын! -деді. Осылай деген соң, Ол жан тапсырды.

⁴⁷ Осыны көріп тұрған жүзбасы Құдайды мадақтап: -Мына Адам, шынымен, әділетті болған екен! - деді.

⁴⁸ Осы өлім жазасын көруге жиналған бүкіл халық болған жағдайдан соң, өкініштен кеуделерін ұрғылап, үйлеріне қайтып жатты.

⁴⁹ Исаның таныстарының бәрі және Ғалилея жақтан Оның артынан еріп келген әйелдер де осы болып жатқан жағдайды алыстан қарап тұрды.

⁵⁰ Міне, сол жерде Жүсіп есімді бір ер адам болды. Ол сол кездегі кеңесшілер алқасының мүшесі еді, өзі адал әрі әділетті адам болатын.

⁵¹ Негізі, ол кеңесшілер алқасының кеңесімен де, олардың істерімен де келіспеген. Ол Құдай патшалығын күтіп жүрді және яһудейлердің Араметия деп аталатын қаласында тұратын.

⁵² Осы адам Пилатқа барып, Исаның денесін одан сұрап алды.

⁵³ Оны айқыштан түсіріп алып, Оны жұқа матамен орап, әлі ешкімнің денесі жерленбеген, жартастан ойып жасалған бір қабірге апарып қойды.

⁵⁴ Бұл сол дайындық күні, яғни сенбінің таңы атып келе жатқан кез болатын.

⁵⁵ Исаның соңынан сонау Ғалилея жақтан еріп келген әйелдер де Жүсіптің артынан еріп, Исаның денесінің қайда қойылғанын көрді.

⁵⁶ Олар сол жақтан қайтып келген соң, жұпар иісті заттар мен Исаның денесіне жағатын мүр майын дайындап қойды, себебі сенбі күні Таурат заңының өсиетіне сай, оларда демалыс болатын.