Қорынттықтарға 1 1 - Zhana Osiet

¹ Иса Мәсіхтің шақыруымен Құдайдың еркіне сай елші болған Пауыл мен бауырымыз Состеннен

² Қорынт қаласындағы Құдайдың қауымына, яки, өздерін Иса Мәсіхке бағыштап, киелі болуға шақырылғандарға және қай жерде болмасын барлығымен бірге тұрып, Иеміздің атын атап шақыратындарға

³ біздің Құдай Әкеміз бен Иеміз Иса Мәсіхтің рақымын, бейбіт тыныштығын тілейміз.

⁴ Құдай рақымының сендерге Иса Мәсіх арқылы берілгені үшін, әрқашан Оған алғысымды білдіремін,

⁵ өйткені Ол туралы айтылған әрбір сөз, әрбір берілген білім сендерді барлық жағынан байытып,

⁶ Мәсіх туралы куәліктің растығын дәлелдеп нығайтты.

⁷ Алайда Мәсіхтің әлі де ашылуын күтіп отырған сендер сыйға берілетін дарынның ешқайсысына мұқтаж емесіңдер.

⁸ Біздің Иеміз Иса Мәсіхтің келетін күніне дейін мүлтіксіз болуларың үшін, Ол ақырына дейін сендерді шындықпен бекітіп, нығайтады.

⁹ Құдай қашан да адал, сондықтан Ол Өзінің Ұлы әрі біздің Иеміз Иса Мәсіх арқылы сендерді қарым -қатынасқа шақырады.

¹⁰ Бауырластарым, біздің Иеміз Иса Мәсіхтің атынан сендерден өтініп сұрайтыным бір-ақ нәрсе: араларыңда бөліну болмасын! Бәрің бір ой, бір пікірді ұстаныңдар және соны қалыптастырыңдар.

¹¹ Бауырластарым менің, Хлойдың үйіне келіп жүргендерден сендердің араларыңда араздықтың бар екені маған белгілі болды.

¹² Бұлай дейтін себебім әркім бөлініп, біреуі «мен Пауылдікімін» десе, біреуі «мен Аполлостікімін», ал тағы біреуі «мен Кифанікімін», енді біреуі «мен Мәсіхтікімін» деп айтып жүр екен.

¹³ Ал Мәсіх бөлінді ме? Әлде сендер үшін айқышқа шегеленген Пауыл ма еді? Немесе сендер суға батырылып шомылдырудан Пауылдың атымен өттіңдер ме?

¹⁴ Криспа мен Гайдан басқа ешкімді де суға батырып шомылдырудан өткізбегенім үшін Құдайға мен алғысымды айтамын.

¹⁵ Сондықтан ешкім де менің атымнан суға батырылып шомылдырудан өттім деп айта алмайды.

¹⁶ Сонымен қатар, мен тек Стефан мен оның үйіндегілерді ғана суға батырып шомылдырудан өткіздім, ал бұдан басқа кімді шомылдырудан өткізгенім есімде жоқ.

¹⁷ Мәсіх мені суға батырып шомылдырудан өткізу үшін емес, керісінше, Ізгі хабар жариялап, Мәсіхтің айқышының мән-мағынасын жойғысы келетін даналық сөздерді тоқтату үшін жіберді.

¹⁸ Құрып кететіндер үшін айқыш туралы айтылатын сөздер ақымақтық болып саналса, ал құтқарылатын мына біздер үшін сол айқышта Құдайдың құдіретті күші жатыр.

¹⁹ Жазбада: «Даналардың даналығын жойып, өзін данышпан санайтындардың ой-пікірі мен түсінігін жоққа шығарамын», - деп жазылған.

²⁰ Сол даналар қайда? Заңды зерттеуші оқымысты ғұламалар қайда кетті? Осы ғасырдың зерттеушілері қайда жүр? Құдай бұл әлемнің осы даналығын ақымақтық деп есептей ме?

²¹ Ал Құдайдың Құдай екенін және Оның даналығын, осы әлемнің даналығы арқылы танып-білу мүмкін емес, сондықтан Құдай Өзінің сол «ақымақтық» деп санайтын уағыздары арқылы Өзіне сенгендерді құтқарып алуды қалады.

²² Яһудейлер болса, кереметтер жасауды талап етеді, гректер даналық іздейді,

²³ ал біз айқышқа шегеленген Мәсіхті уағыздап, жариялаймыз, бұл яһудейлер үщін шалынып құлайтын кедергі (тас) сияқты болса, басқа ұлт өкілдері үшін бұл ақымақтық болып көрінеді.

²⁴ Өздерін шақырып алғандар үшін, мейлі, яһудейлер, мейлі, гректер болсын, Мәсіхте Құдайдың құдіретті күші мен Оның даналығы жатыр.

²⁵ Өйткені Құдайдың ақымақтығы болып көрінетін нәрселер адамдардың даналығынан анағұрлым жоғары, Құдайдың әлсіздігі болып көрінетіндер адамдікінен әлдеқайда күштірек.

²⁶ Сонымен, бауырластар, өздеріңнің не үшін шақырылғандарыңа көңіл аударыңдаршы. Адамның көзімен қарағанда, көбіңде даналық та, күш те жоқ, көпшілігіңнің мәртебең де жоғары болған емес.

²⁷ Алайда Құдай өзін данышпан санайтындарды ұятқа қалдыру үшін, осы әлемнің ақымақ деп санайтындарын таңдап алды. Күштіміз деп жүргендерді ұятқа қалдыру үшін, Құдай осы әлемнің әлсіздерін таңдап алды.

²⁸ Құдай осы әлемдегі атағы мен шені жоқ төмен және ешкім менсінбейтіндерді таңдап алды, ал маңыздымыз деп жүргендерді төмен түсірді,

²⁹ міне, сондықтан да Құдайдың алдында ешбір пенде мақтана алмайды.

³⁰ Ал сендер Құдайдан келген Мәсіхпен бірліктесіңдер, Иса Мәсіх-Құдайдың бізге берген даналығы мен әділдігі, киелісі, біздің құнымызды өтеуші.

³¹ Сондықтан Жазбада: «Кім мақтанғысы келсе, тек Иеміздің атымен мақтансын», - деп жазылған.