Қорынттықтарға 1 14 - Zhana Osiet

¹ Сондықтан сүйіспеншіліктің жолын қуыңдар, рухани дарындарға ие болуға құштар болып, соған жан сала ұмтылыңдар, әсіресе, пайғамбарлық дарынға көбірек көңіл бөліңдер.

² Бөтен тілде сөйлейтін адам адамдарға емес, Құдайға айтады, өйткені құпия нәрселерді рухпен айтатындықтан, оны ешкім түсіне алмайды.

³ Пайғамбарлық сөз адамдарды нығайту (жігерлендіру) үшін әрі ақыл-кеңес беріп, жұбату үшін айтылады.

⁴ Сонымен, бөтен тілде сөйлейтін адам өзін-өзі нығайтады, пайғамбарлық дарыны бар адам қауымды нығайтады.

⁵ Барлықтарыңның бөтен тілде сөйлегендеріңнен гөрі, көбірек пайғамбарлық сөз айтқандарыңды қалаймын, өйткені тек бөтен тілде сөйлейтін адамның айтқан сөзінің мәнін ашып, түсіндіріп беретін мүмкіндік болмаса, онда қауымды нығайту үшін айтылатын пайғамбарлық сөздің әкелетін пайдасы әлдеқайда зор.

⁶ Бауырластар, егер де мен сендердің орталарыңа барып, (бөтен тілде сөйлесем), бірақ сендерге ештеңе ашылмаса не білім бермесем, пайғамбарлық сөз айтпасам не тәлім бермесем, онда мен сендерге қандай пайда әкелмекпін?

⁷ Егер де дыбыс шығаратын жансыз заттардың өзі, атап айтқанда, сыбызғы немесе ішекті аспап болсын, олардың шығаратын әуендерінің арасында ешқандай айырмашылық болмаса, онда сол сыбызғы мен ішекті аспаптың қандай әуен шығарып жатқанын қалай білуге болады?

⁸ Егер де керней өз үніне лайықсыз немесе түсініксіз дыбыс шығаратын болса, онда соғысқа дайындалуға кім дайындық жасай алады?

⁹ Сол секілді сендер де тіл арқылы шығатын сөздеріңді түсінікті етіп айтпасаңдар, не айтып жатқандарыңды қалай түсінуге болады? Онда сендердің айтқандарыңның бәрі желге ұшқанмен бірдей болады.

¹⁰ Осы әлемде неше түрлі дыбыстар бар, алайда олардың бәрі дыбысы жоқ (үн мен салдырдан тұратын) дауыссыз дыбыстар емес.

¹¹ Егерде мен сол дыбысты нақты айтпасам, онда мен жатжерлік адаммен сөйлесіп тұрғандай боламын, сөйтіп, менің сол жат тілде не сөйлегенімді ешкім ажырата алмайтын болады.

¹² Міне, сондықтан сендер рухани дарындарға құштар болып, жан сала ұмтылыңдар, қауымды нығайтатын дарындарды молынан игеріп, соған ие болатын жолды іздеңдер.

¹³ Басқа тілде сөйлейтін адам өзінің не туралы айтқанын басқаларға нақты ашып, түсіндіріп беруі үшін мінәжат етсін.

¹⁴ Мен басқа тілде мінәжат ететін болсам, менің рухым ғана мінәжат етеді, ал менің ой-санам жеміссіз қалып қояды.

¹⁵ Сонда менің не істеуім қажет? Рухпен де, ой-санаммен де мінәжат етіп, Забур жырларын рухпен, ой-санаммен айту-менің негізгі мақсатым.

¹⁶ Егер де сен Рухпен бата беріп, жарылқағанда, сенің қасыңда тұрған қарапайым адам сенің айтып жатқаныңды түсінбесе, ол сені қалай «Аумин!» деп қолдайды?

¹⁷ Әрине, сенің жарылқап, бата беріп, алғыс айтқаның жақсы, бірақ бұл басқа біреуді нығайтып, жетілдірмейді.

¹⁸ Мен өзім сендерден гөрі басқа тілде көбірек сөйлей алатыным үшін, Құдайға алғысымды білдіремін.

¹⁹ Бірақ мен басқа тілде он мың сөз айтқанша, ой-санаммен бес сөз айтып, қауымды да, басқаларды да нығайтқаным дұрыс болар еді.

²⁰ Бауырластар, ой-саналарың ақылы толмаған баланікіндей болмасын. Сендер зұлымдықпен бетпе-бет келгенде жас нәрестедей болыңдар, ал ақылға келгенде естияр адамдай кемелді болуға тырысыңдар.

²¹ «Бұл халыққа Мен бейтаныс тілдермен де, басқалардың аузымен де сөйлейтін боламын, соның өзінде олар Маған мойынсынбайтын болады», -деп Жаратқан Иеміз Жазбада айтқан.

²² Сондықтан бөтен тілдер сенушілерге емес, сенбеушілерге арналған керемет бір белгі, ал пайғамбарлыққа келсек, бұл сенбеушілерге емес, сенушілерге арналған керемет белгі.

²³ Егер де бүкіл қауым бірге жиналған кезде, бәрі басқа тілдерде сөйлейтін болса, онда сол жерге келген қарапайым адамдар да, сенбеушілер де: «Мыналардың естері ауысқанау», - демей ме?

²⁴ Егер де бәрі жиналып, пайғамбарлық сөз айтып жатқанда, сол жерге сенбеуші немесе қарапайым адам кіретін болса, олар әрқайсысының айтқаны арқылы әшкереленеді және Құдайдың алдында өздерінің айыпты (күнәкар) екендерін түсінеді.

²⁵ Сонда олардың жүректеріндегі құпия сырлары ашылып: «Сендердің араларыңда, шынымен, Құдай бар екен!» -дейтін болады, сөйтіп, олар тізелерін бүгіп, Құдайға құрмет көрсететін болады.

²⁶ Бауырластар, сонымен не болды? Сонымен, сендер жиналған кезде, біреуіңе (мадақтау) Забур жыры берілсе, біреуіңе тәлімгерлік, біреуіңе ашылу, аян, біреуіңе бөтен тілде сөз, біреуіңе соны нақты түсіндіріп беретін дарын берілген болса, осының бәрі тек адамдарды нығайтып, жігерлендіру үшін болсын.

²⁷ Егер де кімде-кім, мейлі, екеуі немесе үшеуі бөтен тілде кезектесіп сөйлеп, біреуі соны жартылай болса да, түсіндіріп беретін болсын.

²⁸ Егер де анықтап түсіндіріп беретін біреу болмаса, онда қауымдағылар үндемесін, айтқысы келгенін ішінен Құдайға айтсын.

²⁹ Араларыңда пайғамбарлар болса, олардың тек екеуі немесе үшеуі ғана сөйлейтін болсын, қалғандары оның айтқандарын тексеріп, өзара талқыласын.

³⁰ Егер сол жерде отырғандардың біреуіне бір нәрсе ашылып, аян алса, онда алғашқы сөйлеген адам үндемесін.

³¹ Себебі бәрі бірдей тәлім алып, жігер алсын десеңдер, пайғамбарлық сөзді біріңнен кейін бірің кезек-кезек айта берулеріңе болады.

³² Сонда Құдайдың пайғамбарларының рухы тек олардың өздеріне бағынатын болады.

³³ Біздің Құдай тәртіпсіздіктің Құдайы емес, Ол-бейбіт тыныштықтың Құдайы. Енді Құдайға бағышталған қауымдардың бәріне берілген нұсқауға сай айтарым:

³⁴ әйелдер үндемесін, өйткені оларға сөйлеуге рұқсат берілмейді, Заңда бұл туралы қалай айтылған болса, олар соған бағынатын болсын.

³⁵ Бір нәрсе үйренгілері келсе, үйге барғанда өз күйеулерінен сұрап алсын, өйткені әйелдің қауымда сөйлегені ұят болады.

³⁶ Құдайдың сөзі (алғаш рет) мына сендерден шығып па еді? Әлде тек сендер үшін ғана келіп пе еді?

³⁷ Егер де араларыңдағы біреу өзін пайғамбар немесе рухани жетілген адам ретінде көретін болса, онда ол менің осы жазғанымды Жаратушы Иеміздің өсиеті деп қабылдайтын болсын.

³⁸ Егер кімде-кім бұл жайлы білгісі келмесе, білмей-ақ қойсын. (Кім мұны мойындағысы келмесе, сендер де оны мойындамаңдар).

³⁹ Сонымен, менің бауырластарым, пайғамбарлық сөз айтуға ұмтылыңдар, алайда басқа тілде сөйлеуге де кедергі жасамаңдар.

⁴⁰ Дегенмен, барлығы ізгілікпен әрі тәртіпке сай кезеккезегімен орындалуы тиіс.