Лұқа 17 - Zhana Osiet

¹ Иса Өзінің шәкірттеріне былай деді: -Азғырылуға еріп, күнәнің жетегінде жүретін кездің болмауы мүмкін емес, алайда сол азғырылу кімнен келсе, сол қасіретке қалады.

² Егер де мына бір кішкентайлардың біреуін азғырып, оларды жолдан тайдыратын болса, онда оның мойнына диірменнің тасын байлап, теңізге лақтырып тастаса, оған сол пайдалы болар еді.

³ Өздеріңе өздерің сақ болыңдар! Егер де бауырың күнә жасап жатса, оған ескерту жаса, ал тәубеге келсе, оның күнәсін кешір.

⁴ Егер ол күніне жеті рет саған қарсы күнә жасап, жеті рет саған келіп, өкініп: «Тәубе етемін», -десе, оны кешір.

⁵ Бірде Оның елшілері Иемізге: -Біздің сенімімізді өсіре гөрші! - дейді.

⁶ Сонда Иеміз оларға: -Егер сендерде қышаның дәніндей сенім болса, онда мына тұрған тұт ағашына: «Тамырыңмен жұлынып, теңізге барып отырғызылатын бол!» -десеңдер, ол сендерге бағынушы еді.

⁷ -Сендердің кейбіреулерің жер жыртып немесе мал бағып даладан келген құлыңа: «Тез бар да, дем ал», -деп айтудың орнына:

⁸ «Кешкі асты дайындап, мен ішіп-жеп болғанша, беліңді буып, маған қызмет көрсет. Содан кейін өзің ішіп-жерсің», -демейсің бе?

⁹ Сонда ол құлына өзінің осы бұйрықтарын орындағаны үшін алғыс айта ма?

¹⁰ Сол себепті сендер де өздеріңе бұйырғандардың бәрін солай орындайтын болсаңдар: «Біз-алғыс алуға тұрмайтын құлмыз, себебі біздің міндетіміз-тек бізге бұйырғанды ғана орындау, біз соны істеуге тырысып жүрміз», -деп айтатын болыңдар.

¹¹ Осыдан кейін Иса әрі қарай Иерусалимге бармақ болды, сондықтан Оған Самария мен Ғалилея өлкесінің ортасынан кесіп өтуге тура келді.

¹² Сөйтіп, Иса бір ауылға кірген кезде, алапеспен ауыратын он ер адам Оған кездесті, сонда олар алыста тұрып,

¹³ қатты дауыстап: -Тәлімгер Иса, бізге аяушылық ете гөрші! - дейді.

¹⁴ Сонда Иса оларға: -Құдайдың үйіндегі қызметкерлерге барып, өздеріңді көрсетіңдер, -дейді. Олар жолда кетіп бара жатқан кезде, алапес ауруынан тазарып, сауығып кетеді.

¹⁵ Алайда олардың арасынан біреуі өзінің сауыққанын көріп, бар дауыспен Құдайды мадақтаған күйі қайтадан кері оралады.

¹⁶ Исаның аяғына етпеттеп жығылып, Оған алғыс айтты. Ол адам самариялық болатын.

¹⁷ -Тазаланғандар он адам емес пе еді? -деп сұрады Иса, -қалған тоғызы қайда?

¹⁸ Басқалары да мына жат жерлік секілді қайтып келіп, Құдайды мадақтай алмағаны ма? - деді.

¹⁹ -Енді орныңнан тұрып бара бер, сені сенімің құтқарды, -дейді Иса самариялыққа.

²⁰ Фарисейлер жақтан келгендер Исадан Құдай патшалығының қашан келетіні туралы сұрады. Иса оларға былай деп жауап берді: -Құдай патшалығы көзге көрінетіндей болып келмейді.

²¹ Ешкім де оны: «Әне, Ол ана жерде» немесе «Ол, міне, мына жерде» деп те айта алмайды, өйткені Ол мына сендердің іштеріңде (араларыңда) болады, - деді.

²² Одан кейін Иса тағы да Өзінің шәкірттеріне: -Адамның Ұлын тым болмаса, күндердің бір күні көрсек деп армандайтын боласыңдар, алайда оны көре алмайсыңдар,

²³ Сол кезде сендерге: «Әне, Ол ана жерде!» немесе «Міне, Ол мына жерде!» деп айтатын болады, сол кезде оларға бармаңдар және не артынан ілеспеңдер.

²⁴ Өйткені Адам Ұлының келетін күні аспанның ана шеті мен мына шетіне дейін жарқ еткен найзағайдың жарқылына ұқсас болады.

²⁵ Алайда Ол, ең алдымен, көп азап шегуі және осы ұрпақ Одан бас тартуы тиіс.

²⁶ Нұхтың кезіндегі күндер қандай болса, Адам Ұлының келетін кезінде күндер дәл солай болады.

²⁷ Нұх кемеге кіретін күнге дейін де адамдар ішіп-жеп, үйленіп, тұрмыс құрды. Содан кейін топан су басып, олардың бәрін құртып жіберді.

²⁸ Луттың кезінде де сондай болды. Адамдар ішіп-жеп, сауда жасап, алып-сатып, егін егіп, үй тұрғызды.

²⁹ Алайда Лут Содомнан шыққан күні аспаннан жаңбырша жауған от пен күкірт олардың бәрін құртып жіберді.

³⁰ Сол сияқты Адам Ұлы қайта келіп, Оның осы әлемге көрінетін күні де осыған ұқсас болады.

³¹ Егер де сол күні біреу үйдің төбесінде болып, заттары үйде қалып қойса, ол соларды аламын деп төмен түспесін. Сол секілді кім далада жүрген болса, өз үйіне қайта оралмасын.

³² Луттың әйелімен болған оқиға естеріңде болсын.

³³ Егер де біреу өз жанын сақтап қаламын деп тырысатын болса, ол одан айырылады, ал кім Мен үшін жоғалтатын болса, ол оны сақтап қалады.

³⁴ Сендерге айтарым: сол түні төсекте жатқан екеудің бірі алынып, екіншісі қалдырылатын болады.

³⁵ Диірменнің басында бірге отырған екі әйелдің біреуі алынып, екіншісі қалдырылатын болады.

³⁶ Екеуі далада болса, оның бірі алынып, ал екіншісі қалдырылатын болады.

³⁷ Сонда олар Исадан: -Ием, бұл қашан болады? -деп сұрайды. Иса оларға: - Өлексе қайда болса, құзғындар да сол жерге жиналатын болады, - деп жауап берді.