Қорынттықтарға 1 6 - Zhana Osiet

¹ Сендердің орталарыңда жүріп, біреумен болған даулы істің шешімін табу үшін, әділдер мен киелілердің сотына жүгінудің орнына, керісінше, әділетсіздердің сотына жүгінуге қалай дәттерің барады?

² Әлде сендер Құдайға бағышталып, киелі болған адамдардың бүкіл әлемді соттайтынын білмейсіңдер ме? Егер де осы әлемді соттайтын сендер болсаңдар, онда сендер кішкентай даулы ұсақ-түйек нәрсені шешуге лайықсыз болғандарың ба?

³ Әлде сендер өздеріңнің күнделікті тұрмыстағы істерді ғана емес, сонымен қатар, періштелерді де сотқа тартатындарыңды білмейсіңдер ме?

⁴ Ал енді сендер күнделікті тұрмысқа байланысты істі соттайтын болсаңдар, сол жерге де қауымдағыларды апарып отырғызып қоймақсыңдар ма? Сенушілер қауымына ешқандай қатысы жоқ осы әлемнің төрешілерін неге өздеріңнен жоғары қоясыңдар?

⁵ Сендерді ұялту үшін осылай айтуға тура келді. Сонымен, сендердің өз орталарыңнан өз бауырының даулы мәселесін шешіп беретін бірде-бір дана, ақылды адамның болмағаны ма?

⁶ Немесе бәрі керісінше бола берсін бе? Бауырластар өз араларындағы дау-дамайды шешу үшін, сенбеушілердің алдына барып, бір-бірімен соттаса берсін бе?

⁷ Сендердің осылай бір-біріңмен соттасып жүргендерің өздеріңнің төмен құлдырап кеткендеріңді білдіреді. Осындай іс-әрекет жасағанша, жәбірленуші болып қалғандарың жақсы емес пе? Одан да құр алақан қалғандарың жақсы еді ғой!?

⁸ Сендер өз бауырларыңды өздерің ренжітіп, оларды өздерің тонайсыңдар.

⁹ Сендер сондай әділетсіздік жасағандардың Құдай патшалығында мұрагерлік құқығы болмайтынын білмейсіңдер ме? Адаспаңдар! Ешқандай азғындар, пұтқа табынушылар, неке адалдығын бұзушылар, ләззат іздейтін еркектер, еркекқұмар еркектер,

¹⁰ ұрылар, дүниеқұмарлар, маскүнемдер, жалақорлар, алаяқтар Құдай патшалығынан ешқандай мұра алмайды.

¹¹ Бұрын сендердің кейбіреуің сондай болдыңдар, қазір сендер біздің Иеміз Иса Мәсіхтің атымен жуылып тазарып, Құдайға бағышталдыңдар және Құдайдың Рухымен ақталдыңдар.

¹² «Маған бәріне де рұқсат берілген», -дейтін болсақ, маған бәрі пайда әкелмейді. «Маған бәріне рұқсат берілген», -десек, алайда маған еш нәрсе өз билігін жүргізбеуі тиіс!

¹³ «Тамақ асқазан үшін, асқазан тамақ үшін жаратылған», -дейміз, бірақ уақыты келгенде, Құдай олардың екеуін де жояды. Дене азғындық үшін емес, Иеміздің даңқы үшін қажет, ал Иеміз дене үшін қажет.

¹⁴ Құдай біздің Иемізді өлімнен қайта тірілтіп алды, енді Оның күші арқылы бізді де қайта тірілтіп алады.

¹⁵ Сендер өз денелеріңнің Мәсіхтің мүшесі екенін білмейсіңдер ме? Сол Мәсіхке тиесілі мүшені алып, азғындықтың мүшесі етіп бергенім дұрыс па? Олай істеуге болмайды!

¹⁶ Сол азғын жезөкшеге қосылған дене онымен бірге бір дене болып кететінін сендер білмейсіңдер ме? «Екеуі бірігіп бір дене болады», - деп Жазбада жазылған.

¹⁷ Ал Иемізбен қосылған Иеміздің Рухымен бірігіп, бір рухта болады.

¹⁸ Неке адалдығын бұзатын азғындықтан аулақ болыңдар. Егер де адам барлық басқа күнәларын денеден тыс жасайтын болса, күнә болып саналады, жыныстық азғындық-өз денеңе қарсы жасалған күнә.

¹⁹ Сендер өздеріңе берілген денелеріңнің Құдайдың Киелі Рухы мекендейтін ғибадатхана екенін және сендер енді өздеріңдікі емес, басқа Біреуге тән екендеріңді білмейсіңдер ме?

²⁰ Себебі сендер өте қымбат бағамен сатып алындыңдар, сондықтан өз денелеріңде Құдайды мадақтаңдар.