Лұқа 13 - Zhana Osiet

¹ Сол уақытта біреулер Исаға Пилаттың кейбір ғалилеялықтардың қанын олардың өздері құрбандыққа берген малдың қанымен араластырып жібергені туралы айтып берді.

² Сонда Иса оларға былай деп жауап берді: -Сол ғалилеялықтардың жасаған күнәлары басқа ғалилеялықтарға қарағанда тым көп болғандықтан, сондай жағдайға ұшырады деп ойлайсыңдар ма?

³ Жоқ, олай емес! Сендерге айтамын: егер де сендер тәубеге келмейтін болсаңдар, бәрің де солай құритын боласыңдар.

⁴ Немесе он сегіз адамның үстіне Силоғам мұнарасы құлап, қайтыс болғанда, олардың қарыздары Иерусалимде тұратын адамдардан асып түскен соң, сол жағдайға ұшырады деп ойлайсыңдар ма?

⁵ Жоқ, олай емес! Сендерге айтамын: егер де тәубеге келмейтін болсаңдар, бәрің де солай құритын боласыңдар, -деді.

⁶ Содан кейін Иса оларға мына бір астарлы әңгімені айтып берді: -Бір адамның жүзім бағына отырғызған інжір ағашы болыпты. Ол оның жеміс беретін кезін күтеді, бірақ келген сайын ол одан бірде-бір жеміс таппайды.

⁷ Сонда ол өзінің жүзім өсірушісіне:«Міне, мен осы бір інжір ағашына үш жыл қатарынан келіп, одан жеміс іздеймін. Бірақ одан бірде-бір жеміс таппадым, енді оны шауып таста, бостан-босқа жерді алып тұра бере ме?» -дейді.

⁸ «Мырза, оны осы жылға тағы да қалдыр, -дейді жұмысшысы, -мен оның айналасын қазып, қопсытып, оған тыңайтқыш тастайын.

⁹ Мүмкін, ол болашақта жеміс беріп қалар, егер ол осыдан кейін жеміс бермейтін болса, оны сол кезде шауып тастарсың», - дейді.

¹⁰ Сенбі күні болатын, Иса синагогалардың бірінде тәлім беріп жатты.

¹¹ Сол жерде он сегіз жыл бойы аурудың рухы басып алғандықтан, белі бүкірейіп, денесін толық жаза алмайтын бір әйел болды.

¹² Иса сол әйелді көріп, оны өзіне шақырып алды да: -Әйел, сен аурудан азат болдың! - деді.

¹³ Иса әйелге қолын қойды, сол сәтте әйелдің денесі түзеліп, толығымен сау қалпына келді, сонда әлгі әйел Құдайды мадақтады.

¹⁴ Синагоганың басшысы сенбі күні Исаның сауықтырғанына наразылығын білдіріп, сол жердегі халыққа: -Жұмыс істеуге арналған алты күн бар, сондықтан сауығу үшін сенбі күні емес, жұмыс күндері келіңдер, - деді.

¹⁵ Сонда Иса оған: -Ей, екіжүзділер! Сол сенбі күні мына сендердің әрқайсыларың өгіздеріңді немесе есектеріңді ақырдан шешіп алып, оларды суғарып жүрген жоқсыңдар ма?

¹⁶ Мына Ыбырайымның қызын он сегіз жыл бойы сайтанның байлап қойған құрсауынан осы сенбі күні босатып алуға болмай ма? - деді.

¹⁷ Иса осылай деген кезде, Оған қарсы болғандардың бәрі ұялып қалды. Сол жердегі адамдардың бәрі Оның жасаған игі істерін қуанышпен қабылдады.

¹⁸ Содан кейін Иса оларға: -Құдайдың Патшалығын неге ұқсатуға болады? Мен оны немен салыстырар едім?

¹⁹ Ол бір адамның өз бақшасына тастай салған қыша дәніне ұқсас. Ол кейін өскенде бір үлкен ағашқа айналады, сонда аспандығы құстар келіп, оған ұя салады, - деді.

²⁰ Сосын тағы да: -Құдайдың патшалығын Мен неге ұқсатар едім? - деді Иса.

²¹ Оны әйелдер үш өлшем ұн алып, бәрін түгел ашыту үшін, сол ұнға қосқан ашытқыға да ұқсатуға болады, -деді.

²² Ол осылай қалалар мен ауылдарды аралап, тәлім беріп жүрді, содан кейін сапарын Иерусалимге қарай бағыттады.

²³ Сол кезде Оған біреу: -Ием, құтқарылатындар аз бола ма? деп сұрады. Иса оларға:

²⁴ -Тар есіктен кіруге бар күш-жігерлеріңді салыңдар, көбі соған кіруге тырысып, оны іздейтін болады, алайда оны таба алмайды.

²⁵ Ал уақыты келген кезде үйдің иесі тұрып, жаңағы есікті жауып тастайды, сонда есіктің сыртынан қағып: «Ием, бізге ашщы», -дейтін боласыңдар. Сонда Ол сендерге:«Мен сендерді де, қайдан келгендеріңді де білмеймін?» -дейтін болады.

²⁶ Сол кезде сендер: «Біз Сенің көз алдыңда жүріп тамақ жеп, сусын ішіп едік, ал Сен біздің көшелерімізбен жүрген кезіңде бізге тәлім бердің», - деп айтасыңдар,

²⁷ Ол сендерге: «Сендердің қайдан келгендеріңді білмеймін. Ей, әділетсіздік жасап жүргендер, Менен бәрің де аулақ кетіңдер!» - дейтін болады.

²⁸ Сонда Құдай Патшалығында Ыбырайымның, Ысқақтың, Жақыптың және барлық пайғамбарлардың жүргенін, ал өздеріңнің сыртқа лақтырылып тасталғандарыңды көргенде, сол жерде зар еңіреп жылап, бармақтарыңды тістейтін боласыңдар.

²⁹ Ал шығыс пен батыстан, солтүстік пен оңтүстіктен келгендер Құдай патшалығының төрінде жайғасып, жантайып жататын болады.

³⁰ Міне, сол кезде соңында болғандар алғашқы болып, ал алғашқы болғандар соңы болады, - деді.

³¹ Сол кезде фарисейлердің кейбіреуі Исаға келіп -Бұл жерден кет, өйткені Ирод сені өлтірмекші болып жүр, шық! - деді.

³² Иса оларға: -Ол түлкіге барып мынаны айтыңдар: «Міне, бүгін де, ертең де жындарды қуып шығып, сауықтырумен айналысып, тек үшінші күні аяқтайтын боламын».

³³ Сондықтан Мен бүгін де, ертең де, одан кейінгі күні де осы жерде жүретін боламын, өйткені Иерусалимнен тыс жерде пайғамбарды өлтіруге рұқсат берілмеген!

³⁴ -О, Иерусалим, Иерусалим, пайғамбарларды өлтіртіп, өзіне жіберілген елшілерді таспен атқылаттың. Қаншама рет балапандарын өзінің қанатының астына жинаған құс секілді Мен де сенің балаларыңды солай жинағым келді, алайда сендер соны қаламадыңдар.

³⁵ Міне, енді үйлерің өздеріңе қалдырылды. Сендерге айтарым: «Иеміздің атымен жарылқанған келеді!» -деп айтылатын уақыт келгенше, сендер Мені көрмейтін боласыңдар деп, Иса Өзінің ішіндегі күйінішін жеткізді