Қорынттықтарға 1 4 - Zhana Osiet

¹ Сонымен, бізді Құдай үйінің құпиясын басқаруға сеніп тапсырылған Мәсіхтің қызметшілері ретінде қабылдаңдар.

² Қазіргі уақытта әрбір үй басқарушының бойында сенімділік пен адалдық қасиет болуы қажет.

³ Сендер немесе басқа біреу мені соттай ма, соттамай ма, тіпті, күнде солай істесе де, мені бұл нәрсе еш мазаламайды. Мен де өз-өзімді соттамаймын.

⁴ Менің арым таза, алайда мен мұнымен ақтала алмаймын. Бізді соттайтын Иеміз бар, мені соттайтын- Сол.

⁵ Сондықтан Иеміз келіп, түнектің құпия істерін жарыққа шығарып, жүректердің қалауын ашып көрсететін уақыты келмей жатып, ешкімді де соттамаңдар, өйткені сол кезде әркім Құдайдан өзіне тиісті мақтау сыйын алатын болады.

⁶ Сондықтан бауырластар, мен өзіме де, Аполлосқа да: «Жазбада жазылғаннан артық нәрсеге бармайық», -деген талап қойдым. Осылай мен өзімді өзгерттім, бұл сендерге де үлгі болсын, сонда сендер бір-біріңе қарсылық білдіріп, өздеріңді басқалардан жоғары қоймайтын боласыңдар.

⁷ Кім сені басқалардан ерекше етіп жаратты? Сен неменеге ие болмай, нені ала алмай қалдың? Егер де алған болсаң, онда неменеге ештеңе алмағандай болып, көкірегіңді керіп жүрсің?

⁸ Сендер әлдеқашан тойынып, байып алдыңдар. Сендер бізсіз-ақ патшалық құрып алдыңдар. Шіркін, егер де сендер шынымен солай патшалық құрып алған болсаңдар ғой, онда біз де сендермен бірігіп, сол патшалықты бірге құрар едік!

⁹ Құдай біз секілді Мәсіхтің елшілерін өлімге кесілген ең соңғы адамдар сияқты көрсетіп тұрған секілді, сондықтан біз осы әлем мен періштелерге, жалпы жұртқа қойылатын көрініске айналдық.

¹⁰ Біз Мәсіх үшін «ақымақ» болсақ, сендер Мәсіхте «ақылды» екенсіңдер. Біз «әлсіз» болсақ, сендер «күшті» болып кетіпсіңдер. Сендер құрметке лайық болсаңдар, біз жеккөрінішті әрі жексұрын екенбіз.

¹¹ Біз осы уақытқа дейін аштықты басымыздан өткеріп, шөлдеп, жалаңаш жүрміз, бізді ұрып-соғады, басымызда баспанамыз да жоқ,

¹² нанымызды еңбекпен тауып жейміз. Қарғайтындарды батамен жарылқаймыз, қудалайды, ал біз соған төземіз.

¹³ Тіл тигізіп, балағаттайтындарға мейіріммен жауап береміз. Сөйтіп, осы әлемнің қоқысына айналдық, қазірге дейін бізге сыпырынды қоқыс ретінде қарайды.

¹⁴ Мұны мен сендерді ұялту үшін емес, керісінше, өзімнің сүйікті балаларыма берген ақылым деп айтып, жаздым.

¹⁵ Сендерді Мәсіхке тәрбиелеп жүрген ұстаздарың он мың болса да, әкелерің көп емес. Ізгі хабар тарату арқылы Иса Мәсіхке деген сенімде мен сендердің әкелерің болдым ғой.

¹⁶ Сондықтан мен сендерден маған еліктеп, менен үлгі алуларыңды өтінемін.

¹⁷ Сол үшін өзімнің сүйікті балам әрі Мәсіхтегі сенімді серігім болып жүрген Тимотені сендерге жіберіп отырмын. Ол сендерге менің Мәсіх Исадағы жолымның қандай болғанын және барлық жерде әр қауымға Мәсіх туралы қалай тәлім беріп, үйреткенімді айтып беретін болады.

¹⁸ Мен сендерге біраз уақыттан бері бармай қалғандықтан, араларыңдағы кейбіреуіңде тәкаппарлық пайда болыпты.

¹⁹ Егер де Иеміздің қалауы болса, жақын арада сендерге барып қайтамын, сонда тәкаппарлардың сөйлеген сөзін емес, күшін сынап көремін.

²⁰ Құдай Патшалығы тек сөзде емес, керсінше, Оның құдіретті күшінде.

²¹ Ал енді нені қалайсыңдар? Өздеріңе таяқпен келейін бе әлде сүйіспеншілік танытып, кішіпейіл рухпен келейін бе?