Ғалаттықтарға 6 - Zhana Osiet

¹ Бауырластар, егер де бір адам күнәнің құрсауына түсіп қалып жатса, онда сендер оны рухани қайта қалпына келтіру үшін рухтың жетегіне бағынып, мейірімділік танытыңдар, әрі өздерің де сол секілді азғырылуға түсіп қалмас үшін өздеріңе-өздерің сақ болыңдар.

² Өзара бір-біріңе қамқор болып, біріңнің ауыртпашылығыңды бірің көтеріңдер, сонда Мәсіхтің өсиетін орындайтын боласыңдар.

³ Өйткені егер де біреу өзінің түкке де тұрмайтынын біле тұра, өзін басқалардан маңыздымын деп санайтын болса, онда ол өзін-өзі алдайды,

⁴ сондықтан әркім өз іс-әрекетін өзі сынап өзін-өзі тексеріп отырса, ол басқаның іс-әрекетіне емес, ол тек өз іс-әрекеті үшін ғана мақтана алады,

⁵ өйткені әркім өз ауыртпалығын өзі алып жүруі тиіс.

⁶ Кім тәлімгерден сөз естіп, тәлім алып жүрген болса, сол өзіндегі бүкіл бар жақсылығымен өзіне тәлім беріп жүрген адаммен бөліссін.

⁷ Адасып кетіп жүрмеңдер, Құдайды алдап мазақ ету мүмкін емес, сондықтан адам не ексе, соны орады.

⁸ Өйткені кім де кім өзінің тәндік қалауының жетегімен жүретін болса, ол сол тәнді шірітіп жоқ қылатын нәрсені орады, ал кім рухтың қалауымен, яғни рухтың жетегінде жүретін болса, ол сол рухтан пайда болатын мәңгілік өмірді орады.

⁹ Сондықтан өзімізді-өзіміз жасытып, қайғыға берілмейік, тек жақсылық жасай берейік, өйткені өзімізге қажет нәрсені уақыт келген кезде орып аламыз, тек әлсіздікке берілмесек болды.

¹⁰ Сонымен біздің әлі де уақытымыз бар, сондықтан келіңдер жасайтын жақсылығымызды бәріне бірдей жасай берейік, әсіресе біз соны өзімізге жақын бауырластарға жасайық.

¹¹ Байқаған шығарсыңдар мен осы жолы өздеріңе жазғандарымның көбін өз қолыммен әрі үлкен әріптермен жаздым.

¹² Тәннің жетегінде жүруді мақтан тұтып, соны жақсы көретіндердің көпшілігі, сендерді сүндетке отырғызуға мәжбүрлемек болып жүр, ал олардың бұл әрекеттерінде тек Мәсіхтің айқышы үшін қудалауға түспесек болды деген ой жатыр.

¹³ Өйткені олар сүндеттелуді қанша ұстанса да, олар сол заңның талаптарын орындамайды, олар керісінше сол сендерді сүндеттету арқылы өздерінің атақ абыройын көтермекші болып жүр.

¹⁴ Ал мен Иеміз Иса Мәсіхтің айқышынан басқа еш нәрсеге мақтана алмаймын, өйткені сол айқышқа осы әлем мен үшін шегеленді, ал мен сол айқышқа осы әлем үшін шегелендім.

¹⁵ Өйткені сүндетке отыру, не болмаса сүндетке отырмау түкке тұрмайтын бос әрекет, керісінше аса маңызды нәрсе жаңадан жаратылған жаратылыс болмақ.

¹⁶ Сондықтан көпшілік осы қағида бойынша жүретін болса, онда олар Исраилдің Құдайының бейбіт тыныштығы мен мейіріміне ие болады.

¹⁷ Енді осыдан кейін ешкім маған қиындық әкелмесе екен деп тілеймін, өйткені Исаның денесіне түскен жараның ауыртпалығын мен өз денемде тартып жүрмін.

¹⁸ Баурырластар, біздің Иеміз Иса Мәсіхтің рақымы, сендердің рухтарыңды жандандыра берсін! Аумин!