Қорынттықтарға 1 9 - Zhana Osiet

¹ Мен де еркіндікте жүр емеспін пе? Мен Мәсіхтің елшісі емеспін бе? Мен біздің Иеміз Исаны көрдім емес пе? Менің Иеміздегі игі ісімнің жемісі сендер емессіңдер ме?

² Егер мен басқалар үшін Мәсіхтің елшісі болмасам да, сендер үшін елшімін! Себебі сендердің Иемізде болғандарың менің елшілігімнің мөрі болып табылады.

³ Міне, мені сыртымнан соттайтындардан өзімді осылай қорғаймын.

⁴ Сонымен, біздің де ішіп-жеуге қақымыз жоқ па?

⁵ Немесе басқа елшілер сияқты немесе Иеміздің бауырлары Кифа сияқты біздің де сенуші әйелдерімізді (сенуші әйелдерге үйленіп) өзімізбен бірге ертіп жүруге билігіміз жоқ па?

⁶ Әлде жалғызбасты менің не болмаса Барнабаның жұмыс істемеуге билігі жоқ па?

⁷ Қашаннан бері және қандай сарбаз әскери қызметтің шығынын өзі төлейді? Өзі отырғызып, өзі өсірген жүзімдіктің жемісінен кім жемейді? Немесе табын-табын мал бағып, малының сүтінен кім ішпейді?

⁸ Мен мұны адамның іс-әрекетіне байланысты айтып тұрмын ба? Әлде Заңда осы туралы айтылған ба?

⁹ Мұсаның Заңында: «Астық бастырып жүрген өгіздің аузын бума», -деп жазылған. Құдай осы жерде тек өгіздің қамын ойлап тұр ма?

¹⁰ Әлде осының бәрін біз үшін айтып тұр ма? Әрине, біз үшін жазылған: «Жер жыртушының да жерден өнім аламын деген үміті болу керек және астық бастырушының да өнімнен өзіне тиесілі бөлігін аламын деген үміт болуы керек».

¹¹ Егер де біз сендерге рухани нәрді егіп, тек тәнге қажетті нәрселерді ғана орып алсақ, көптік етпей ме?

¹² Ал егер де басқа біреулер сендердің үстеріңнен билік етіп жатса, онда біздің жасап жүрген билігіміз одан да биік болмай ма? Бірақ біз сол билікті қолданбаймыз, керісінше, сол нәрсе Мәсіхтің Ізгі хабарын таратуға қандай да бір кедергі әкелмесін деп, бәріне көніп, барлық жағынан ұстамды болдық.

¹³ Өздерін Құдайға бағыштап, қызмет етіп жүргендер тамақты ғибадатханадан ішетінін, ал құрбандық шалатын жерде қызмет атқарып жүргендер өз үлестерін сол құрбандық үстеліндегі құрбандықтан алатынын сендер білмейсіңдер ме?

¹⁴ Сондықтан Иеміз Ізгі хабарды таратып жүргендер де дәл солай Ізгі хабардан түсетін өнімнен өмір сүруіне нұсқау берген болатын.

¹⁵ Ал мен осы аталған нәрселердің ешқайсысын да өз пайдама қолданған емеспін. Осы туралы жазғанда да өзіме пайда келтірейін деген ой болған емес. Өйткені өзім мақтан тұтып, ұстанып жүрген қасиеттерімді біреудің аяғына таптатқанша, өлгенім артық.

¹⁶ Мен Ізгі хабарды таратып жүргеніме мақтанбаймын, себебі бұл-маған Иемізден жүктелген міндет, егер де мен Ізгі хабарды жарияламайтын болсам, онда ол маған қасірет болмақ!

¹⁷ Егер де мен мұны өз еркіммен атқаратын болсам, онда мен өзіме лайықты ақымды аламын, ал егер де еріксіз істеген болсам, онда мен сенімді адал басқарушыға айналдым.

¹⁸ Сонымен, мен қандай сыйақы аламын? Менің ұсынысым: Ізгі хабардың тегін жариялануы үшін, мен өзіме берілген билікті Ізгі хабарды таратқанда пайдаланбағаным дұрыс.

¹⁹ Мен барлық жағынан өзімді еріктімін деп санасам да, Құдайға көбірек адамдар әкелу үшін, өзімді барлық жағынан бәрінің құлы еттім.

²⁰ Сонымен, мен көптеген яһудейлерді Құдайға әкелу үшін, олар сияқты яһудей болдым. Өзім Заңның астында жүрмесем де, Заңға сүйенетіндерді Құдайға көбірек жақындату үшін, Заңға сүйенетін адамдай болып жүрдім.

²¹ Ал заңсыздармен Заңды білмейтін адам сияқты, ал Құдайдың заңымен өмір сүрмейтіндермен, керісінше, Мәсіхтің заңы бойынша жүріп, оларды да Құдайға жақындатуға тырыстым.

²² Сонымен қатар, әлсіздерді Құдайға жақындату үшін, оларға әлсіз болып көріндім. Осылай өзімді барлық жағынан бәріне құл етіп, әр түрлі жолмен біразын құтқарып қалуға тырыстым.

²³ Осының бәрін мен Ізгі хабардың абыройы үшін істедім, өйткені тек осылай істегенде ғана Оның қызметшісі бола аламын.

²⁴ Жүгіруден жарысқа шыққандардың арасынан тек біреуі ғана жүлдеге ие болатынын сендер білмейсіңдер ме? Жүлде алу үшін, сендер де жүгіруге тиіссіңдер.

²⁵ Әрбір қатысушы барлық жағынан ұстамды болуға тырысады, өйткені олардың алатын тәжі шіріп жоқ болатын (тез бұзылатын) гүл шоқтары, ал біздің алатын тәжіміз -ешқашан шіріп кетпейтін (бұзылмайтын) мәңгілік тәж.

²⁶ Міне, сондықтан мен мақсатсыз бекер жүгіріп, тек ауаны жұдырықтап жүрген біреу емеспін.

²⁷ Керісінше, Ізгі хабарды басқаларға жариялауда өзім де жүлдеге лайықсыз болмауым үшін, өз тәнімді жаттықтырып, өзіме бағындырып жатырмын.