Ғалаттықтарға 2 - Zhana Osiet

¹ Одан кейін мен Иерусалимге тек он төрт жыл өтіп кеткен соң ғана бардым, сол кезде менің қасымда Барнаба болды, сонда мен қасыма Титті де ертіп алдым.

² Ал мен ол жаққа менің өзіме ашылған аян бойынша бардым, міне сол кезде мен сондағы қауымның беделді жетекшілерінің бәріне өзімнің өзге ұлттың өкілдеріне уағыздап жүрген ізгі хабардың мәні мен мағанасы жайлы айтып бердім. Себебі мен осы істі атқарып жүрген сәтте, мен өзімнің жүгірісім бос жүгіріс пе, әлде пайдалы жүгіріс пе соны біліп алғым келді.

³ Алайда сол кезде олар менің қасымда жүрген Титтің грек екенін білсе де, енді оны сүндеттеу керек болады деп бізді соған мәжбүрлеген жоқ,

⁴ керісінше осы нәрсе бізді құл ету үшін арамызға өтірік бауырлас болып кіріп алып, біздің Мәсіх арқылы ие болған еркіндігімізге теріс көзқарспен қарап жүргендердің іс-әрекеті болатын.

⁵ Алайда біз олардың бұл іс-әрекетіне бір сәтке де бағынған жоқпыз, өйткені сол кездегі біздің бар мақсатымыз ізгі хабардағы бар шындықты сол күйінде сақтап, оны сол күйінде бұзбай, оны сол қалпында өздеріңе жеткізу болатын.

⁶ Ал енді өз беделдерін өздері көтеріп, өздерін жоғары санатқа жатқызып жүргендерге келетін болсақ, өткен уақытта олардың беделдерінің қандай деңгейде болғаны маған маңызды емес. Құдай адамның бет-жүзіне қарамайды, әрі сол беделді болып жүргендер маған еш нәрсе жүктеп, тапсырған жоқ.

⁷ Керісінше олар Иеміз Петірге ізгі хабарды сүндеттелгендерге уағызда деп қалай сеніп тапсырса, Иеміздің маған сол ізгі хабарды сүндеттелмегендерге дәл солай уағыздауды сеніп тапсырғанына олардың көздері жетті.

⁸ Өйткені сүндеттелгендер үшін Петірді елшілікке қалай тағайындаса, мені де өзге ұлттар үшін дәл солай елші етіп тағайындағаны,

⁹ маған берілген рақым екенін олар білді, сондықтан қауымды тіреп тұратын діңгегі болып жүрген Жақып мен Петір және Жоқан бізді қолдағандарын білдіріп маған және Барнабаға оң қолдарын ұсынды, сөйтіп бәріміз өзара осылай қарым-қатынаста тұрып, олар сүндеттелгендерге, ал біз өзге ұлттарға қызмет етейік деп келістік.

¹⁰ Сондағы олардың бізе айтқаны «тек кедей-кепшіктерді ұмытпаңдар» деп бізді ескертті, ал сол жағын өзім де толықтай жүзеге асыруға бар күшімді салып жүрген болатынмын.

¹¹ Алайда Петір Антиохияға келген кезде, менің оған бетпе-бет келіп қарсы тұруыма тура келді, өйткені сол сәтте, сол жерде оның жіберген бір кемшілігі болды.

¹² Антиохияға Жақыптың жіберген адамдары әлі де келмей тұрған кезде, ол өзге ұлттың адамдарымен бірге жүріп, олармен бірге тамақтанып жүрді, ал сол адамдар келгеннен кейін ол артқа шегініп, әлгі сүндеттелген адамдардан қорқып, өзінен-өзі бөлектене бастады.

¹³ Оның сол іс әрекетіне сол жерде жүрген кейбір яһудейлер де қосылып алды да, бәрі екі жүзділікке салынып кетті, тіпті Барнабаның өзі соларға еріп, ол да сол екі жүзділікке барды.

¹⁴ Сонда мен олардың тура жолды нақты көрсетіп тұрған ізгі хабардың шындығынан тайып кеткенін көргенде, мен Петірге бәрінің көзінше: -Сен өзің яһудей болсаң да, яһудейлер сияқты емес керісінше өзге ұлттардың өкілдері секілді өмір сүріп келдің, ал енді сол өзге ұлттың өкілдерін сен неге яһудейлерше өмір сүруге мәжбүрлеп тұрсың? -дедім.

¹⁵ Себебі біз табиғатымыз бойынша яһудейміз, сондықтан біз өзге ұлттар секілді күнәһарлардың қатарына жатпаймыз,

¹⁶ алайда біз адамның заңға сүйеніп жасайтын іс-әректтері арқылы емес, керісінше тек Мәсіхке сену арқылы ақталатынымызды білеміз, сондықтан біз заңға сүйеніп істейтін іс-әрекеттеріміз бойынша емес, тек Мәсіхке сену арқылы ақталамыз. Міне, сондықтан біз сенімімізді тек Мәсіхке арттық, өйткені заңда көрсетілген іс-әрекеті арқылы ешбір пенде ақтала алмайды.

¹⁷ Себебі, біз сол ақталудың жолын іздеп жүріп, оны біз Мәсіхтен таптық, сонда ғана біз өзіміздің қаншалықты күнәһар екенімізді ұқтық, ал сонда Мәсіх күнәнің қызметкері болып тұр ма? Жоқ, олай болуы мүмкін емес.

¹⁸ Егер де мен өзім бұзып, құлатып тастаған нәрсені қалпына келтіру үшін, оны қайтадан тұрғызатын болсам, онда мен өзімді қылмыскер ретінде көрсеткен болар едім.

¹⁹ Негізінде мен заңның талабына сай, яғни сол заң арқылы өлдім. Ендігі содан кейінгі мақсатым-енді тек Құдай үшін өмір сүру, өйткені Мен Мәсіхпен бірге шегелендім, сондықтан

²⁰ енді менің бойымда менің өзім емес, керісінше енді менің бойымда Мәсіхтің Өзі өмір сүруде. Ал енді қазіргі тәни өміріме келетін болсам, мені шексіз сүйіп, Өзін мен үшін өлімге қиған Құдайдың Ұлына сеніп, Оған сенім артып өмір сүрудемін.

²¹ Сондықтан Мен құдайдың рақымын жоққа шығара алмаймын. Егер де бізді ақтау жолы заң арқылы келген болса, онда Мәсіхтің өлімі бекер болды.