Лұқа 20 - Zhana Osiet

¹ Сол күндердің бірінде Иса ғибадатханада халыққа тәлім беріп, Ізгі хабарды жариялап жатқан кезде, бірінші бас қызметкерлер мен Таурат заңын зерттеушілер және ақсақалдар сол жерге келді.

² Олар Исадан: -Осы нәрселерді Сен қандай билікпен істеп жүрсің және Саған осы билікті кім берді? Осыны бізге айтып берші, - деп сұрайды.

³ Сонда Иса оларға былай деп жауап қатты: -Мен де сендерден бір нәрсе сұрайын. Сендер Маған мынаны айтып беріңдерші.

⁴ -Жақияның суға батырып шомылдыруы Көктен болды ма әлде адамдардан болды ма?

⁵ Осы кезде олар өзара ақылдасып: «Егер де ол Көктен болды деп айтсақ, онда Ол: -Сендер неліктен оған сенбедіңдер? - деп айтып жүрер.

⁶ Ал егер де: «Адамдардан болды», -деп айтсақ, онда бүкіл халық бізді таспен атқылайтын болады, өйткені олар Жақияның пайғамбар болғанына толық сенеді емес пе?» - деді. Сонда олар:

⁷ - Оның қайдан екенін білмейміз, - деп жауап берді.

⁸ -Онда Мен де сендерге бұл істі қандай билікпен істеп жүргенімді айтпаймын, - деді Иса оларға.

⁹ Осыдан кейін Ол халыққа мына бір астарлы әңгімені айтып берді. -Бір адам жүзім бағын отырғызады. Оны жүзімшілерге жалға береді де, өзі басқа жаққа ұзақ уақытқа кетіп қалады.

¹⁰ Сол жүзімдіктен өзіне тиесілі өнімін алатын уақыт келген кезде, әлгі жүзімшілерге өзінің құлын жібереді, ал жүзімшілер оны ұрып-соғып, бос қайтарады.

¹¹ Одан кейін оларға өзінің екінші құлын жібергенде, олар оны да ұрып-соғып, қорлап, оны да құр қол қайтарады.

¹² Енді ол өзінің үшінші құлын жібереді, олар оны да жаралап, айдалаға лақтырып тастайды.

¹³ Бұдан кейін жүзімдіктің иесі: «Мен енді не істеуім керек? -деп ойланады да, -мен енді оларға Өзімнің сүйікті ұлымды жіберейін, олар, мүмкін, одан ұялатын шығар», - дейді.

¹⁴ Алайда әлгі жүзімшілер оның ұлын көргенде бір біріне: «Бұл-нағыз мұрагер, оның мұрасын өзімізге қалдыру үшін, оны өлтіріп тастайық», - деседі.

¹⁵ Сөйтіп, олар оны жүзімдіктің сыртына алып шығып, өлтіріп тастайды. Енді жүзімдіктің иесі оларға не істейді?

¹⁶ Ол келеді де, жүзімшілердің көзін құртып, жүзімдігін басқаларға береді, -деді. Осыны естіп тұрғандар: -Бұлай болмай-ақ қойсын! - деп айғай салды.

¹⁷ Сонда Иса оларға қарап тұрып: -«Үй салып жатқан құрылысшылар жарамсыз деп қабылдамай қойған тас енді басты іргетасқа айналды», -деп Жазбада жазылған сөздің мағынасы нені білдіреді?

¹⁸ Сол тасқа құлаған әркімнің күл-талқаны шығады, егер сол тас біреуге құлайтын болса, ол оны басып қалып, жоқ қылады, - деді.

¹⁹ Таурат заңын зерттеушілер мен бірінші бас қызметкерлер сонда ғана бұл астарлы әңгіменің бір ұшы өздеріне тигізіп айтылғанын түсініп, сол сәтте Исаға қол жұмсамақ болады, алайда сол жердегі халықтан қорқады.

²⁰ Олар Исаны мұқият бақылай жүріп, Оны сөзінен ұстап, басшылар мен билік өкілдеріне тапсырмақ ниетпен өздерін әділ етіп көрсете алатын арнайы тыңшыларын жіберді.

²¹ Сонда олар Исадан: -Ұстаз, Сен дұрыс айтып, дұрыс үйрететініңді біз білеміз. Ешкімнің бет-жүзіне де қарамайсың, себебі Құдай жолындағы шындыққа үйретіп жүрсің.

²² Рим патшасына төленетін алым-салықты бізге төлеу қажет пе әлде қажет емес пе? - деп сұрады.

²³ Олардың бұл ойларында бір арамдықтың жатқанын түсіне қойған Иса оларға:

²⁴ -Маған бір күміс ақшаны көрсетіңдерші, ондағы сурет пен жазу кімдікі? -дейді. -Рим патшасынікі, -дейді олар.

²⁵ -Ендеше Құдайдікін Құдайға, Рим патшасынікін Рим патшасына беріңдер, - деді Иса оларға.

²⁶ Олар халық алдында Оны сөзінен ұстай алмады және Оның берген жауабына таңданып, үнсіз қалды.

²⁷ Қайта тірілу жоқ деп санайтын саддукейлердің арасынан келген кейбіреулері Исадан:

²⁸ -Ұстаз, егер де біреудің бауыры қайтыс болып, оның әйелі одан бала көтермесе, онда сол бауырының ұрпағын жалғастыру үшін, сол әйелге оның келесі бір бауырының үйленуін Мұса жазып кеткен.

²⁹ Бірге туған жеті ағайынды жігіт болған екен, солардың біріншісі әйел алып, одан бала көрмей қайтыс болыпты.

³⁰ Сөйтіп, екінші бауыры да,

³¹ одан кейін үшінші бауыры да сол бір әйелге үйленіпті, сөйтіп, сол жетеуі де осы жағдайға ұшырап, жаңағы әйелден бала сүймей өтіп кетіпті.

³² Уақыты келіп, сол әйел де қайтыс болады.

³³ Кейін қайта тірілу болған кезде, осы әйел әлгі жетеуінің қайсысына әйел болады? Өйткені олардың жетеуі де әлгі әйелмен тұрды ғой, - дейді.

³⁴ Сонда Иса оларға: -Осы заманның адамдары да үйленіп, тұрмыс құратын болады.

³⁵ Ал болашақта қайта тірілу заманы келген кезде, олар не үйленбейді де, не тұрмыс та құрмайтын болады,

³⁶ өйткені, олар енді өлмейтін болғандықтан, енді олар тек періштелер сияқты болып қалады әрі олар қайта тірілгеннен кейін Құдайдың балалары болып саналмақ.

³⁷ Өлгендердің қайта тірілетіні жайында Мұса тікенді бұта оқиғасымен көрсетіп, Құдайды: «Ыбырайымның Құдайы, Ысқақтың Құдайы, Жақыптың Құдайы», -деп атады.

³⁸ Сондықтан Құдай өлгендердің емес, керісінше, Ол-тек тірілердің Құдайы, өйткені бәрі тек Сол арқылы өмір сүретін болады.

³⁹ Таурат заңын зерттеушілердің кейбіреулері: -Ұстаз, Сіз өте жақсы айттыңыз! - деді Исаға.

⁴⁰ Осыдан кейін олардың ешқайсысының Одан бір нәрсе сұрауға батылдары бармады.

⁴¹ Осыдан кейін Иса олардан: -Мәсіх Дәуіттің Ұлы деп неге айтылып жүр? - деп сұрады.

⁴² Өйткені Дәуіттің өзі жазған Зәбүр жырларында: «Ием менің Иеме: - Сенің жауларыңды Сенің

⁴³ аяғыңның астына салып беретін кезге дейін, Менің оң жағымда отыр», - деп айтып кеткен болатын.

⁴⁴ Сонымен, Дәуіттің өзі Оны «Ием» деп айтып тұрса, Ол қалайша Дәуіттің Ұлы болады? - дейді.

⁴⁵ Өзін тыңдап отырған бүкіл халықтың алдында Иса Өзінің шәкірттеріне:

⁴⁶ -Ұзын шапандарын киіп алып, қыдыруды ұнататын және сауда орындарында жүріп, адамдардың сәлемдескен қалайтын, синагогаларда алғашқы қатарда отырғанды, кешкі аста төрге жайғасқанды жақсы көретін Таурат заңы зерттеушілерінен сақ болыңдар.

⁴⁷ Олар жесірлердің үйін ішіп-жеп, жұрттың көзіне түсу үшін ұзақ мінәжат етеді, алайда олар ең ауыр жазаға тартылатын болады, - деді.