Лұқа 12 - Zhana Osiet

¹ Бір уақытта жиналған халықтың саны он мыңдай болды, сонда олар иін тіресе сығылысып, бірін-бірі аяққа таптай бастады. Сол кезде Иса, ең алдымен, Өзінің шәкірттеріне мынаны айтты: -Фарисейлердің үйреншікті ашытқысындай болып кеткен екіжүзділіктен өздеріңді сақтаңдар.

² Ешқандай сыр жасырын болып қала алмайды, ешқандай ашылмайтын құпия болмайды.

³ Өйткені сендер қараңғыда қаншалықты көбірек айтсаңдар, ол соншалықты жарықта естілетін болады, ал бөлмеде тұрып, құлаққа сыбырлап айтқандарың ол төбеде жүргендерге жария болады.

⁴ Достарым Менің, сендерге айтарым: денені өлтіргенмен, одан артық еш нәрсе де істей алмайтындардан қорықпаңдар.

⁵ Сендерге кімнен қорқу керек екенін айтайын: өлтіргеннен кейін, тозаққа тастайтын билігі Бардан қорқыңдар. Иә, сендерге айтамын, Одан қорқыңдар.

⁶ Шынында, бес торғайды екі ассарийге (тиынға) сатып жібермей ме? Бірақ олардың ешқайсысын да Құдай ұмытпайды.

⁷ Сендердің бастарыңдағы шаштарыңа дейін саналып қойылған. Сол торғайлармен салыстырғанда, сендер әлдеқайда қымбатсыңдар, сондықтан қорықпаңдар!

⁸ Сендерге айтарым: кімде-кім адамдар алдында Мені мойындайтын болса, Адам Ұлы да Құдайдың періштелерінің алдында тұрып, оны мойындайтын болады.

⁹ Егер де біреу адамдардың алдында Менен бас тартатын болса, Құдайдың періштелерінің алдында одан да бас тартылатын болады.

¹⁰ Кімде-кім Адамның Ұлына қарсы сөз айтатын болса, оған кешірім болады, ал кімде-кім Киелі Рухқа тіл тигізетін болса, оған кешірім болмайды.

¹¹ Сендерді синагогаларға, басшыларға және билік иелеріне апарған кезде, қалай ақталамыз деп немесе не айтамыз деп қам жемеңдер,

¹² өйткені сендерге не айту керектігін Киелі Рухтың өзі сол сәтте үйрететін болады, - деді.

¹³ Сонда халықтың арасынан әлдекім Исаға: -Ұстаз, мұралық еншімді маған да бөліп беруін менің бауырыма айтшы, - деді.

¹⁴ Сол кезде Иса оған: -Ей, адам, кім сендерге Мені төреші немесе енші бөліп беруші етіп қойды? - деді.

¹⁵ Сонда Иса соларға: -Әр түрлі дүниеқоңыздықтан сақ болыңдар, себебі адамның өмірінің мәні оның дүниемүлкінің мол болып, асып -тасқандығында емес, сондықтан байқаңдар! - деді де,

¹⁶ мына астарлы әңгімені айтып берді: -Бір бай адамның егіндік жері мол өнім береді.

¹⁷ Сонда ол өзіне-өзі: «Мен жинап алған өнімдерімді қайда апарып қоярымды білмеймін? Не істесем болады?» -дейді.

¹⁸ Сонда ол былай деп шешеді: «Өзімнің қоймаларымды бұзып, оны қайтадан үлкейтіп салайын, соған бүкіл астық пен байлықтарымды жинап қоямын.

¹⁹ Содан кейін өзіме-өзім: «Ей, менің жан дүнием, мына жатқан бар байлығың енді көп жылдарға дейін артығымен жетеді, сондықтан сен демалып, ішіп -жеп, көңіліңді көтер», - дейтін боламын.

²⁰ Алайда Құдай оған: «Ей, ақылсыз, осы түні сенің жаныңды Өзіме қайтарып аламын. Сенің мына дайындап қойғандарың кімге қалады?» - дейді.

²¹ Сонымен, тек өзіне ғана байлық жинап, ал Құдаймен байығысы келмейтін адаммен тура осылай болады, -деді.

²² Осыдан кейін Иса Өзінің шәкірттеріне: -Сондықтан Менің сендерге айтарым: өмірде не ішеміз, денемізге не киеміз деп уайымдамаңдар.

²³ Өйткені өмір тамақтан, ал дене киімнен артық қой.

²⁴ Анау қарғаларға қараңдаршы, олар не екпейді, не ормайды, олардың не қоятын, не сақтайтын орындары да жоқ. Алайда Құдай оларға қажетті қорегін береді, ал сендер сол құстардан әлдеқайда артықсыңдар.

²⁵ Кім өз бойының қамын ойлап, оны бір шынтаққа дейін ұзарта алады?

²⁶ Егер де сендер осы бір кішкентай нәрсені жасай алмайтын болсаңдар, онда қалған мұқтаждықтардың қамын неге ойлап жүрсіңдер?

²⁷ Анау лала гүлдерінің қалай өсетініне назар салыңдаршы. Олар не еңбек етпейді, не жіп те иірмейді. Сендерге айтарым: тіпті, бүкіл атақ -даңққа бөленіп жүрген Сүлейменнің Өзі солар сияқты киініп көрген емес.

²⁸ Егер де бүгін далада өсіп тұрған, ал ертең пешке тасталатын шөпті Құдай солай киіндіріп қойса, онда мына сенімдері аз сендерді одан да бетер киіндіре алады.

²⁹ Сондықтан сендер не жейміз, не ішеміз деп уайымға салынбаңдар.

³⁰ Бұл әлемнің халықтары осы туралы ойлайды, ал сендердің Әкелерің неге мұқтаж екендеріңді біледі.

³¹ Одан гөрі Оның Патшалығын іздеңдер, сонда бұлардың бәрін сендерге қосып береді.

³² Қорықпа, шағын отар, өйткені сендердің Әкелерің Өз Патшалығын сендердің игіліктерің үшін беріп отыр.

³³ Өз дүние-мүліктеріңді сатып, одан қайыр-садақа беріңдер, осылай өздеріңе шірімейтін қалта жасаңдар, сонда қазыналарың ешқашан таусылмайды және күйе де жемейтін, не ұры да жақындай алмайтын көкте болады.

³⁴ Себебі сендердің қазыналарың қай жерде болса, жүректерің де сонда болады.

³⁵ Сонымен қатар, белдерің буулы, шамдарың жағулы болсын.

³⁶ Сонда сендер салтанатты үйлену тойынан келетін өз қожайынын күткен және ол келіп, есікті қаға бастағанда, сол сәтте есік ашып беретін адамға ұқсайтын боласыңдар.

³⁷ Егер де қожайыны келген сәтте, өзінің сергек жүрген құлдарын көретін болса, онда олардың бақытты болғаны. Сендерге шындықты айтайын: сонда ол белін буып алып, жантайып жатқан олардың қасына барып, оларға Өзі қызмет ететін болады.

³⁸ Егер де ол екінші немесе үшінші күзет уақытында келіп қалып, олардың солай сергек жүргенін көретін болса, нағыз бақытты құлдар солар болады.

³⁹ Мынаны білсеңдер екен: егер де үйдің қожайыны ұрының қай сағатта келетінін білсе, онда ол үйінің іргесін қазып кіретін ұрыға сол мүмкіндікті бермес еді.

⁴⁰ Сол секілді сендер де соған дайын болыңдар, өйткені Адам Ұлының қай сағатта келетінін сендер білмейсіңдер, -деп Иса Өзінің қайтып келетін мезгілінің құпия екенін айтты.

⁴¹ Сонда Петр: -Ием, осы астарлы әңгімені тек бізге ғана айтып тұрсың ба әлде бәріне ме? - деді.

⁴² Сонда Иеміз: -Сонымен, кім қожайынына сенімді болып, оның үйінде жүргендерге өз уақытымен нанын өлшеп беріп тұратын адамды олардың үстінен қарайтын басқарушы етіп қоймай ма?

⁴³ Қожайыны келген кезде, оның солай істеп жүргенін көретін болса, сол құл бақытты.

⁴⁴ Сендерге шындықты айтайын: сонда Ол өзінің барлық дүние-мүлкін де оған сеніп тапсыратын болады.

⁴⁵ Ал егер де сол құлдың жүрегінде: «Менің қожайыным кешігіп жатыр, ол әзірге келе қоймайды», -деген ой болып, оның құлдары мен күңдерін ұрып-соғып және ішіп-жеп, маскүнемдікке салынса,

⁴⁶ онда қожайыны ол күтпеген күні, күтпеген сағатта келеді. Оны екіге бөліп шауып, оны сенбеушілердің қатарына апарып қосады.

⁴⁷ Қожайынының еркін біле тұра, оның келетін кезіне дайын болмаса немесе Оның еркін іске асырмаған құл көп соққы жейтін болады.

⁴⁸ Ал оның еркін білмей, істеген істері арқылы жазаға лайықты болғанның өзінде ол соққыны аз алатын болады. Кімге көп берілсе, оған қойылған талап та көп болады, ал кімнен сенімділік талап етілсе, оған қойылатын талап та өте көп болады.

⁴⁹ -Мен жер бетіне келіп, от тастадым, енді соның тезірек жалындап жанғанын қалаймын!

⁵⁰ Мен қасіретке толықтай батырылып шомылудан өтуге тиіспін, соны іске асыратын уақыт келгенше, іштей қиналып жүрмін.

⁵¹ Мен осы әлемге бейбітшілік әкелді деп жүрсіңдер ме? Жоқ, керісінше, Мен бөлінуді әкелдім, сендерге айтарым осы.

⁵² Сондықтан енді бұдан былай бір үйдегі бес адам бөлектеніп, үшеуі екеуіне, екеуі үшеуіне қарсы тұрады.

⁵³ Әкесі мен ұлы бөлініп, әкесі ұлына, ұлы әкесіне, шешесі қызына, қызы шешесіне, енесі келініне, келіні енесіне қарсы болады, - деді.

⁵⁴ Содан кейін Иса халыққа: -Сендер батыстан көтерілген бұлтты көргенде: «Міне, енді жаңбыр жауады», -дейсіңдер және солай болады да.

⁵⁵ Оңтүстіктен жел соқса: «Аптап ыстық болады», -дейсіңдер, ол да солай болады.

⁵⁶ Ей, екіжүзділер, жердің құбылысы мен көктің белгілерін біліп тұрып, мына қазіргі осы уақытты қалайша білмей қалдыңдар?

⁵⁷ Сонда сендер қалай өзара әділ шешім шығара алмадыңдар?

⁵⁸ Негізінде, өзіңнің қарсыласыңмен билік иесіне бара жатқан жолда онымен келісіп, сұрағанын беріп, одан құтылуға тырысқаның жөн, әйтпесе ол сені соттың төрешісіне алып барады, ал соттың төрешісі сені сот орындаушыға ұстап береді, ал сот орындаушы сені абақтыға жабады.

⁵⁹ Саған айтарым: соңғы тиыныңды толықтай беріп болмайынша, сен сол жерден шықпайсың, - деді.