Қорынттықтарға 1 8 - Zhana Osiet

¹ Пұтқа арналып шалынатын құрбандықтар туралы айтар болсақ, бұған байланысты бәрімізде білімнің бар екені белгілі. Алайда білімділіктен менмендік пайда болады, ал сүйіспеншілік ізгі қасиеттерді қалыптастырады.

² Егер де кімде-кім білімге қол жеткіздім деп ойлайтын болса, онда ол қалай білу керек екенін әлі де білмейді деген сөз.

³ Егер де біреу Құдайды сүйетін болса, сол Құдайдың өзінен оған білім беріледі.

⁴ Пұттарға арналған құрбандық асын жеу мәселесіне келсек, әлемдегі жалған пұттардың түкке тұрғысыз екенін, тек жалғыз Құдайдан басқа ешқандай да басқа Құдайдың жоқ екенін білеміз.

⁵ Көкте немесе осы жер бетінде құдайлар көп дейтін болсақ, онда құдайлардың соншама көп болғанындай олардың иелері де соншама көп болар еді,

⁶ алайда біздің жалғыз Құдай Әкеміз бар, себебі барлығы да, мына біз де Одан тарадық, сол үшін жаратылдық және Иеміз Иса Мәсіх те біреу, бәрі Сол арқылы жаратылды, бәрі де Одан таралды.

⁷ Алайда бәрі бұл туралы біле бермейді, себебі кейбіреулер осы күнге дейін әдет бойынша пұтқа арналған құрбандық асын бұрынғыдай жеп келеді, осы арқылы әлсіз ар-ұяттары олардың таза емес екенін сездіреді.

⁸ Біздің жеген тамағымыз бізді Құдайға жақындата алмайды. Егер де біз тамақ жемесек, оған мұқтаж болып тұрамыз, тамақ жесек, қарнымыз тоқ.

⁹ Міне, сондықтан да абай болыңдар, сендердің осы бір өздеріңе тән еркіндіктерің әлсіздерді сүріндіріп жүрмесін.

¹⁰ Егер де білімің бола тұра, біреу сені пұтқа табынушылардың ғибадатханасынан тамақ ішіп отырғаныңды көрсе, онда оның әлсіз ар-ұяты сол жалған пұтқа арналған құрбандықтың етін жеуге итермелемей ме?

¹¹ Сөйтіп, сенің білімділігіңнің кесірінен сол әлсіз адам құрып, жоғалып кетеді, ал Иса Мәсіх сенің сол бауырың үшін Өз өмірін қиып, айқышта өлген болатын.

¹² Сонымен, осылай бауырларыңа қарсы күнә жасап, оның әлсіз ар-ұятын жаралайтын болсаңдар, Мәсіхке де қарсы күнә жасайсыңдар.

¹³ Сондықтан менің жеген тағамдарым бауырымның күнә жасауына және оны азғырылуға итермелейтін болса, онда мен сол бауырымды күнәға батырып, азғырмауым үшін, мүлдем ет жемегенім жақсы болар.