Қорынттықтарға 2 11 - Zhana Osiet

¹ Шіркін-ай, менің осы бір ақылсыздығыма кішкене шыдасаңдар екен, өтінемін! Бірақ бұған шыдап та келесіңдер!

² Құдай сендерді қалай қызғанатын болса, мен де сендерді дәл солай қызғанамын. Себебі пәк, таза қызды жігітке айттырғандай, мен де сендерді Мәсіхке айттырып қойдым.

³ Алайда мен Хауа ананы алдап, қулығын асырған жыланның сендердің Мәсіхке арналған шынайы әрі таза ой-саналарыңды да арбай ма деп қорқамын.

⁴ Егер де басқа біреу біз жариялап жүрген Иса Мәсіхтен басқа Исаны немесе қандайда бір басқа Рухты немесе басқа бір Ізгі хабарды жариялаған кезде, сендер соны қабылдамасаңдар, онда сендердің дұрыс бағытта болғандарың.

⁵ Себебі өздерін жоғары санайтын елшілерден мен өзімді кеммін деп санамаймын.

⁶ Мүмкін, мен сөзге шорқақ шығармын, бірақ білім жағынан арттамын деп ойламаймын, біз сендерге кезкелген жағдайда барлық жағынан ашық болып, өздеріңе кеңпейілділік көрсетуге тырыстық.

⁷ Сендерді жоғарылатып, ал өзімді төмендетіп, Құдайдың тегін берген сыйын, Оның Ізгі хабарын, сендерге тегін уағыздағаным, мүмкін, менің күнәм шығар?

⁸ Мен сендердің қызметтеріңді қолдау үшін, басқа қауымдарды тонағандай болдым, өйткені қажетті қаражатты көбінесе мен солардан алып отырдым.

⁹ Сендермен бірге жүрген кезімде қаншама мұқтаждық көрсем де, мен ешқайсысыңның мойныңа ауыртпалығымды артқан емеспін, себебі мен не нәрсеге мұқтаж болсам, сол мұқтаждықтарымды Македониядан келген бауырластар қамтамасыз етіп отырды. Мен қандай жағдайда болсам да, сендерге ешқандай ауыртпалық салмадым, өз мұқтаждығымды өзім көтеріп келемін, шамам келгенше әлі де көтеремін.

¹⁰ Мендегі бар шындық Ол-Мәсіхтің шындығы, мен осыны мақтан етемін, Ахая аймағындағы кейбіреулерге бұл кедергі бола алмайды.

¹¹ Не үшін? Өйткені мен сендерді өте жақсы көремін! Құдай мұны біледі.

¹² Сондықтан мен қазіргі атқарып жүрген ісімді одан әрі жалғастыра бермекпін, өйткені біздің атқарған ісімізді пайдаланып, басқалардан мақтау естіп, өздеріне бедел жинап жүргендердің әрекетін түп тамырымен құртпақпын.

¹³ Себебі мұндай атақ-даңқ үшін әрекет етіп жүргендержалған елшілер, олар өздерін елші ретінде көрсету үшін осындай қулыққа барып, сырт көзге Мәсіхтің елшісі сияқты көрінуге тырысып жүр.

¹⁴ Бұған таңғалатын ештеңе жоқ, өйткені сайтан өзін жарықтың періштесі етіп те көрсете алатындықтан,

¹⁵ олардың қызметшілеріне де өздерін әділдіктің қызметшісі ретінде көрсету аса қиын емес, бірақ ақырында олардың алатын жазасы өздерінің сол жасаған іс-әрекеттеріне сай болады.

¹⁶ Тағы да қайталап айтамын: мені ешкім де ақымақ деп ойламасын, ал егер солай ойласаңдар, мейлі, онда мені ақымақ деп қабылдаңдар, осы бір кішкентай нәрсемен мақтанып қалуға маған рұқсат етіңдер.

¹⁷ Ал мұны мен Иеміздің атынан айтып тұрған жоқпын, керісінше, мен оны өзімнің сол ақылсыздығыма сүйеніп, мақтанып айтып отырмын.

¹⁸ Өйткені осы әлемде көптеген адамдар тәндік нәрселерімен мақтанады, сондықтан мен де дәл солай мақтанып қалайын.

¹⁹ Өйткені сендер ақылды болғандықтан, ақымақтардың ісіне түсінікпен қарап, төзімділік танытып, шыдауға тиіссіңдер!

²⁰ Егер де біреулер сендерді құл етіп, енді біреулер қанап, тонап жатса да, өздеріңе қысым көрсетіп, беттеріңнен ұрып жатса да төзесіңдер.

²¹ Ұят болса да айтайын, біз сендермен осылай істеуге «әлсіздік» таныттық. Ал енді кейбіреулердің мақтануға батылы жетіп жатса, ақымақша айтайын, менің де батылым жетеді.

²² Олар еврей ме? Мен де евреймін. Олар исраилдіктер ме? Мен де исраилдікпін. Олар Ыбырайымның ұрпағынан ба? Мен де Ыбырайымның ұрпағына жатамын.

²³ Олар Мәсіхтің қызметкерлері болса, ақымақ сияқты айтсам, сол қызметті мен де атқарып келемін және олардан да артық еңбек еттім! Сол үшін бірнеше рет абақтыға түстім, жиі таяқ жедім, өліммен бетпе-бет келген кездерім болды.

²⁴ Яһудейлерден отыз тоғыздан бес рет соққы алдым,

²⁵ римдіктер мені үш рет таяқпен сабады, бір рет таспен атқылады, мен үш рет кеме апатына ұшырап, күні бойы және түнімен тұңғиық терең, ашық теңізде болдым.

²⁶ Сапарға шығып, өзендерден өткенде, қарақшылардан төнген қатерді, руластарым мен өзге ұлт өкілдерінен келген қиыншылықты, қала мен шөл далада, теңізде әрі жалған бауырластардан келген қауіп-қатерді басымнан жиі өткіздім.

²⁷ Қанша қажысам да, бар күшімді салып еңбек еттім, ұйқысыз түндерді өткіздім, қаншама рет аш құрсақ жүрдім, жиі ораза ұстап, талай рет шөлдедім, суықта жалаңаш жүріп, тоңдым.

²⁸ Бұлардан басқа барлық сенушілер қауымдарына қамқорлық көрсету, оларға күнделікті беретін ақыл -кеңесім де болды.

²⁹ Біреу ауырып қалса, мен өзімнің әлсіз екенімді сезінбейді дейсіңдер ме? Біреу азғырылуға тап болса, мен күйінбейді деп ойлайсыңдар ма?

³⁰ Егер де менің мақтануым қажет болса, онда мен өзімнің тек әлсіздігіммен ғана мақтана аламын.

³¹ Ал менің өтірік айтпайтынымды Иеміз Исаның Әкесі, жарылқап, баталаушы Құдай біледі, себебі менің айтқандарымда ешқандай жалғандық жоқ.

³² Дамаскіде болғанда, Аретас патшаның уәзірі мені ұстап алмақ болып, Дамаск қаласын айналдыра қоршап алған. Алайда бауырластар мені себетке салып, қабырғадағы терезе арқылы төмен түсіріп жіберген, осылайша мен оның қолына түспей, қашып құтылғанмын.