Қорынттықтарға 2 6 - Zhana Osiet

¹ Сонымен, сендер бізбен бірге қызметтес болғандықтан, Құдайдан қабылдаған рақымдылыққа немқұрайды қарамауларыңды сендерден өтініп сұраймыз.

² Өйткені Ол былай дейді: «Белгіленген уақыт келген кезде, Мен саған құлақ түрдім, құтқарылатын күні Мен саған көмекке келдім». Міне, сол уақыт, яғни, құтқарылатын күн келді.

³ Сол үшін біздің осы атқарып жүрген қызметімізді күлкіге айналдырмасын деген ниетпен ешқашан ешкімге сүріндіретін кедергі тас сияқты болмауды ойлаймыз.

⁴ Сондықтан біз барлығына кез-келген жағдайда өзімізді Құдайдың қызметкері ретінде көрсетуге тырыстық, көп жағдайда төзімділік таныттық, езгіге де түстік, зорлыққа да көндік, қысымшылыққа тап болып,

⁵ соққыға да жығылдық, түрмеге де қамалдық, аласұрған топқа да тап болдық, ауыр еңбек еттік, ұйқы көрмеген сәттер, көз ілместен ораза ұстаған кездер де болды,

⁶ сонда да таза жүріп-тұрдық, білім де алдық, шыдамды болып, жақсылық жасауға тырыстық, Киелі Рухтың жетегінде жүріп, сүйіспеншілік көрсеткенде, екіжүзділіктен аулақ болдық,

⁷ сөзімізде тек шындық болды, бір Құдайдың күшімен жүрдік. Оң қолымызға да, сол қолымызға да ұстаған қаруымыз тек әділдік болды,

⁸ даңққа да бөлендік, абыройдан жұрдай болған кезіміз де болды, бірде сөгіс естіп, бірде мақтау да алдық. Бізге жалған сөйлеуші айлакер адам ретінде де қарады, сонда да шындықты айта бердік,

⁹ бірде белгісіз болсақ, бірде танымал болдық, бірде өлген адамдар қатарында болсақ, қазір тіріміз, бізді жазалайды, бірақ өлген жоқпыз,

¹⁰ қайғыға душар болғандарға ұқсаймыз, бірақ әрқашан қуанышпен жүреміз, кедей адамдарға ұқсас болғанымызбен, көбін байытамыз, ештеңеміз жоқ сияқты болғанмен, бірақ бізде бәрі бар!

¹¹ Қорынттықтар, біз сендерге жүрегімізді де айқара ашып қойдық.

¹² Енді сендер де кеңпейілділік танытып, жан дүниелеріңнен бізге де орын беріңдер.

¹³ Мен мұны балаларыма айтқандай айтып отырмын, сондықтан сендер де өздеріңді еркін ұстап, кеңпейілділік көрсетіп, ашық болыңдар.

¹⁴ Сенбеушілердің киген қамытын қоса киюші болмаңдар, өйткені әділдік пен заңсыздықтың арасында ортақ не бар? Немесе жарық пен түнектің арасында ортақ не бар?

¹⁵ Мәсіх пен белиардың арасында қандай қарым-қатынас болуы мүмкін? Сенуші мен сенбеушінің арасында қандай үйлесім бар?

¹⁶ Құдайдың киелі үйі мен пұтқа табынушылықтың арасында қандай бірлестік бар? Ал шындығына келсек, сол Құдайдың киелі үйі-мына біз, сондықтан Құдай: «Мен олармен бірге тұрып, бірге жүретін боламын. Менолардың Құдайы, олар Менің халқым болады», -деп айтқан болатын.

¹⁷ «Сондықтан сендер олардың ортасынан шығып, бөлек тұрыңдар, -дейді Жаратушы Иеміз, -тазартылмаған нәрселерге қолдарыңды тигізбеңдер, тек сонда ғана Мен сендерді қабылдаймын».

¹⁸ «Мен сендерге Әке боламын, сендер Менің ұлдарым мен қыздарым боласыңдар», -дейді бүкіл әлемді Жаратқан Иеміз.