Қорынттықтарға 2 13 - Zhana Osiet

¹ Мен сендерге үшінші рет келе жатырмын. «Кезкелген айыптау екі немесе үш куәгердің түсініктемелерімен дәлелденуі тиіс», - деп жазылған естеріңде шығар.

² Мен осының алдында да, екінші рет сендермен бірге болғанда да айтқан едім, қазір өздеріңнен алыста болсам да, осы уақытқа дейін күнә жасап келгендерге де, басқаларына да тағы да қайталап айтамын: осы жолы олар менен аяушылық күтпесін.

³ *Сендер мен арқылы Мәсіх сөйледі дегенге дәлел іздеп, соны дәлелдейтін айғақ іздейсіңдер. Алайда Оның күші әлсіреген жоқ, Оның күші мына сендерде!

⁴ Ол айқышқа шегеленген сәтте әлсіз болды, бірақ Ол Құдайдан келген күшпен қайта тірілді! Сол сияқты Онымен жүрген біз де әлсізбіз, алайда біз Мәсіхтегі Құдайдың күші арқылы өмір сүреміз.

⁵ Сондықтан сенімде жүрсіңдер ме, жоқ па соны тексеріп, өздеріңді-өздерің сынаңдар. Мүмкін, Иса Мәсіхтің өздеріңмен бірге өмір сүріп жатқанын әлі де білмейтін шығарсыңдар? Ең бастысы Мәсіхке лайықсыз болмасаңдар екен.

⁶ Біздің де Оған лайықты болуға тырысып жүргенімізді сендер білетін шығар деп үміттенемін.

⁷ Сендер қандай да бір жамандық жасамаса екен деп, біз Құдайға мінәжатпен өтінудеміз. Біз бұл әрекетті өзіміздің сынаққа қалай шыдағанымызды көрсету үшін істемейміз, сендер де біз сияқты сынақтарға шыдап, жақсылық жасай берсе екен дейміз.

⁸ Себебі біз шындыққа қарсы шыға алмаймыз, сол шындықты қолдаймыз.

⁹ Біз өзіміздің әлсіздігімізге, ал сендердің күшті болғандарыңа қуанамыз, сондықтан сендердің кемелділікке жеткендеріңді тілеп, мінәжат етіп жүрміз.

¹⁰ Мен қазір өздеріңмен бірге емеспін, сонда да осы хатты жазып отырмын, себебі өздеріңмен бірге болғанда, Иеміздің нығайту үшін берген билігін сендерге қаталдықпен қолданып, еңселеріңді түсіргім келмейді.

¹¹ Қорыта келе айтарым, бауырластар, қуаныңдар, өсіпөніп жетіле беріңдер, бір-біріңді жұбатыңдар, ойларың ортақ болсын, татулықта өмір сүріңдер, сонда сүйіспеншілік пен тыныштықтың Құдайы сендермен бірге болады.

¹² Бір-біріңмен амандасқан кезде, өзара сүйіспеншілік көрсетіңдер. Құдайдың барлық киелі халқы сендерге сәлем айтуда.

¹³ Иеміз Иса Мәсіхтің рақымы, Құдайдың сүйіспеншілігі және Киелі Рухтың қарым-қатынасы сендерде болсын! Аумин!