Қолостықтарға 3 - Zhana Osiet

¹ Сонымен егер де сендер Мәсіхпен бірге тірілдік деген ойға келсеңдер, енді Оны жоғарыдан іздеңдер, өйткені Мәсіх Құдайдың оң жағында отыр.

² Сондықтан сендердің ендігі ойларың жерде емес, жоғарда, яғни көкте болсын.

³ Өйткені сендердің ескі табиғаттарың өлді, ал ендігі өмірлерің Мәсіхпен байланытсы болғандықтан, Құдай оны тыс көзден таса етіп, жасырып қойды.

⁴ Сондықтан сендердің өмірлеріңнің сыры тек Мәсіх қайтып келген кезде ғана аян болып ашылады, міне сол кезде Онымен бірге сендер де даңқа бөленесіңдер.

⁵ Сол үшін жерде жүрген кездеріңде, дене мүшелеріңдегі азғындық пен лас арамзалықты, құмарлықты, жаман ниетті, аш көзділікті сендерге өлімші етіп тастау керек, себебі бұлар пұтқа табынушылықпен тең,

⁶ ал солардың жетегінде кетіп, соларды істегендерге, яғни Құдайға бағынбайтын ұлдарға, яғни олардың үстіне Құдайдың қаһары төгілмек,

⁷ өйткені сендер де бір кездері дәл солай әркет етіп, солар секілді өмір сүрдіңдер.

⁸ Ал енді қазіргі кезде соның бәрін сендер шетке ысырып тастап, енді бұдан былай ашу-ызаға, зұлымдыққа берілмеңдер, әрі ауыздарыңнан намысты қорлап, тіл тигізетін ерсі сөздер шықпасын.

⁹ Бір-біріңе өтірік айтпаңдар, өйткені сендер өздеріңдегі ескі адамның іс-әрекетін шешіп тастадыңдар,

¹⁰ ал оның орнына өзінің Жаратушысын жақыннан таныған сайын, Жаратушысына ұқсас болып, жаңара беретін жаңа бейнені кидіңдер,

¹¹ мұнда не грек, не яһудей, не сүндеттелген, немесе сүндеттелмеген, не жат ұлттық, не скиф, не құл, немесе ерікті деген болмайды, керісінше бәрінде Мәсіх болады, әрі түгелдей барлығы да Мәсіхте болады.

¹² Сонымен Құдайдың таңдап алғандары ретінде сендер үстілеріңе киелілік пен сүйіспеншілікті, жанашырлықты, жақсылықты, қарапайымдылықты, төзімділікті киіп алыңдар.

¹³ Әрқашан да бір-біріңе қолдау көрсетіңдер, ал егер біріңді-бірің ренжітіп, бір-біріңе тағатын айыптарың бар болса, бір-біріңді кешіріп, бір-біріңе кешірім сыйлап, Иеміз сендерге қалай кешірім сыйласа, сендер де дәл солай кешірім сыйлауға дайын болыңдар.

¹⁴ Ал осылардың бәрінің үстінен қарайтын сүйіспеншілік, міне соған оранып алыңдар, ал ол бәрін біріктіріп, жетілдіреді.

¹⁵ Әрі сендердің жүректеріңнің билеушісі Мәсіхтің амандығы мен берекелі де бейбіт тыныштығы болсын, өйткені сендер бір денеде яғни Мәсіхтің бейбіт тыныштығында болу үшін шақырылдыңдар, міне сол үшін алғыс айтыңдар.

¹⁶ Мәсіхтің сөзі сендердің жүректеріңнен орын алып, молынан өмір сүрсін. Әрқашан да даналықтың жетегімен жүріңдер, өзара бір-біріңе тәлім-тәрбие беру үшін, забур жырларын, мадақтау жырларын айтып, жүректеріңдегі қуаныштарыңды Құдайға білдіру үшін, рухани әндермен Оны мадақтаңдар.

¹⁷ Не істесеңдер де, мейлі сөзбен болсын, мейлі іспен болсын бәрін Иеміз Исаның атымен істеңдер, әрі Құдай Әкемізге айтатын алғыстарыңды да Иса арқылы жеткізіңдер.

¹⁸ Ал, әйелдер, сендер күйеулеріңе бағыныңдар, бұл Иемізге жағымды іс-әрекет.

¹⁹ Ер азаматтар, сендер әйелдеріңді жақсы көріңдер, оларға қатігез болмаңдар.

²⁰ Балалар, қандай жағдай болса да ата-аналарыңды тыңдаңдар, өйткені Иеміз солай болғанды ұнатады.

²¹ Әке болғандар, балаларың ынжық та ынтасыз болмасын десеңдер, оларды ашуландырып ашуға булықтырмаңдар.

²² Ал құлдар, сендер, өздеріңе тек тәндік тұрғыда ғана ие болып жүрген қожайындарыңа бағыныңдар, оны тек адамдарға жағу үшін емес, керісінше оны қарапайым жүрекпен, әрі Иемізден қорқатындарыңды білдіру үшін істеңдер.

²³ Не істесеңдер де, бәрін адамдар үшін емес, Иемізге істегендей істеп, ішкі жан дүниелеріңді соған салып, шын пейіл, ақ көңілмен істеңдер.

²⁴ Сондықтан мынаны біліп алыңдар: сендер өздеріңе берілетін еншіні Иемізден аласыңдар, себебі сендер Иемізге қызмет етіп жүрсіңдер.

²⁵ Ал кім әділетсіздік жасайтын болса, оның алатын сыйы соған сай болады, өйткені Ол ешкімнің бет-жүзіне қарамайды.