Қорынттықтарға 1 7 - Zhana Osiet

¹ Сендер маған ер адам әйелге жақын келіп, оған қолын да тигізбегені дұрыс деп жазыпсыңдар.

² Әркім азғындық жолға түспес үшін, әрбір еркектің өз әйелі, ал әрбір әйелдің өз күйеуі болсын.

³ Күйеуі әйеліне, ал әйелі күйеуіне тиісті міндетін атқарсын.

⁴ Тұрмысқа шыққан әйел өз денесіне өзі билік ете алмайды, себебі билік күйеуінде, үйленген еркек те өз денесіне өзі билік ете алмайды, себебі билік әйелінде.

⁵ Сол үшін бір-біріңе деген жақын ықыластан өздеріңді айырмаңдар, тек келісіп мінәжат ететін уақытта болмаса, одан кейін тағы да бірге болыңдар, сайтанның азғыруына түспеулерің үшін, осылай істегендерің дұрыс.

⁶ Мен мұны сендерге бұйрық ретінде емес, тек өздеріңмен ниеттес болғандықтан айтып отырмын.

⁷ Негізі барлық адамдарың өзім секілді болғанын қалаймын, алайда әркімге Құдайдан берілген жеке өзіне тән сыйы бар, бұл біреуге былай болса, екінші біреуге басқаша берілген.

⁸ Осыған сүйене отырып, некесіз жүргендер мен жесірлерге айтарым: егер де олар мен сияқты жалғызбасты болса, бұл оларға жақсы болар еді.

⁹ Егер де өзін-өзі ұстай алмай бара жатса, онда үйленсін, құмарлық отына күйіп-жанып жүргенше, одан да үйленіп алғаны жақсы болады.

¹⁰ Ал үйленгендерге әйелі күйеуінен ажыраспасын деп бұйырамын, бұл бұйрық менікі емес, Иеміздікі.

¹¹ Ажырасатын болса, әйел қайтып күйеуге шықпасын немесе қайтадан күйеуімен татулассын. Сонымен қатар, күйеу де әйелін тастап кетпеуі тиіс.

¹² Қалғандарына Иеміз емес, менің айтарым мынау: егер де бір бауырымыздың әйелі сенбеуші болса және әйел онымен бірге тұруға келісімін берсе, онда ол сол әйелді тастап кетпесін.

¹³ Егер де бір әйелдің күйеуі сенбеуші болса және сол әйелмен бірге тұруға келісімін берсе, әйел де күйеуін тастап кетпесін.

¹⁴ Өйткені Құдайға сенбейтін күйеу Құдайға сенетін әйелге бағышталған, ал Құдайға сенбейтін әйел, Құдайға сенетін бауырымызға бағышталған. Әйтпесе сендердің балаларың таза болып туылмас еді, ал қазір олар киелі деп саналады.

¹⁵ Егер Құдайға сенбейтін ер адам мен әйел ажырасамыз, бөлек кетеміз десе, бөлініп кете берсін, мұндай жағдайда ер адам да, әйел де өздерін құлдықта жүргендей сезінбесін. Құдай сендерді бір-біріңмен тату болуға шақырады.

¹⁶ Қайдан білесің, мүмкін, әйел, сен күйеуіңді құтқарып алатын шығарсың? Сен, күйеу, мүмкін, әйеліңді құтқарып алатын шығарсың, кім біледі?

¹⁷ Сонымен, Иеміз әркімге қалай белгілеп қойса немесе Құдай кімді қалай шақырған болса, солай өмір сүретін болсын, бұл нұсқауды барлық қауымдарға жіберуді ұйғардым.

¹⁸ Егер де сүндеттелген біреу шақырылған болса, ол мұнысын жасырмасын. Сүндеттелмеген біреу шақырылса, онда ол сүндеттелмей-ақ қойсын.

¹⁹ Себебі сүндеттелу де, сүндеттелмеу де түкке тұрмайтын нәрсе, бәрінен маңыздысы -Құдайдың өсиетін сақтау, міне, бұл аса маңызды болып саналады.

²⁰ Сонымен, кім қандай дәрежеде шақырылса, ол сол дәрежеде қала берсін.

²¹ Егер де құл болып, құлдық дәрежеде шақырылған болсаң, сол нәрсе сені түртпектеп мазаламасын, алайда басыңа бостандық алатындай мүмкіндігің болып жатса, сол мүмкіндікті көбірек пайдалануға тырыс.

²² Өйткені Иеміз шақырған кезде құл болған адам Иемізге келгенде еркіндікке ие болады, сол сияқты еркіндікте жүріп шақырылған болсаң, онда сен енді Мәсіхтің құлы болдың.

²³ Сендерді сатып алу үшін аса бағалы құн төленді, сондықтан адамның құлы болмаңдар.

²⁴ Сонымен бауырластар, кімде-кім қандай дәрежеде шақырылған болса, Құдай алдында сол дәрежеде қала берсін.

²⁵ Тұрмыс құрмаған қыздарға байланысты Иемізден нақты нұсқау алмадым, алайда Иеміздің мейіріміне ие болғандықтан, сенімге өте адал болуға кеңес беремін.

²⁶ Бұл қазіргі кезеңдегі мұқтаждықтардың арасындағы ең маңыздысы, мұны орындау өте жақсы нәрсе деп санаймын, солай болғаны адамға да жақсы.

²⁷ Сен некелесу арқылы әйеліңе байландың, енді одан ажырасатын жолды іздеме. Егер сен (некеде болмасаң) әйелге байланбаған болсаң, онда әйел іздеме.

²⁸ Егер сен үйленетін болсаң, онда күнә жасамайсың. Егер де пәк қыз тұрмысқа шықса, ол да күнә жасамайды. Бірақ ерлі-зайыптылар көптеген қиындықтарды бастан кешетін болады, сол себепті менің сендерге жаным ашиды.

²⁹ Бауырластар, уақыт тым қысқа, сол себепті басқаша айтар болсам, әйелі барлар әйелі жоқтай,

³⁰ жылап жүргендер жыламағандай, қуанып жүргендер қуанбағандай, сатып алып жүргендер ие болмағандай,

³¹ ал осы әлемнің мүмкіндігін пайдаланып жатқандар оны пайдаланбағандай болып өмір сүрсін демекпін. Өйткені бұл әлемнің сыртқы бейнесі өткінші, ол жаныңнан лып етіп өте шығады.

³² Міне, сондықтан сендердің уайымсыз болғандарыңды қалаймын. Үйленбеген ер адам Иеміз жайлы ойлап, Иемізге қалай ұнаудың қамын жейді.

³³ Ал үйленген адам осы әлемнің қамын жеп, әйеліне қалай ұнауды ойлап, оның қызығушылығы екіге бөлінеді.

³⁴ Ал тұрмыс құрмаған пәк қыз да, әйел де Иеміздің ісін ойлап, жан-тәнімен киелі болудың жолын іздейді. Тұрмыс құрған әйел осы әлемнің қамын ойлап, қалай күйеуіне ұнауға тырысады.

³⁵ Осы айтылғанның бәрі сендерге пайдалы болғандықтан айтып отырмын және сендерді тұзаққа түсіргім (шектеп қойғым) келмейді, керісінше, өздеріңе ізгі ниет танытып, сендердің Иемізде тұрақты болғандарыңды қалаймын.

³⁶ Егер де біреу қызымның жасы жетті, оны тұрмысқа бермесем, қиянат жасармын деп ойласа, онда сол қажет деген міндетін атқарсын, жүрегі нені қаласа, соны істесін. Сонда ол күнә жасамайды, ал қыз тұрмысқа шыққысы келсе, шыға берсін.

³⁷ Егер адам өз шешімінде берік болып, мәжбүрлеуге көнбей, өз еркіне билік жүргізе алса және қызын пәк күйінде қалдыруға жүрегінде шешім қабылдаса, онда бұл әрекеті де дұрыс.

³⁸ Сонымен, өзінің қызын тұрмысқа берген де дұрыс істейді, қызын тұрмысқа бергісі келмеген де жақсы ісәрекет жасайды.

³⁹ Тұрмысқа шыққан әйел күйеуінің өмір сүретін уақыты біткенге дейін, оған байланған болып саналады, егер күйеуі өмірден өтсе, әйелдің басы бос, кімге күйеуге шыққысы келсе, өзінің еркі, тек ол адам Иемізде болсын.

⁴⁰ Егер де әйел тұрмыс құрмаймын десе, менің пікірім бойынша, онда бұл әйел одан да бақытты болмақ. Осылай айтуыма себеп: мені де Құдайдың Рухы жетелейді деп ойлаймын.