Қорынттықтарға 1 3 - Zhana Osiet

¹ Мен өздеріңмен рухани бауырластар ретінде сөйлесе алмадым, керісінше, әлі де тәндік болмыспен жүрген Мәсіхтегі сәбилер ретінде сөйлесуіме тура келді.

² Сондықтан мен сендерге тамақ берудің орнына сүт бердім, өйткені сендер әлі де тамақ жей алмайтын күйде болдыңдар. Сендер қазір де оны жей алмайсыңдар,

³ себебі тәннің жетегінде жүрсіңдер, сол себепті араларыңда қызғаныш пен дау -дамай бар, бұл тәндік болмыс емей немене? Бұл адами тұрғыда жасалған іс-әрекет емес пе?

⁴ Өйткені біреуің: «Мен-Пауылдікімін», -десең, тағы біреуің: «Мен-Апполостікімін», -дейді екенсің. Бұл осы әлемнің адамдарының жасайтын іс-әрекеті емес пе?

⁵ Апполос деген кім? Пауыл деген кім? Олар тек Құдайдың қызметін атқарып жүрген қызметшілер болып саналады, өйткені сендер солар арқылы сенімге ие болдыңдар, олардың әрқайсысына сол қызметті Иеміз берді.

⁶ Қысқасы, мен отырғыздым, Аппалос суғарды, бірақ өсірген-Құдай.

⁷ Өсіретін Құдай болғандықтан, отырғызушының да, суғарушының да атқарған ісі түкке тұрғысыз деуге болады.

⁸ Алайда отырғызушы мен суғарушының атқарған ісі бір болғандықтан, олардың әрқайсысы өз еңбектеріне тиісті ақыларын жеке-жеке өз уақытында алатын болады.

⁹ Біз Құдайдың қызметін Құдайдың қатысуымен және Онымен бірге атқаратын қызметшілері деп саналамыз, ал сендер Құдайдың егістігі әрі Құдайдың құрастырып тұрғызатын құрылысы болып есептелесіңдер.

¹⁰ Сондықтан Құдайдың өзіме берген рақымына сай, мен ақылды сәулетші секілді құрылыстың негізгі іргетасын тұрғыздым, ал басқалары құрылысты соның үстіне қалауда. Сол себепті әркім өзінің құрылысын қалай қалап, жүргізіп жатқанына мұқият көз жүгіртіп қарасын.

¹¹ Құрылыстың негізгі іргетасы-Иса Мәсіх, Одан бөлек басқа бір іргетасты ешкім де негіз етіп сала алмайды.

¹² Егер де кімде-кім сол негізгі іргетастың үсіне алтыннан, күмістен немесе аса қымбат тастардан, не болмаса тақтайдан, шөптен немесе қамыстан құрастырып салатын болса,

¹³ онда әркімнің атқарған ісінің сапасы соңғы күні жарыққа шығатын болады, себебі әрбір істің сапасы отпен сыналады.

¹⁴ Егер де кімнің құрастырып тұрғызғаны оттан жойылмай, аман қалса, онда ол өзіне тиісті ақысын алады.

¹⁵ Ал егер де жанып кетсе, ол шығынға батады деген сөз, алайда оның өзі оттан құтылады, бірақ оттан өткендей әзер құтқарылады.

¹⁶ Әлде Құдай Рухының өздеріңде өмір сүріп жатқанын және өздеріңнің Құдайдың ғибадатханасына айналғандарыңды білмейсіңдер ме?

¹⁷ Егерде кімде-кім Құдайдың ғибадатханасын қиратып, құлататын болса, онда Құдай оның өзін қиратып, құлатады, өйткені Құдайдың ғибадатханасы киелі болып саналады, ал сендер сол ғибадатханаға айналдыңдар.

¹⁸ Ешкім өзін-өзі алдамасын. Егер араларыңдағы кейбіреу осы әлемге ақылды, дана болып көрінгісі келсе, нағыз даналыққа ие болу үшін, керісінше, ақылсыз, ақымақ болсын.

¹⁹ Өйткені осы әлемнің даналығы-Құдайдың көзімен қарағанда ақымақтық. Жазбада: «Құдай өздерін ақылды, данышпан санайтындардың зұлым қулықтарынан-ақ ұстап алады», - деп жазылған.

²⁰ Және тағы да: «Иеміз данышпанбыз дегендердің ой -өрістерінің бос әрі бекер әурешілік екенін біледі», -делінген.

²¹ Сондықтан ешкім адамдар алдында мақтанбасын. Сендерге бәрі де тиесілі:

²² мейлі Пауыл, Аполлос, мейлі Кифа (Петір) болсын, мейлі осы әлем, өмір немесе өлім болсын, осы кез немесе болашақ болсын, бәрі тек сендердікі болып қала береді,

²³ сендер өздерің Мәсіхтікі болып қаласыңдар, ал Мәсіх Құдайдікі.