Қорынттықтарға 1 11 - Zhana Osiet

¹ Мен Мәсіхке қалай еліктесем, сендер де солай еліктеңдер.

² Менің өздеріңе тапсырған тәлімімді естеріңде сақтап, қолданып жүргендерің үшін, сендерді мақтап жүремін.

³ Мына нәрсені біліп алғандарыңды қалаймын: әрбір еркектің басы-Мәсіх, әйелдің басы-күйеуі, Мәсіхтің басы Құдай.

⁴ Кез-келген еркек басын жауып мінәжат етсе немесе басын жауып пайғамбарлық сөз айтатын болса, онда ол өз қадірін өзі кетіреді.

⁵ Кез-келген әйел басын жаппай мінәжат етсе не болмаса пайғамбарлық сөз айтатын болса, онда ол өз қадірін өзі түсіреді. Бұл оның басындағы шашын тақырлатып алып тастағанмен бірдей.

⁶ Егер әйел адам басын жаппайтын болса, онда шашын тақырлап алып тастасын, егер де әйел адам шашын тақырлап алып тастағанды (тақырбас болып жүргенді) ұят деп санаса, онда басын орамалмен жауып жүрсін.

⁷ Ер адам басын жауып жүруге міндетті емес, өйткені ер адамның бойынан Құдайдың бейнесі мен даңқы көрінеді. Әйел адам күйеуінің даңқы болып табылады.

⁸ Өйткені ер адам әйелден емес, керісінше, әйел ер адам арқылы пайда болды,

⁹ ер адам әйел үшін емес, әйел ер адам үшін жаратылған.

¹⁰ Міне, сондықтан да әйел адамның міндеті өзінің биліктің астында жүргенін періштелерге білдіру үшін, басын жауып жүруі тиіс.

¹¹ Алайда Иемізбен бірлікте әйел адам ер адамсыз немесе ер адам әйел адамсыз (бір-бірінен тәуелсіз) бола алмайды.

¹² Себебі әйел ер адамнан жаратылса, ер адам әйел арқылы жаратылған, бірақ бәрін Құдай жаратқан.

¹³ Өздерің ойланып қараңдаршы, егер әйел адам Құдайға мінажат еткен кезде, басын орамалмен жаппаса, бұл оған жараса ма?

¹⁴ Егер ер адам шашын жалбыратып, ұзын етіп өсіріп жіберсе, онда айналаның өзі-ақ оны қадірсіз, масқара етіп көрсетпей ме?

¹⁵ Егер де әйел өзінің шашын өсіретін болса, онда бұл оның әдемі көркі емес пе? Әйелге берілген сол шаш, оның басын жабатын жамылғы болып табылады.

¹⁶ Кімде-кім осы жайлы талас-тартыс тудыратын болса, оларға айтарымыз мынау: мұндай әдет-ғұрып біздің де, Құдайдың да қауымдарында болған емес.

¹⁷ Алайда бұл берілген нұсқау ғана, бірақ сендердің іс-әрекеттеріңді жақсы деп мақтай алмаймын, керісінше, сендер жаман нәрселерді істеу үшін жиналатын сияқтысыңдар.

¹⁸ Өйткені сендер қауым болып алғаш жиналып жүрген кезде, сендердің араларыңда жікке бөлінудің бар екенін естідім. Осы жағдайдың ішінара болғанына мен сенемін.

¹⁹ Сендердің сенімдеріңнің берік екенін анықтау үшін, осындай әр түрлі ой-пікірлер араларыңда айтылуы қажет.

²⁰ Сонымен қатар, сендер бірге жиналған кезде, Иемізге арналған кешкі асты да бірге отырып ішіп-жемейді екенсіңдер.

²¹ Әркім өзі әкелген тамағын жеке бөлініп, басқалардан бұрын жеп алады екен, кейбіреуі аш қалып, басқа біреулері мас болып жүреді екен.

²² Сонда қалай болғаны? Өз үйлеріңде ішіп-жейтін тамақтарың жоқ па? Әлде Құдайдың қауымын соншама жеккөргендіктен, ішуге тамағы жоқтарды ұялтайын дедіңдер ме? Енді сендерге не десем екен? Мақтайын ба? Жоқ! Бұл әрекеттерің үшін сендерді мақтай алмаймын.

²³ Мен Иемізден нені қабылдасам, соны сендерге табыстадым. Иеміз ұсталатын түні нанды алып,

²⁴ алғысын айтып болған соң, одан шәкірттеріне үзіп беріп: «Бұл -сендер үшін берілген Менің денем, Мені еске алу үшін енді осылай істеңдер», - деген болатын.

²⁵ Дәл солай кешкі астан кейін тостағанды алып: «Мына тостаған-Менің қаныммен бекітілген Жаңа Келісім. Мені естеріңе алу үшін, үнемі осылай істеңдер», -деген болатын.

²⁶ Сонымен, егер де сендер үнемі осы нанды жеп, осы тостағаннан ішкен сайын, Иеміздің өз уақытында қайтып келетін кезге дейін, Оның өлімін жариялайтын боласыңдар.

²⁷ Егер де кімде-кім сол нанды лайықсыз түрде жеп, сол тостағаннан лайықсыз түрде ішетін болса, онда ол Иеміздің денесі мен қанына қарсы күнә жасайды.

²⁸ Сол үшін әрбір адам ең алдымен өзін-өзі тексерсін, содан кейін ол сол нанды жесін әрі сол тостағаннан ішетін болсын.

²⁹ Өйткені нан жеп, тостағаннан ішкен адам Исаның денесіне аса мән бермей, нан жеп, тостағаннан ішетін болса, ол өз-өзіне үкім шығарады.

³⁰ Сол себепті де сендердің көпшілігің ауру әрі әлсізсіңдер, көбісі қайтыс болып кетті.

³¹ Егер біз өзімізді-өзіміз сынап, тексеріп отырсақ, онда біз сотталмас едік.

³² Біз Иеміздің тәрбиесінде болу үшін сотталдық, сондықтан біз осы әлемнің сотына ілікпейміз.

³³ Бауырластар, ас ішуге жиналғанда, бір-біріңді күтіңдер.

³⁴ Егер кім аш болса, жиналғандардың үкіміне ілікпес үшін, тамағын үйінен ішіп келсін. Ал қалған нұсқауды өздеріңе барған кезде берермін.