Қорынттықтарға 1 12 - Zhana Osiet

¹ Бауырластар, рухани дарындар туралы сендердің білгендеріңді қалаймын.

² Бір кездері сендер басқа ұлт ретінде өз беттеріңмен бөлек жүргенде, тілсіз пұтқа табынып, соның жетегіне ергендеріңді өздерің де білесіңдер.

³ Сол үшін де сендер мынаны біліп алсаңдар екен: Құдайдың Рухымен сөйлейтін адам Исаға қарсы ешқандай қарғыс сөз (анафема) айтпайды, Киелі Рухтың көмегінсіз ешкім де Исаны Ием деп айта алмайды.

⁴ Әр түрлі дарындар бар, ал Рух-Біреу.

⁵ Алуан түрлі қызметтер бар, Иеміз-Біреу.

⁶ Әр түрлі іс-әрекеттер бар, алайда Құдай-Біреу, Құдай әрбір жағдайда әр түрлі әрекет етеді.

⁷ Сондықтан әркімге Рух ортақ істе игілікті болу үшін беріледі.

⁸ Міне, сондықтан біреуге Рухтан даналық сөз берілсе, басқасына сол Рух арқылы білімді сөз беріледі.

⁹ Сол Рухтан біреуге сенім берілсе, Сол Рухтан басқа біреуге сауықтыру дарыны беріледі.

¹⁰ Кейбіреуге іс-әрекет жасайтын күш-қуат берілсе, тағы біреуіне пайғамбарлық, енді біреуге рухтарды ажырату, басқасына неше түрлі тілдерде сөйлеу дарыны, әлдекімге сол тілдерде айтылғандарды түсіндіру дарыны беріледі.

¹¹ Осының бәрін іске асыратын-Сол бір Рух және әрқайсысына сол дарындарды өз қалауынша бөліп беретін де - Сол бір Рух.

¹² Егер де біз денені алып қарайтын болсақ, оның көптеген мүшелері бар, оның мүшелері қаншама көп болғанымен, барлығы бірігіп, бір денені құрайды, Мәсіхтің денесімен де дәл солай.

¹³ Мейлі яһудей немесе грек болсын, мейлі құлдар немесе бостандықта жүргендер болсын, бәріміз Сол бір Рух арқылы бір денеге батырылып, бір Рухтан сусындадық.

¹⁴ Сонымен, денеде бір ғана мүше емес, көптеген мүшелері бар дедік.

¹⁵ Егер де аяқ: «Мен қол емеспін, сондықтан мен дене мүшесіне жатпаймын!» -дейтін болса, ол бәрібір сол дененің мүшесі емес пе?

¹⁶ Егер де құлақ: «Мен көз емеспін, сондықтан мен денеге жатпаймын!» -дейтін болса, ол да бәрібір сол денеге жатпай ма?

¹⁷ Егер де бүкіл дене тек көзден ғана тұратын болса, онда есту қабілеті қайда болады? Егер де бүкіл дене тек есту қабілетінен тұратын болса, онда иіс сезу қабілеті қайда болады?

¹⁸ Құдай Өзінің қалауымен әрбір мүшені денеге орын -орнымен орналастырып қойды.

¹⁹ Егер де олардың бәрі тек бір ғана мүше болса, онда дене қайда болар еді?

²⁰ Енді қазіргі жағдайға келер болсақ, көптеген мүше бір денені құрап тұр.

²¹ Сондықтан көз қолға: «Мен саған мұқтаж емеспін!» -деп айта алмайды, сол секілді бас та аяққа: «Мен сендерге мұқтаж емеспін!» - деп айта алмайды.

²² Сол себепті де денеге керек деген көп мүшелерден гөрі әлсіз мүшелер өте қажет болуы мүмкін.

²³ Денедегі кейбір құрметке лайықсыз деген мүшені біз көбірек бағалаймыз, ал мән бермей, құнсыз деп есептеген дене мүшелеріміз үлкен құрметке ие болады,

²⁴ алайда біздің сол аса құнды деп санап жүрген мүшеміз құрметке сондай мұқтаж да емес. Құдай денені жаратқан кезде, сол құрметке мұқтаж болған мүшені көбірек қамқорлыққа алу үшін жаратты,

²⁵ сол кезде денеде өзара бөліну болмайды, керісінше, олар бір-біріне қомқорлық көрсететін болады.

²⁶ Егер де бір мүше қиналатын болса, онымен бірге барлық мүше азап шегеді, ал бір мүше даңқталатын болса, онымен бірге барлық мүше қуанатын болады.

²⁷ Сонымен, сендер Мәсіхтің денесі болдыңдар әрі Оның денесінің бір-бір мүшесісіңдер.

²⁸ Сондықтан Құдай қауымға біріншіден елшілерді, екіншіден пайғамбарларды, үшіншіден тәлімгерлерді берді. Одан кейін кереметтер жасайтын күш, сосын сауықтыру дарындарын, (мұқтаждарға) жәрдем берушілерді, басқарушыларды, біреулерге түрлі тілдерді берді.

²⁹ Алайда бәрі бірдей елші ме? Бәрі бірдей пайғамбар ма? Бәрі бірдей тәлімгер ме? Бәрі бірдей күшті ме?

³⁰ Дарындардың бәрі бірдей сауықтыра ала ма? Бәрі бірдей тілдерде сөйлей ала ма? Бәрі бірдей осы тілдерді түсіндіріп бере ала ма?

³¹ Ең бастысы ең үлкен (маңызды) дарындарға ие болуға ұмтылыңдар. Соған ие болатын ең жақсы жолды мен сендерге көрсетіп берейін.