Лұқа 18 - Zhana Osiet

¹ Содан кейін Иса қандай жағдай болса да, әрдайым мінәжат етіп, жабығудан аулақ болуды білдіретін мына бір астарлы әңгімені шәкірттеріне айтып берді.

² -Белгісіз бір қалада не Құдайдан қорықпайтын, не адамнан ұялмайтын бір би болыпты.

³ Сол қалада: «Мені дұшпандарымнан қорғашы!» -деп үнемі жалынып, биге келетін бір жесір әйел тұрады екен.

⁴ Алайда әлгі би сол әйелді көп уақытқа дейін қорғағысы келмей жүреді, сосын бір күндері ол өзіне-өзі: «Мен не Құдайдан қорықпаймын, не адамнан ұялмаймын.

⁵ Мына бір жесір әйел әбден менің мазамды алып болды. Енді бұдан былай тағы да келіп мені мазаламас үшін, сол жесір әйелді қорғап, маған қайта келмейтіндей етіп одан құтылайын», - дейді.

⁶ Сонда Иеміз оларға: -Әділетсіз бидің не айтқанын естідіңдер ғой?

⁷ Ал Құдайдың Өзі таңдап алғандары Оның алдына келіп, күні -түні жалбарынған кезде, Ол оларға шыдамдық көрсете алмай ма?

⁸ Мен сендерге мынаны айтамын: Ол тез арада жауап беруге де және қорғауға да асығатын болады. Дегенмен, Адам Ұлы келген кезде, сондай сенімді жер бетінен таба алар ма екен? - деді.

⁹ Тек өздерін ғана әділміз деп санап, ал басқаларға менсінбей қарайтындарға Иса тағы да мына бір астарлы әңгімені айтып берді.

¹⁰ -Құдайдың үйіне екі адам сиынуға келіпті, оның біріфарисей, екіншісі салық жинаушы екен.

¹¹ Фарисей өзі туралы іштей: «О, Құдай, басқа адамдар сияқты болмағаным үшін Саған алғыс айтамын, өйткені мен не тонаушыларға, не әділетсіздерге немесе неке адалдығын бұзатындарға, не мына салық жинаушыға ұқсамаймын.

¹² Өйткені мен аптасына екі рет ораза ұстаймын және қанша табыс тапсам, содан ондық беремін», -деп сиыныпты.

¹³ Ал салық жинаушы болса, алыста тұрып, көзін көкке де көтермей: «О, Құдайым, мына мендей күнәкарға мейіріміңді түсіре көрші», -деп кеудесіне қолын қоя сиыныпты.

¹⁴ Тек осы адам ғана үйіне ақталып қайтқанын сендерге айтамын. Өйткені кімде-кім өзін-өзі жоғары көтеретін болса, сол төмендетіледі, ал кімде-кім өзін төмен тұтса, сол жоғарылатылады.

¹⁵ Иса қолын қойсын деп, адамдар Оған балаларын да алып келіп жатты. Бірақ Исаның шәкірттері олардың осы әрекетін көріп, оларға тыйым сала бастады.

¹⁶ Сонда Иса оларды шақырып алып: -Балаларды Маған жіберіңдер, олардың Маған келуіне кедергі болмаңдар, өйткені Құдайдың Патшалығы осындай бала секілді болғандарға арналған.

¹⁷ Сендерге шындықты айтайын: егер де кімде-кім Құдай Патшалығын осы балалар секілді қабылдамайтын болса, ол Оған кіре алмайды, - деді.

¹⁸ Сол кезде бір басшы Исадан: -Мейірімді Ұстаз, мәңгілік өмірге ие болу үшін менің не істеуім қажет? -деп сұрады.

¹⁹ -Мені мейірімді деп не үшін айттың? -деді Иса оған. -Жалғыз Құдайдан басқа ешкім де мейірімді емес.

²⁰ «Неке адалдығын бұзба», «кісі өлтірме», «ұрлық жасама», «жалған куәлік берме», «өз әкең мен анаңды құрметте» деген өсиеттерді білесің ғой, - деді.

²¹ Осы айтқандардың бәрін мен жас кезімнен бері сақтап келемін, - деді ол.

²² Осыны естіген Иса: -Онда сен іске асыратын бірақ нәрсе қалды. Қанша дүние-мүлкің болса, соның бәрін сатып, кедейлерге үлестіріп бер, сонда сенің қазынаң көкте болады. Ал өзің қайтып келіп, Менің соңымнан ер, -деді оған.

²³ Мұны естіген ол қатты қапаланады, өйткені ол өте бай адам болатын.

²⁴ Оның қатты қайғырғанын көрген Иса: -Байлығы мол адамдардың Құдай патшалығына кіруі қандай қиын!

²⁵ Бай адамның Құдай патшалығына кіргенінен гөрі, иненің көзінен түйенің өткені жеңілірек болатын шығар.

²⁶ Сонда осыны естіп тұрғандар: -Сонда кім құтқарылады? -деді.

²⁷ -Адамдарға мүмкін емес нәрсе тек Құдайға ғана мүмкін, - деді Иса оларға.

²⁸ Сол кезде Петір: -Міне, біз өзімізге қажетті нәрселердің бәрін тастап, Сенің соңыңнан еріп жүрміз, - деді.

²⁹ -Сендерге шындықты айтайын: Құдай патшалығы үшін өзінің үйін немесе әйелін, не ағалары мен інілерін, не ата -анасын, не балаларын қалдырып кеткендер болса,

³⁰ қазіргі уақытта соларды молынан ала алмаса да, келешекте мәңгілік өмірге ие болып қалады, -деді Иса оларға.

³¹ Осыдан кейін Иса Өзінің он екі шәкіртін жеке шығарып алып: -Міне, енді біз Иерусалимге қарай өрлеп келеміз, себебі Адамның Ұлына қатысты пайғамбарлар не жазған болса, соның бәрі орындалуы тиіс.

³² Сондықтан Оны өзге ұлттардың өкілдеріне ұстап береді, ал олар Оны қорлап әрі мазақ қылып, Оның бетіне түкіріп,

³³ Оны қамшымен сабап, содан кейін Оны өлтіреді. Алайда үшінші күні Ол қайта тірілетін болады, - деді.

³⁴ Алайда олар осы айтылған нәрсенің ешқайсысын түсінген жоқ, себебі осы сөздің мағынасы оларға ашылмады. Осы нәрсе оларға жасырын болғандықтан, олар не айтылғанын түсінген жоқ.

³⁵ Иса Иерихонға таяп қалғанда, жол бойында қайыр тілеп, бір зағип адам отырды.

³⁶ Өзінің қасынан көп халықтың өтіп бара жатқан шуылын естіген ол: -Бұл не болды екен? -деп сұрағанда, оған:

³⁷ Келе жатқан - Назареттік Иса, - деді.

³⁸ Сол кезде ол: -Дәуіттің Ұлы Иса, маған мейіріміңді түсірші! - деп айғайлап жіберді.

³⁹ Алайда топтың алдында кетіп бара жатқандар оған: -Дыбысыңды шығарушы болма! -деп тыйым салды. Сонда ол тағы да: -Дәуіттің Ұлы, маған мейіріміңді түсірші! -деп одан бетер айғайлады.

⁴⁰ Сонда Иса тоқтай қалып: -Оны Маған алып келіңдер, -деп бұйырды. Ол жақындап келгенде, Иса одан сұрады:

⁴¹ -Менің саған не істегенімді қалайсың? -Ием, көзімнің ашылғанын қалаймын, - деді сонда әлгі зағип адам.

⁴² Иса оған: -Көзің ашылсын! Сені сенімің құтқарды, -деді.

⁴³ Сол сәтте -ақ оның көзі ашылып, көретін болды, сонда ол Құдайды мадақтаған күйі, олардың артынан еріп, олармен бірге кетті. Ал осыны көріп тұрған бүкіл халық бар мадақты Құдайға арнады.