Қорынттықтарға 2 2 - Zhana Osiet

¹ Сендерді тағы да ренжітіп алмайын деген оймен мен өзім шешім қабылдадым.

² Егер де мен сендерге ренжітсем, менің көңілімді кім көтереді?

³ Мен мұны сендер келмей жатып қуаныштың орнына реніш әкелмейін деген оймен жазып отырмын, ал менің қуанышыма бәріңнің ортақтасып, бөлісетіндеріңе мен сенімдімін.

⁴ Бұл хатты өзім көп ауырлықты арқалап жүріп, жүрегім қатты сыздап, көз жасымды төгіп отырып жаздым, бірақ менің мақсатым сендерді ренжіту емес, қайта, сендерді соншама сүйетінімді білдіргім келді.

⁵ Егер де біреу мені мұңайтса, ол тек мені ғана ренжіткен жоқ, тым асырып айтпасам да, оның сол іс-әрекеті бәріне ауыртпалық әкеледі.

⁶ Әрине, мұндай адамға көпшіліктің беретін жазасы жеткілікті,

⁷ алайда сендер оны жылдам кешіріп, жұбатуларың керек, әйтпесе ол уайым мен қайғыға терең беріліп, содан құрып кетеді.

⁸ Өздеріңнің оны жақсы көретіндеріңді дәлелдеп, сүйіспеншілік көрсетулеріңді сендерден өтініп сұраймын.

⁹ Осы айтқаныма мойынұсындыңдар ма, жоқ па, соны білу үшін сендерді сынап жазып отырмын.

¹⁰ Сонымен, сендер кімді кешірсеңдер, мен де оны кешіремін. Өйткені мен оны кешірдім, ал мен кімді кешірсем, егер оған шын мәнінде кешірім беру керек болса, онда мен сендер үшін Мәсіхтің алдында кешіремін,

¹¹ өйткені біз осындай жағдаймен бетпе-бет келгенде, сайтанға алданып қалмауымыз қажет, себебі оның ойының қандай екенін біз білеміз.

¹² Мен Мәсіхті уағыздау үшін Троадаға келген кезде, Иеміздің маған есіктерді айқара ашып қойғанын байқадым.

¹³ Алайда Тит бауырымды тауып алғанша, менің жан дүниемде тыныштық болмады. Сондықтан мен олармен жылдам қоштастым да, ол жерден шығып, Македонияға қарай жүріп кеттім.

¹⁴ Бізді Мәсіхте жеңімпаз етіп жетелеп жүрген Құдайға әрдайым алғыс айтамын, өйткені Ол біз арқылы Мәсіх туралы білімнің хош иісін барлық жерге ашық таратуда.

¹⁵ Өйткені Мәсіхтегі біздер құтқарылғандар үшін де, тозаққа кететіндер үшін де Құдайдың Мәсіхтегі хош иісі болып тұрмыз.

¹⁶ Біз біреулерге өліктен шығатын өлімнің сасық иісіндей болсақ, енді біреулерге өмірден шығатын өмірдің хош иісіндейміз. Ал бұған кім лайықты?

¹⁷ Біз көптеген басқа адамдар сияқты Құдайдың сөзін саудаға салмаймыз, керісінше, сол сөз таза күйінде Құдайдан қалай келген болса, оны Мәсіхтің және Құдайдың алдында дәл сол таза күйінде жариялап жүрміз.