Ғалаттықтарға 1 - Zhana Osiet

¹ Адамдардың атынан да емес, адам арқылы да емес, керісінше Иса Мәсіхті өлімнен қайта тірілтіп алған Құдай Әкеміз арқылы елші болған Пауыл,

² өзіммен бірге жүрген барлық бауырластарыма және Ғалатия өлкесіндегі қауымдарға сәлем жолдай отырып,

³ Құдай Әкеміз бен Иеміз Иса Мәсіхтің рақымын, тыныштығын сендерге тілейді.

⁴ Ол бізді осы әлемнің зұлымдыққа толы құрсауынан босатып алу үшін, әрі біздің Құдайымыз, әрі біздің Әкеміз Құдайдың еркіне сай Ол Өзін біздің күнәларымыз үшін өлімге қиды,

⁵ міне, сондықтан Оның даңқы ғасырдан-ғасырға жалғаса берсін. Аумин!

⁶ Мен, Сендердің Құдайдың Мәсіх арқылы берген рақымы бойынша өздеріңді шақырып алған ізгі хабардан тез арада бас тартып, одан басқа бір ізгі хабарға бет бұрып кеткендеріңе таңқалып тұрмын.

⁷ Бірақ одан басқа ізгі хабар жоқ, себебі кейбіреулер Мәсіхтің ізгі хабарын бұрмалап оны теріске айналдырып, ал сендердің араларыңа іріткі салғысы келіп жүргендер де бар.

⁸ Алайда мейлі біз болайық, немесе көктен келген бір періште болсын, егер де біз уағыздаған ізгі хабарға қарсы келетін басқа бір ізгі хабарды уағыздайтын болса, онда оны қарғыс атсын.

⁹ Осы туралы алдында да айтқанмын, енді тағы да айтамын, егер де кімде-кім біз қабылдап алған ізгі хабарға қарсы келетін басқа бір ізгі хабарды уағыздайтын болса, оны қарғыс атсын.

¹⁰ Мен қазір осы сәтте адамдардың айтқанына мойынұсынуым керек пе, әлде Құдайдың айтқанына ма? Әлде маған адамдарға жағымды болатын жолды іздеу керек пе? Егер де мен адамдарға жағатын жолды іздейтін болсам, онда мен Мәсіхтің құлы болмас едім.

¹¹ Бауырластар, мен сендердің мынаны біліп алғандарыңды қалаймын: -Мен сендерге уағыздап жүрген Ізгі хабар ол адам арқылы келген жоқ,

¹² сонымен қатар мен оны адамнан қабылдап, адамнан үйренген де емеспін, керісінше мен оны өзіме Иса Мәсіх ашып берген аян арқылы қабылдадым.

¹³ Өйткені мен өз өмірімде тек яһудейлердің өмір сүру салтымен ғана өмір сүргенім туралы сендер естідіңдер, сол кездері мен қауымды қатты қудалауға салып, оны жойып, құртып жіберуге тырыстым.

¹⁴ Сонда мен сол өзіміздің ата-бабадан келе жатқан яһудейлік салт-дәстүрді аса бағалап тек соны ұстану жолында өзім секілді өз замандастарымның алдында жүрдім, осылай ата-бабаларымнан қалған сол дәстүрді қызғыштай қорғайтынмын.

¹⁵ Алайда Құдай анамның құрсағында жатқан кезде-ақ, яғни Ол мені алдын ала таңдап алғандықтан, Ол мені Өзінің рақымы арқылы шақырып алып, маған мейрімін төгіп,

¹⁶ өзінің Ұлында жатқан бар сырды маған ашып берді де, енді Оның Ұлы туралы ізгі хабарды өзге ұлттардың арасына барып соларға уағызда деп тапсырды, мен сол кезде қанға да, тәнге де тәуелді ешкімнен ақыл-кеңес сұрамадым.

¹⁷ Әрі Ерусәлімде менен бұрын елшілік міндетін атқарып жүргендерге барған емеспін, мен керісінше сол сәтте Арабияға аттандым, содан кейін кері қайтып қайтадан Дамаскіге келдім.

¹⁸ Содан кейін мен тек үш жыл өткен соң ғана жоғары биікте тұрған Иерусалимге көтеріліп барып, сонда жүрген Петірмен (Кифамен) таныстым да, оның қасында он бес күн болдым.

¹⁹ Сол кезде мен сол жерден Иеміздің інісі, яғни тек Жақыптан басқа елшілердің еш қайсысын көрмедім.

²⁰ Міне, осы жазғандарымның бәрін Құдайдың алдында тұрып жазып тұрмын, сондықтан менің сендерге айтқандарым өтірік емес.

²¹ Осыдан кейін мен Сирия мен Кілікия аймақтарына қарай жол тарттым.

²² Міне, сол кезде Мәсіхтің Яхудея аймағындағы қауымдарына менің бет-жүзім әлі де таныс емес болатын,

²³ олар тек: кезінде бізді қудалап, бізді құртып жібермек болған адам, енді сол өзі жойып, жоқ қылып жібергісі келген сенімді, өзі уағыздап жүр деген хабарды естіп,

²⁴ мені жетектеп жүрген Құдайға мадақ берді.