Лұқа 19 - Zhana Osiet

¹ Иса Иерихонға кіріп, сол қаланың ішімен өтіп бара жатты.

² Міне, сол қалада салық жинаушылардың басшысы, өзі бай Зақай есімді бір адам болды.

³ Ол да Исаның Кім және қандай екенін көру үшін, Оған жетудің жолдарын іздеді. Алайда халық көп болғандықтан, ол Исаны көре алмады, өйткені оның бойы тым аласа болатын.

⁴ Сонда ол Исаны көремін деп, алға қарай жүгіріп барып, жол бойында өсіп тұрған тұт ағашына шығып алды, Иса сол жолмен өтіп келе жатқан болатын.

⁵ Иса сол жерге келген кезде, жоғарыға оған қарап тұрып: -Зақай, тезірек төмен түс, бүгін Мен сенің үйіңде қалуым керек, бұл Маған қажет болып тұр, - деді.

⁶ Сонда ол тездетіп төмен түсіп, аса бір қуанышпен Исаны қарсы алды.

⁷ Ал осыны көргендер: -Ол күнәкар адамның үйіне барамын, сонда қаламын дейді, - деп күңкілдей бастады.

⁸ Зақай орнынан тұрып, Иемізге: -Ием, енді осы дүние -мүлкімнің тең жартысын кедейлерге беремін, ал егер де мен біреуді алдап, оның ақысын жеген болсам, соны оған төрт есе етіп қайтарамын, - дейді.

⁹ Сол кезде Иса оған: -Бүгін осы үйге құтқарылу келді, өйткені ол да - Ыбырайымның ұлы.

¹⁰ Адам Ұлының келген мақсаты-өлгендерді іздеп тауып, оларды құтқару.

¹¹ Осыны естіп тұрғандарға Иса мына бір астарлы әңгімені қоса айтып берді. (Себебі Оның Иерусалимге жетуіне өте аз қалған еді, сондағы адамдар енді осы уақыттан бастап, Құдай Патшалығының кезеңі орнайтын болады деп болжайтын).

¹² Сондықтан Иса оларға былай деді: -Бір атақты адам өзіне тиесілі патшалықтың билігін алып қайту үшін, алыс бір елге баруға жиналады.

¹³ Өзінің қол астында жүрген он құлын шақырып алады да, оларға (бір минде күмістің салмағымен есептегенде 436 гр күміс болған) он миндік күміс ақша беріп: «Мен қайтып келгенше, осыны іске салыңдар, ол пайда әкелетін болсын», - деп тапсырып кетеді.

¹⁴ Бірақ сол елдің азаматтары Оны жеккөретін, сондықтан: «Біздің үстімізден Оның патшалық құрғанын қаламаймыз», -деп айтқызып, оның соңынан елші жібереді.

¹⁵ Алайда ол тиісті патшалықтың билігін алып қайта оралады да, өзі күміс ақша беріп кеткен құлдарының одан қандай пайда түсіргенін білгісі келіп, оларды өзіне шақыртып алады.

¹⁶ Сонда біріншісі келіп: «Ием, он миндік күміс ақшаң, тағы да он миндік табыс әкелді», - дейді.

¹⁷ Оған патша: «Жарайсың, жақсы қызметкер екеніңді көрсеттің, өйткені кішкентай нәрсеге адал болдың, енді он қаланың үстінен қарайтын билеуші боласың», - дейді.

¹⁸ Одан кейін екіншісі келіп: «Ием Сенің күміс ақшаң (минің) бес миндік табыс әкелді», - дейді.

¹⁹ Ол оған да: «Сен де бес қаланың үстінен қарайтын боласың», - дейді.

²⁰ Одан кейін үшіншісі келіп: «Ием, міне, сенің күміс ақшаң (минің), мен оны бөлек орамалға түйіп сақтап қойдым.

²¹ Мен бір жағынан сенен қорықтым, өйткені сен-өте қатал адамсың. Сен өзің қоймаған жерден алып, өзің екпеген жерден орасың», - дейді.

²² Сонда патша оған: «Ей, жарамсыз құл! Сені аузыңнан шыққан өз сөздерің арқылы соттайтын боламын. Себебі сен Менің өзім қоймаған жерден алып, өзім екпеген жерден орып алатынымды білдің емес пе?

²³ Онда сен неге менің күмісімді ақша ауыстыратындарға апарып бермедің? Мен қайтып келген кезде оның үстінен түсетін түсімге ие болатын едім ғой», - дейді.

²⁴ Содан кейін қасында тұрғандарға: «Мынадағы күміс ақшаны алып, оны он күміс ақшасы барға беріңдер!» -дейді

²⁵ Сонда қасындағылар оған: «Қожайын, оның он күміс ақшасы бар емес пе?» - деген кезде қожайын:

²⁶ «Сендерге айтарым мынау: кімде бар болса, соған тағы да беріледі, ал кімде жоқ болса, одан оның бар дегені алынып қойылады.

²⁷ Ал енді маған жау болып, өздерінің үстінен менің патшалық құрғанымды қаламағандарды осында, менің алдыма әкеліп, оларды қырып тастаңдар!» - дейді.

²⁸ Осыны айтып болған соң, Иса алға шығып, Иерусалимге қарай өрлеп бара жатты.

²⁹ Сөйтіп, Ол Бетфаге мен Бетанияға жақын Зәйтүн тауы деп аталатын жерге жеткен кезде, Ол екі шәкіртін алға жіберіп, оларға былай деді:

³⁰ -Қарсы алдымызда жатқан ауылға барыңдар, сол ауылға кірген соң, ещбір адам әлі мінбеген және байлаулы тұрған тайқар есекті тауып алып, оны шешіп, осында алып келіңдер.

³¹ Егер біреу сендерден: «Оны не үшін шешіп алып жатырсыңдар?» -деп сұрайтын болса: «Иемізге қажет болып тұр», - деп айтыңдар.

³² Сонда әлгі жіберген шәкірттері барып, Исаның оларға айтқанындай бәрін тауып алады.

³³ Содан олар есекті шешіп жатқан кезде, оның қожайыны оларға: -Есекті не үшін шешіп алып жатырсыңдар? -дейді.

³⁴ -Ол біздің Иемізге қажет болып тұр, -деп олар жауап берді.

³⁵ Олар тайқар есекті Исаға алып келген соң, оның үстіне өз киімдерін салып, үстіне Исаны мінгізді.

³⁶ Содан кейін Оның жүретін жолына өздерінің киімдерін төсей бастады.

³⁷ Олар Зәйтүн тауының етегіне қарай түсе берген кезде, Оның шәкірттерінің көпшілігі өздері осы уақытқа дейін көріп келген Құдайдың барлық құдіретті күшіне қуанып, қатты дауыспен Құдайды дәріптей бастады:

³⁸ -Иеміздің атынан келген Патша жарылқансын! Көкте бейбіт тыныштық, ал одан жоғары тұрғандарға аса құрмет!

³⁹ Сол кезде халықтың арасында жүрген кейбір фарисейлер Исаға: - Ұстаз! Өзіңнің шәкірттеріңе тыйым сал! - деді.

⁴⁰ Сонда Иса оларға: -Сендерге мынаны айтамын: егер де олар үндемейтін болса, онда тастар айғай салатын болады, -деді.

⁴¹ Содан кейін Ол қалаға жақындап, оны көрген кезде жылап, былай деді:

⁴² -Шіркін, егер де сен өзіңе осы күннің тыныштық әкелетінін білсең ғой! Алайда сол күн енді сенің көзіңнен таса болып, саған көрінбей қалатын болады.

⁴³ Сенің жауларың саған қарсы бекініс құрып, сені жанжағыңнан қоршап, қыспаққа алатын күн туады.

⁴⁴ Өйткені сен өзіңді құтқарып алатын уақыттың келгенін білгің келмеді, сондықтан олар сенің еш нәрсеңді қалдырмай қиратып, балаларыңды құртып, сенің тастарыңнан бірдебір тас қалдырмайды, -деп жүрегіндегі күйінішін білдірді.

⁴⁵ Иса ғибадатханаға кірген соң, ондағы сатушыларды қуа бастады. Оларға:

⁴⁶ -«Менің үйім мінәжат ететін үй болады», -деп Жазбада жазылған, -ал сендер оны қарақшылардың ордасына айналдырып алғансыңдар.

⁴⁷ Осыдан кейін Иса күн сайын ғибадатханада тәлім беріп жүрді. Бірінші бас қызметкерлер мен Таурат заңын зерттеушілер, халықтың зиялылары бірігіп, Оны өлтірудің жолдарын іздей бастады.

⁴⁸ Алайда халық Исаны мұқият тыңдап, Оның қасынан айналып шықпай қойғандықтан, олар Исаға еш нәрсе істей алмады.