Қорынттықтарға 1 13 - Zhana Osiet

¹ Егер де мен адамдардың немесе періштелердің тілдерінде сөйлей алатын болсам, алайда менде сүйіспеншілік болмаса, онда мен қоңыраулы мыс немесе сыңғырлаған асатаяқ (кимвал) секілді боламын.

² Егер менде пайғамбарлық дарын болып, барлық құпиялар мен бүкіл білімді меңгерсем де, орнынан тауды қозғалтатындай сенімім болса да, бірақ менде сүйіспеншілік болмаса, онда мен түкке де тұрмаймын.

³ Егер де мен бүкіл дүние-мүлкімді елге (мұқтаждарға) таратып берсем және өзім мақтауға лайық болу үшін, өз денемді қиып бергеннің өзінде, менде сүйіспеншілік болмаса, онда бұл да маған ешқандай пайда әкелмейді.

⁴ Сүйіспеншілік бәріне де шыдайды, сүйіспеншілік тек жақсылық жасайды, ол не қызғанбайды, не мақтанбайды және паңданбайды,

⁵ ол не жүгенсіз (дөрекі) емес, өз пайдасын іздемейді, ашуға берілмейді, жамандық ойламайды.

⁶ Әділетсіздікке емес, тек шындыққа қуанады.

⁷ Барлығын бүркемелеп, жауып тұрады, бәріне сенеді, бәріне үміттенеді, бәріне шыдайды.

⁸ Мүмкін, пайғамбарлық тоқтайтын шығар, тілдер де жойылар, білім де қысқарар, ал сүйіспеншілік ешқашан жойылмайды.

⁹ Біздің білетініміз де толық емес, әрі біздің пайғамбарлығымыз да жарым жартылай ғана

¹⁰ ал кемелділік келген кезде, сол жарым жартылай болғанның бәрі жойылатын болады.

¹¹ Мен балалық шағымда бала тілімен сөйлеп, бала сияқты ойлап, бала сияқты пайымдайтынмын, енді есейіп, азамат болған кезде, балалығымның бәрі артта қалды.

¹² Қазір біздің көріп жүргеніміз күңгірт айнадан көргендей бұлдыр бейне ғана, ал сол уақытта бір-бірімізді бетпебет көретін боламыз. Қазіргі менің білетінім де жартылай ғана, сол кезде Құдай мені қалай білетін болса, мен де солай Оны танып-білетін боламын.

¹³ Сонымен, мына үшеуі нақты мәңгіге қалады: сенім, үміт, сүйіспеншілік. Осылардың арасындағы ең үлкені (маңыздысы) - сүйіспеншілік.