Лұқа 21 - Zhana Osiet

¹ Иса байлардың сый-тартуларын әкеліп, оны құрбандық сандығына салып жатқан сәттеріне назар аударды.

² Сол кезде өзі кедей, жесір бір әйелдің екі күміс тиынын (екі лепта) әкеліп, сандыққа салып жатқанын көрді.

³ -Сендерге шындықты айтайын, мына жесір әйел бәрінен де көп салды.

⁴ Себебі көбі өздерінен артылғандарын салды, ал мына әйел өзіне жетпей тұрса да, өзіндегі бардың бәрін салды, -деді.

⁵ Содан кейін әдемі тастармен қаланған және құрбандыққа келген қымбат заттармен әрленген ғибадатхана туралы айтып тұрған кейбіреулерге Иса былай деді:

⁶ -Мына өздерің көріп тұрған тастардан бірде-бір тас қалмай, қирайтын күн туады.

⁷ Сонда олар: -Ұстаз, осы нәрсе қай кезде болады және оның болатынын алдын ала қандай белгілер арқылы білуге болады? - деп сұрады Исадан.

⁸ Сол кезде Иса оларға: -Алданып қалып жүрмеңдер, байқаңдар, өйткені Менің атымды көбі жамылып келіп: «Бұл-Мен, уақыт жақындап қалды», -дейтін болады. Ондайлардың соңынан еруші болмаңдар!

⁹ Сырттай болып жатқан соғыстар мен жөнсіз тәртіпсіздіктер жайында еститін боласыңдар, қорықпаңдар, өйткені алдымен осылар болуы тиіс, бірақ бұл әлі де соңы емес, - деді.

¹⁰ Содан кейін Иса оларға: -Халық халыққа, патшалық патшалыққа қарсы көтеріліп,

¹¹ қатты жер сілкіністері болады, кейбір жерлерге аштық пен жұқпалы індеттер тарап, аспанда үлкен кереметтерді білдіретін белгілер пайда болады.

¹² Осы нәрселер болардың алдында қысым көрсетіп, сендерді қудалайтын болады. Сендерді синагогаларға апарып, абақтыға жаптырып, Менің атыма бола патшалар мен жергілікті билік иелерінің алдына апаратын болады.

¹³ Міне, сол кезде Мен туралы куәлік айтатын мүмкіндік туады.

¹⁴ Сонда жүректерің мазасыз күйге түспесін, өздеріңді алдын ала ақтаудың қамын ойламаңдар,

¹⁵ өйткені Мен сендер сөйлеген сәтте, қарсыластарыңның ешқайсысы сендерге қарсы сөйлей алмайтындай және қарсы тұрмайтындай даналық дарытамын.

¹⁶ Сол кезде сендерді өздеріңнің ата-аналарың, бауырларың, туыстарың мен достарың да сатып кетеді, ал кейбіреуіңді, тіпті, өлімге дейін душар етеді.

¹⁷ Сөйтіп, Менің атыма бола бәрі сендерді жеккөретін болады,

¹⁸ бірақ бір тал шаштарың да бастарыңнан түспейді.

¹⁹ Тек табанды болсаңдар ғана өз өмірлеріңе өздерің ие боласыңдар.

²⁰ Иерусалимді әскерлер қоршап алғанын көрген кезде, оның қаңырап бос қалатын мезгілінің жақындағанын білесіңдер.

²¹ Сол кезде Яһудеяда тұрып жатқандар тауға қашсын, ал екі ортада қалғандар одан шығып алысқа кетсін, қаланың сыртында жүргендер болса, қалаға кірмесін,

²² өйткені бұл күндер жазалайтын кез болғандықтан, Жазбада жазылғанның бәрі орындалуы тиіс.

²³ Сол күндері аяғы ауыр және бала емізетін әйелдер қасіретке қалады, өйткені жер бетінде болатын үлкен зорлық-зомбылықта ауыртпалық осы халықтың басына түседі.

²⁴ Сонда семсердің жүзінен аман қалғандардың бәрі өзге ұлттардың қолына тұтқынға түседі, сол өзге ұлттарға берілген уақыт аяқталғанша, Иерусалим солардың аяқтарында тапталып, олардың қол астында болады.

²⁵ Сол кезде күн мен айдың және жұлдыздардың бетінде ерекше бір белгілер пайда болып, теңізден шыққан шудың дыбысынан жерде өмір сүретін өзге ұлттардың естері шығып, түсініксіз жағдайға тап болады.

²⁶ Ал аспан күштері шайқалған кезде, адамдарды қорқыныш билеп, олар жер бетіне келетін апатты күтіп, естерінен танатын болады.

²⁷ Міне, сол кезде Өзінің құдіретті күшімен және Өзінің ұлы даңқына бөленіп, бұлттың үстімен келе жатқан Адам Ұлын көреді.

²⁸ Осы нәрселер орындала бастаған кезде бойларыңды жазып, бастарыңды көтеріңдер, өйткені сендер азаттыққа ие болатын мезгіл таяп қалды, - деді.

²⁹ Осыдан кейін Иса оларға астарлы әңгіме айтып берді. -Інжір ағашына және бүкіл ағаштарға қараңдаршы.

³⁰ Олардың бүр жара бастаған кездерін көргенде, жаздың жақындап қалғаны белгілі болады.

³¹ Сол сияқты болып жатқан осы құбылыстарға қарап, Құдай Патшалығының да жақындап қалғанын білуге болатынын ұғып алыңдар.

³² Сендерге шындықты айтайын: осының бәрі орындалуы тиіс, соған дейін осы ұрпақ жойылмайды, жоғалмайды.

³³ Аспан мен жер де жойылатын болады, алайда Менің сөздерім еш жойылмайды.

³⁴ -Сендердің жүректерің жүгенсіздік пен маскүнемдікке, күйбің тірліктің қамына беріліп кетпесін, содан сақ болыңдар, қапылыста келетін сол күн сендерге

³⁵ тұзақ сияқты болып жүрмесін, өйткені сол күн бүкіл жер жүзіндегі адамдардың бәрінің басына түседі.

³⁶ Осы нәрсе өздеріңнен аулақ болсын десеңдер және Адам Ұлының алдында нық тұрғыларың келсе, әр уақытта мінәжат етіп, сергек жүріңдер.

³⁷ Иса күн сайын осылай ғибадатханада тәлім берді, ал кешке Зәйтүн тауына барып, түнді сонда өткізіп жүрді.

³⁸ Барлық адамдар Оны тыңдау үшін, таң атпай ерте тұрып, ғибадатханаға келетін.