Қорынттықтарға 2 12 - Zhana Osiet1 Маған ешқандай пайда әкелмесе де, мақтануды жалғастыруға мәжбүрмін. Енді мен Иеміздің маған көрсеткен көрінісі мен берген аянына келейін. 2 Мен Мәсіхтегі бір адамды білемін, бұл оқиға осыдан он төрт жыл бұрын болды, сонда ол денеде болды ма, әлде денеден тыс болды ма, нақты білмеймін, оны тек Құдайдың Өзі ғана біледі, ал Құдай сол адамды үшінші аспанға көтеріп алып барды. 3 Мен сол адамды білемін, бірақ ол денеде болды ма, әлде ол денеден тыс болды ма, тағы да нақты білмеймін, оны тек Құдай ғана біледі. 4 Міне, Құдай сол адамды көкке көтеріп, оны жұмаққа апарды, ол сол жерде адам айтып жеткізе алмайтын сөзді естіді. 5 Міне мен осыған мақтанамын, ал жеке өз басыма келсем, мен тек өзімнің әлсіздігіммен ғана мақтана аламын. 6 Егер мақтанғым келіп бара жатса, ақымақ болмауға тырысамын, өйткені менің тек шындықты айтуым керек. Сондықтан мені өз көздерімен көріп немесе мен туралы естігеннен артық еш нәрсе ойламасын деп, мен өзімді-өзім ұстауға тырысудамын. 7 Мен сол Құдай ашып берген аянның шегінен шықпауға тиіспін, себебі мен дандайсып кетпейтіндей, сайтанның періштесі қинау үшін, денеме бір шаншу берілді. 8 Ал мен Иемізден соны алып тастауын үш рет жалынып, Одан сұрадым. 9 Сонда Ол маған: «Менің рақымым саған жеткілікті, себебі Менің күшім тек сен әлсіз болғанда ғана көрінеді», -деді. Сондықтан мен өзімнің әлсіздігіммен бұрынғыдан бетер мақтанамын, сонда Мәсіхтің күші менде әрекет ететін болады. 10 Дегенмен, Мәсіх үшін зорлық көріп, қудалауға түсіп, қысымшылық көрген кездерімде өзімнің әлсіз екендігімді мойындағанда, содан күш аламын. Өйткені мен әлсіз болған кезде ғана күшті боламын. 11 Мен мақтанып, ақылсыз болып шықтым, ал бұған мені мәжбүрлеген өздеріңсіңдер. Себебі сендердің негізгі міндеттерің мені басқаларға таныстыру болған. Мен түкке тұрғысыз болсам да, менің дәрежем сол өздерін жоғары санайтын елшілердің ешқайсысынан кем емес. 12 Мен өздеріңмен бірге болған сәттерде қандай жағдай болса да, табанды тұруға шақырып, көптеген белгілер мен кереметтер, күштер арқылы Мәсіхтің шынайы елшісі екендігімді дәлелдедім. 13 Сонымен не болды? Басқа қауымдарға қарағанда сендердің жағдайларың өте төмен болды ма? Әлде мен өз ауыртпалығымды сендерге артып қойдым ба? Егер солай болса, онда мен сол әділетсіздігім үшін сендерден кешірім сұраймын. 14 Міне, мен сендерге үшінші рет барсам деп ойлап жүрмін, баруға да дайынмын. Бірақ сол кезде де мен өз ауыртпалығымды сендерге жүк қылып артқым келмейді. Мен сендерді өз жағдайымды жасату үшін іздемеймін, керісінше, маған тек өздерің ғана керексіңдер. Өйткені ата-аналарының қажетін балалары емес, балаларының қажетін ата-аналары жасауы тиіс. 15 Ал мен шын көңіліммен өзімде барды сендердің жан дүниелеріңе беруге дайынмын. Бірақ мен сендерге сүйіспеншілігімді молынан беріп жатсам да, маған деген сендердің сүйіспеншіліктерің неге азайып барады? 16 Жарайды, мен өздеріңе ауыртпалық түсірмеген шығармын, дегенмен, сендермен бірге болған кезде, қулықсұмдықпен бізді қармағына түсіріп алды деп айтуларың мүмкін. 17 Мүмкін, мен өздеріңе жіберген бауырластарымыз арқылы сендерді пайдаланып, айламды асырып, ақша алдым ба? 18 Мен Титтен сендерге барып келуін өтініп сұраған кезде, оған бір бауырымызды қосып жібердім, сонда Тит сендерді алдады ма? Бәріміз бір рухтың жетегінде емеспіз бе? Жүрген жолымыз да, істеріміз де бір емес пе? 19 Сендер: «Бұлар өздерін біздің алдымызда ақтап алуға тырысып жатыр», -деп ойлайтын шығарсыңдар? Сүйікті бауырластарым, Құдай алдында Иса Мәсіхте жүргендіктен, біздің айтатынымыз: кез-келген жағдайда және барлығын тек сендерді нығайтып, сендерден «мықты құрылыс» жасау үшін істедік. 20 Егер де мен сендерге барған кезде, сендер мен қалағандай күйде болмасаңдар, ал мен сендер ойламаған жағдайда әрекет етем бе деп қорқамын. Сендердің орталарыңдағы ұрыс-керіс, қызғаныш, ашу-ыза, бақталастық, жамандау, өсек-аяң, менмендік, тұрақсыздық сияқты нәрселерге тап болам ба деп қорқамын. 21 Мен сендерге тағы да баратын болсам, Құдайым мәртебемді сендердің алдарыңда тағы да төмен түсіре ме деп үрейленемін және бұрыннан күнә жасап жүргендер үшін де, тәубеге келмей, азғындыққа беріліп, некесіз жыныстық қатынаста жүргендер үшін де көз жасымды тағы да төгемін бе деп қорқамын. |
© Association Bible Society of Kazakhstan, 2022-2023
Association Bible Society of Kazakhstan