Қорынттықтарға 2 9 - Zhana Osiet

¹ Сонымен, Құдайдың адамдарына арналған қайырымдылық қызметі туралы сендерге менің жазғаным артық болар.

² Өйткені сендердің қол ұшын беруге деген ыстық ықыластарың (ізгі ниеттерің) жайында білемін, сол үшін де мен македондықтардың алдында ахайлықтар былтырдан бері бұл қызметке дайын екенін айтып, мақтанған едім, сендердің бұл істерің көпшіліктің қызығушылығын оятты.

³ Сондықтан біздің сендер туралы мақтанышымыз бекер болмасын деп және менің айтқанымдай сендер де сақадай сай отырсын деген оймен осы бауырластарды сендерге жібердім.

⁴ Себебі қай кезде болмасын, македондықтар менімен бірге сендер жаққа баратын болса, бірақ сендер бұл іске дайын болмасаңдар, онда ұятқа қалатын сендер емес, мына біз боламыз, ал біз өздеріңе өте үлкен сенім артып келеміз.

⁵ Сол үшін мен бұл бауырластарды сендер жаққа ертерек жіберіп отырмын, себебі басында өздерің берген уәдеге сай, олар алдын ала барып, сендердің жинаған жарылқауларыңды реттеп қойғаны дұрыс шығар деп шештім. Сонда бұл нәрсе мәжбүрлеу арқылы емес, керісінше, басқалардың қамын ойлап, оларды жарылқау үшін жасалған ерікті іс-әрекет екені көрінетін болады.

⁶ Кім аз сепсе, сол аз оратын болады, ал кім біреуді жарылқау үшін сепсе, сол жарылқаудың өнімін молынан орып алатынын есте сақтаңдар.

⁷ Сондықтан кім бергісі келсе, мәжбүрлеумен емес, өзінің жүрегінің қалауымен, еш ренішсіз беретін болсын, өйткені Құдай қуанышпен беретіндерді сүйеді.

⁸ Себебі Құдайдың күші сендерге әрқашан рақымын молынан төгіп, барлық жағдайда сендерге бәрін жеткілікті етіп молынан бере алады және қолда барға қанағат етіп, жақсылық жасауға жетелеп отырады.

⁹ Ал бұл туралы Жазбада: «Ол кедейлерге ағыл-тегіл молынан берді, сондықтан Оның әділдігі мәңгілікке қалады!» - деп жазылған.

¹⁰ Демек, Құдай себушіге тұқым беріп, нан мен тамақ сұрағандарды қамтамасыз етеді, себетін тұқымдарыңды молынан көбейтіп, бойларыңдағы әділдіктің жемісін өсіріп отырады.

¹¹ Сонымен, Құдай сендерді кез-келген жағдайда барлық жағынан қарапайым, жомарт болуға жетелеп, жомарттықпен байытады, ал сендердің біз арқылы берілген жомарт сыйларың үшін, олар Құдайға ризашылықтарын білдіреді.

¹² Құдайдың адамдарына арналған бұл қызмет тек олардың мұқтаждықтарын ғана қамтамасыз етіп қоймайды, сонымен қатар, көптеген адамдар арқылы Құдайға молынан алғыс айтылатын болады.

¹³ Себебі бұл қызмет арқылы сендер Құдайдың даңқын арттырасыңдар және өздеріңнің Мәсіхтің Ізгі хабарына мойынұсынып, Оны толық қабылдағандарыңды осы жасаған қарапайым құрбандықтарың арқылы оларға да, басқаларға да дәлелдеп бердіңдер.

¹⁴ Ал олар Құдайдың төккен мол рақымына деген ризашылықтарын сендер үшін жасаған мінәжаттары арқылы білдіруде.

¹⁵ Құдайдың бізге берген осы бір сыйына шексіз ризамыз!