Қорынттықтарға 1 5 - Zhana Osiet

¹ Сендердің араларыңда азғындықтың бар екені туралы естідік, тіпті, біреу әкесінің әйелімен (өгей шешесімен) тұрады екен, ал мұндай азғындық өзге ұлттарда болған емес.

² Ал сендер кеуделеріңді көтеріп, тәкаппарлық көрсетесіңдер! Керісінше қайғырып, осыны істеген адамды орталарыңнан шығарып тастағандарың жөн емес пе?

³ Мен тәніммен сендердің араларыңда болмасам да, рухыммен жандарыңдамын, сондықтан мен осыны істеген адам туралы мынадай шешім қабылдадым:

⁴ біздің Иеміз Иса Мәсіхтің атымен жиналғанда, менің рухым сендермен бірге, сонда біздің Иеміз Исаның күші де бізбен бірге,

⁵ сол адамның тәнін өлтіру үшін, сайтанның қолына тапсыру керек, сонда оның жаны тек Иеміздің қайтып келетін күні құтқарылатын болады.

⁶ Сендер соншама мақтанып кеттіңдер, бұл жақсылық емес. Әлде сендер азғана ашытқының бүкіл қамырды ашытатынын білмейсіңдер ме?

⁷ Бойларыңнан сол бір ескі ашытқыны тазалап, алып тастаңдар, сонда жаңа қамырға, яғни, ашымаған нанға айналасыңдар. Мәсіх бізді құтқару үшін, Өзі құрбандыққа шалынды, құрбандық тоқтысы болды.

⁸ Сондықтан, кәнеки, енді ескі әрі зұлымдықты ашытатын кесірлі ашытқымен емес, керісінше, тазалықтың, шындықтың ашымаған нанымен тойлайық.

⁹ Мен өзімнің хатымда сендердің неке адалдығын бұзып, азғындықпен айналысатындармен араласпауларыңды жазған едім,

¹⁰ осы әлемдегі неке адалдығын бұзатын азғындардың бәрімен немесе дүниеқор және тонаушылармен, пұтқа табынушылармен араласпаңдар деген нұсқау бермедім, егер олай болса, осы әлемді мүлдем тастап кету сендердің міндеттерің болар еді.

¹¹ Егер де кімде-кім бауырлас атанғанмен, неке адалдығын бұзып, азғындыққа салынса немесе дүниеқор болып, пұтқа табынатын болса, жалақор немесе ішімдікке салынып, мас болса немесе алаяқтықпен айналысса, сондайлармен араласпауды сендерге қазір айтамын. Олармен бірге отырып тамақ та ішпеу керек екенін жазған болатынмын.

¹² Өйткені менің қауымнан тыс сыртта жүрген оларды соттағаным дұрыс па? Өз орталарыңда болып жатқанды соттап, шешім шығаратын мына сендер емессіңдер ме?

¹³ Ал қауымнан тыс жүргендерді Құдайдың Өзі соттайды, орталарыңда жүрген зұлымды өз араларыңнан аластатыңдар.