Қорынттықтарға 2 4 - Zhana Osiet

¹ Міне, сол үшін де бұл қызмет бізге берілді және бұл Оның мейіріміне сай болды, сондықтан біз жабырқап, жасымаймыз.

² Керісінше, біз ұятқа қалдыратын құпия істерден бас тартып, арамдық пен қулыққа беріліп, Құдай сөзін бұрмаламаймыз, Құдаймен жүрген әрбір адамның ой-санасына шындықты ашып беруге тырысамыз.

³ Егер де біз жариялаған Ізгі хабар жабық болса, ол тек тозаққа кететіндер үшін ғана жабық болмақ

⁴ Себебі осы әлемнің құдайы (сайтан) Мәсіхтің даңқы туралы Ізгі хабардың жарығы кірмесін деп, сенбеушілердің ой-саналарын соқыр етіп қойды, ал Мәсіхте Құдайдың бейнесі бар.

⁵ Біз өзімізді емес, біздің Иеміз Иса Мәсіхті жариялап жүрміз, біз сендерге бола өзімізге Исаның құлдары ретінде қараймыз.

⁶ Өйткені Құдай: «Түнектен нұр жарқырайтын болады», -деген болатын, ал сол жарық біздің жүрегімізде жарқырап жанып тұр, бұл жарық Құдайдың даңқының Иса Мәсіхтің бет-әлпетінен нұр болып көрініп тұрғанын білдіреді.

⁷ Сондықтан бұл қазынаны біз қыш ыдыста (денемізде) алып жүреміз, бұл керемет күш біздің өзімізден емес, керісінше, Құдайдың құдіретті күші екенін көрсетеміз.

⁸ Бізге жан-жақтан қысым көрсетілуде: алайда шектелген жоқпыз; кейде шарасыз күйге тап боламыз, алайда шарасыз болып қалмадық;

⁹ қуғын-сүргінге түстік, бірақ тасталған жоқпыз; кейде аяққа тапталдық, дегенмен, өлген жоқпыз.

¹⁰ Біз барлық жағдайда Исаның өлімін осылай өз денемізде көтеріп жүрміз, сондағы мақсатымыз -Исаның өмірін өзіміздің өмірімізден нақты көрсету.

¹¹ Сондықтан біз тірі жүрміз, Иса үшін біз басымызды өлімге де тігеміз, себебі тек осылай Исаның өмірі біздің денемізде екенін көрсете аламыз.

¹² Сонымен, біздің өмірімізде өлім әрекет етсе, сендерде өмір әрекет етіп жатыр.

¹³ Себебі Жазбада: «Мен сендім, сондықтан айттым», -деп жазылған. Біз де бұған сенеміз, солай айтамыз, өйткені біз де сол Рухқа ие болдық.

¹⁴ Иса Мәсіхті өлімнен қайта тірілткен Құдай, бізді де Иса Мәсіхпен бірге қайта тірілтіп алып, Өзінің алдына сендермен қатар тұрғызып қоятынын біз білеміз.

¹⁵ Бәрі сендердің игіліктерің үшін, көптеген адамдардың білдірген алғысы арқылы рақымдылық шексіз көбейіп, Құдайдың даңқын анық көрсететін болады.

¹⁶ Сол үшін біз жабырқамаймыз, өйткені біздің физикалық денеміз тозғанмен, ішкі жан дүниеміз күннен-күнге жаңара түсуде,

¹⁷ біздің қысқа уақыт қана тартқан азаптарымыз мәңгілікке берілген ұлылықтың артықшылығымен салыстырғанда, түкке де тұрмайды.

¹⁸ Біз жанарымызды көрініп тұрған нәрселерге емес, көрінбейтінге тігеміз, өйткені көрінетіннің бәрі уақытша, ал көрінбейтін нәрсе - мәңгілік.