Қорынттықтарға 1 2 - Zhana Osiet

¹ Бауырластарым, мен өздеріңе келіп, Құдайдың құпиясын жариялағанымда шешен сөзді немесе даналықтың ерекше бір артықшылықтарын пайдаланбадым.

² Сендермен бірге болған сәттерімде тек Иса Мәсіх пен Оның айқышы туралы білуді және сол туралы ғана айтуды қажет деп таптым.

³ Сендердің орталарыңда болған сәтте мені әлсіздік пен қорқыныш билегендіктен, көп мазасыздандым.

⁴ Бірақ та сөйлеген сөзім мен айтқан уағызымда адамның даналығын айқындайтын сөздерге емес, керісінше, Рухтың жетегі мен күшіне сүйендім.

⁵ Менің көздеген мақсатым сендердің сенімдеріңді адамның даналығына емес, қайта, Құдайдың күшіне негіздеп бекіту болатын.

⁶ Біз кемелді болғысы келетіндерге даналық жайлы айтып бере аламыз, алайда біздің айтып жүргеніміз осы әлемнің немесе осы әлем билеушілерінің даналығы емес, өйткені олар құрдымға кетіп, еш пайдаға аспай, жоқ болады.

⁷ Біз жариялап жүрген даналық-бұл осы уақытқа дейін жасырын болып келген Құдайдың құпия даналығы. Міне, біз осыны жариялап жүрміз, Құдай оны біздің даңқымыз үшін осы әлем жаратылмастан бұрын оны белгілеп, бекітіп қойған.

⁸ Осы әлем билеушілерінің ешқайсысы да бұл туралы білген емес, егер де олар мұны білген болса, онда Құдайдың даңқына бөленген біздің Иемізді айқышқа шегелемес еді.

⁹ Бұл туралы Жазбада: «Құдайдың Өзін сүйетіндерге не дайындап қойғанын ешбір көз көрмеді, ешбір құлақ естімеді және бұл ешбір адамның жүрегіне де келген емес», -деп қалай жазылған болса, дәл солай болып тұр.

¹⁰ Құдай сол құпия болған нәрсені тек Өзінің Рухы арқылы бізге ашып берді, өйткені Рух бәрін зерттеп, тексереді, Ол Құдайдың еркін терең ұғынып, түсінеді.

¹¹ Себебі адамдардың қандай рухпен жүргенін тек адамның өз рухынан басқа кім біле алады? Құдайдың Рухымен де сол сияқты, яғни, Өзінің Рухынан басқа ешкім де Құдайдың Рухын (ой-ниетін) біле алмайды.

¹² Біз осы әлемнің рухын емес, Құдайдың рухын қабылдағанымызды білеміз, сол арқылы Құдайдың бізге не сыйлағысы келетінін де білетін боламыз.

¹³ Сондықтан біз оқымысты адамдардың сөздеріне сүйеніп айтылатын даналық туралы айтпаймыз, керісінше, рухани нәрсені рухани тұрғыда салыстыра отырып оқытып, бізге үйрететін Рухтың сөзімен айтамыз.

¹⁴ Өзінің ішкі жан дүниесінен шығатын сезімге беріліп, соның жетегімен жүретін адам Құдайдың Рухынан келгенді қабылдай алмайды, өйткені ол мұны ақымақтық деп санайды, сондықтан ол Құдайды жақыннан танып -біле алмайды, мұны тек рухани тұрғыда ойлап, талқылау қажет.

¹⁵ Тек сонда ғана ол рухани тұрғыда талданып, өз шешімін табады, оны ешкім өз бетінше шеше алмайды.

¹⁶ «Кім Иеміздің ақыл-ойын жақыннан танып біліп, кім Оған кеңес бере алады?» Бізде Мәсіхтің ақыл-ойы бар.