Лұқа 16 - Zhana Osiet

¹ Иса өзінің шәкірттеріне былай деді: -Бір бай адамның үй басқарушысы болыпты, сонда оған байдың дүние-мүлкін шашып, ысырап қылды деген айып тағылады.

² Осыдан кейін әлгі бай адам үй басқарушысын шақырып алып: «Мен сен жайында не естіп жүрмін? Үйді қалай басқарып келгенің жөнінде есеп бер, бұдан былай енді сен үй басқарушысы бола алмайсың», - дейді.

³ Сонда әлгі үй басқарушысы өзіне-өзі: «Енді не істесем екен? Қожайыным менен үй басқару міндетін алып қойды. Жер қаза алмаймын, қайыр тілеу-ұят нәрсе.

⁴ Мен осы үй басқару міндетінен босатылғаннан кейін, не істейтінімді білемін, -дейді өзіне-өзі, -олар мені өз үйлеріне қабылдайтын болады».

⁵ Өзінің қожайынына қарыз болып жүрген адамдарды бір-бірден өзіне шақырып алып, біріншісіне: «Менің қожайыныма сен қанша қарызсың?» - деп сұрайды.

⁶ «Жүз күбі май», -дейді ол. Сонда ол: «Тез отыр да, мына қолхатыңды ал, оған елу күбі деп жазып бер», -дейді.

⁷ Осыдан кейін ол басқасына да: «Ал сенің қанша қарызың бар?» -дейді. Сонда ол: «Жүз қанар бидай», -дейді ол. Оған да: «Мына қолхатыңды ал да, оған сексен қанар деп жазып бер», - дейді.

⁸ Сөйтіп, қожайыны әлгі әділетсіз үй басқарушысының осы тапқырлығы үшін оны мақтайды, өйткені осы заманның ұлдары нұрдың ұлдарына қарағанда, өз ісінде өте тапқыр болады.

⁹ Ал Мен сендерге былай деймін: осы әлемдегі байлық әділетсіздік туғызады, ал сендер сол байлықты тиімді пайдаланып, өздеріңе адал болатын достарды тауып алыңдар, өйткені сендердің байлықтарың сарқылса да, олар сендерді өздерінің мәңгілік тұрағына қабылдайтын болады.

¹⁰ Кім кішкентай нәрседе (істе) сенімді болса, сол үлкен нәрседе де сенімді болады, ал кім кішкентай нәрседе сенімсіз болса, ол үлкен нәрседе де сенімсіз болады.

¹¹ Егер де сол әділетсіз байлықтың өзіне адал болмасаңдар, сендердің адал екендіктеріңе кім сенеді?

¹² Егер де басқа біреудің өздеріңе сеніп тапсырған затына адал болмасаңдар, сендерге қажет нәрсені кім береді?

¹³ Ешқандай қызметші екі қожайынға бірдей қызмет ете алмайды, өйткені біреуін жек көріп, ал екіншісін жақсы көретін болады немесе бірін қолдаса, екіншісіне немқұрайлы қарайтын болады. Сондықтан Құдайға да, байлыққа да бірдей қызмет ете алмайсыңдар.

¹⁴ Ал осының бәрін естіп тұрған ақшақұмар фарисейлер Исаны мазақтап, Оған күліп тұрды.

¹⁵ Сонда Иса оларға: -Сендер өздеріңді адамдардың алдында әділетті етіп көрсетіп жүрсіңдер, алайда Құдай сендердің жүректеріңде не бар екенін біледі. Өйткені адамдар нені жоғары бағаласа, сол Құдайдың алдында жексұрын нәрсе болып табылады.

¹⁶ -Жақияға дейін Заң да болды, пайғамбарлар да болды. Одан кейін Құдайдың патшалығы жайында Ізгі хабар да жарияланды, енді оған кіру үшін әркім өзінше күш салып жатыр.

¹⁷ Алайда заңның бір сызығы жойылып кеткеннен гөрі, аспан мен жердің жойылып кетуі оп-оңай болады.

¹⁸ -Кімде-кім өзінің әйелінен ажырасып, басқа біреуге үйленетін болса, сол неке адалдығын бұзады, кімде-кім күйеуінен ажырасқан әйелге үйленетін болса, ол да неке адалдығын бұзады.

¹⁹ -Бір кездері үстіне қызыл матадан қымбат шапан мен қымбат көйлек киіп, өмірінің әр күнін керемет той-думанмен өткізетін бір бай адам өмір сүріпті.

²⁰ Оның қақпасының алдына үсті-басының бәрін жара басқан Елазар атты бір кедейді әкеліп тастайды екен.

²¹ Ол, тым болмаса, әлгі байдың дастарқанынан түскен қоқымдарын жеп тойынуды армандайды. Сол жердің иттері келіп, оның жараларын жалап кетеді екен.

²² Уақыты келіп, әлгі кедей қайтыс болады, сонда періштелер оны алып, төрдегі Ыбырайым пайғамбардың қасына жайғастырады. Біраздан кейін әлгі бай да қайтыс болады, оны да апарып қабірге қояды.

²³ Сонымен, әлгі бай тозақта жатқандықтан, қинала бастайды да жан -жағына көз салады, сонау алыстан төрде Ыбырайымның қасында отырған Елазарды көреді.

²⁴ Сонда бай дауыстап: «Ыбырайым әке, мені аяшы, анау Елазарды бері жіберші. Ол саусағын суға малып, менің тілімді салқындатсыншы, өйткені мен мына оттың табына шыдай алмай қиналып жатырмын», - дейді.

²⁵ Сол кезде Ыбырайым оған: «Балам, сен өмірдегі бар жақсылықты тек өзің ғана алдың, ал Елазар тек жаманшылықты алғанын есіңе түсірші. Қазір ол осында жұбаныш алып жатса, сен қиналып жатырсың.

²⁶ Оның үстіне сендер мен мына біздің екі ортамызда үлкен шыңырау жатыр, сол шыңыраудан бізден сендерге барғысы келгендер өте алмайды және ол жақтан бізге өткісі келгендер де өте алмайды», - дейді.

²⁷ Сонда бай: «Әке, сенен өтінемін, онда Елазарды менің әкемнің үйіне жіберші.

²⁸ Себебі менің бес бауырым бар, олар да осындай азапталатын жерге келмеуі үшін, ол соларға барып, өз куәлігімен бөліссін», - дейді.

²⁹ Ыбырайым оған: «Мұса мен пайғамбарлардың Жазбалары бар емес пе? Олар солардың айтқандарын тыңдасын», - дейді.

³⁰ «Жоқ, Ыбырайым әке, -дейді бай, -егер оларға осы өлгендердің біреуі барса, сонда ғана олар тәубе ететін болады», - дейді.

³¹ Сол кезде Ыбырайым оған: «Егер де олар Мұса мен пайғамбарлардың айтқанын тыңдамаса, олар өлімнен тіріліп барғандардың біреуіне де сенбейді», - дейді.