Філіпіліктерге 2 - Zhana Osiet

¹ Сонымен егер де Мәсіхтен қандай да бір жұбанышты, немесе қандай да бір сүйіспеншілікті, немесе рухпен қарым-қатынасқа түсіп ішкі жан дүниелеріңе қандай да бір қажетті мейірімділік пен жанашрылықты Одан тапқан болсаңдар,

² енді менің де қуаншым шексіз мол болуы үшін, сол бір ойға, сол бір сүйіспеншілікке ие болып, бір-біріңді бөліпжармай, тек бірлікті ойлаңдар,

³ ешқандай да бір бәсеке-бақталастық пен өз басының қамын ойлайтын атаққұмарлықтың жетегіне түспеңдер, керісінше бір-біріңе кішіпейлдік көрсетіп, басқаларды өздеріңнен жоғары қойыңдар,

⁴ сөйтіп әркім тек өздерінің мүдесін ғана емес, керісінше әркім басқалардын да мүдесін ойлайтын болсын.

⁵ Мәсіх Исада қандай ой болса, сол ой сендерде болуы қажет:

⁶ Ал Мәсіхте Құдайдың болмысы болды, алайда Ол сол Құдайлық болмысқа жабысып, жармасқан жоқ,

⁷ Ол керісінше содан Өзі бас тартып, құлдың кейпін қабылдап, адамдарға ұқсап, адамдай табиғатты қабылдап,

⁸ өзін-өзі төмендетіп, өлімге дейін мойынсұнып, айқыштағы өлімді Өзі қабылдады.

⁹ Сол үшін Құдай Оны ең жоғарғы дәрежеге көтеріп, Оған барлық атақ пен даңқтардан да биік, ең жоғарғы есімді берді.

¹⁰ Енді аспан астындағылар да, жердегілер де, әрі жердің астындағылардың бәрі, Исаның сол есіміне бола, Оның алдында тізелерін бүгіп, Оған тағзым етіп,

¹¹ сөйтіп, әрбір тіл атауы Иса Мәсіхті Иеміз деп мойындап, Құдай Әкенің даңқын арттыруы тиіс.

¹² Сонымен менің, сүйікті бауырластарым, мен өздеріңмен болған кезде, сендер әрқашан да мойынсұнушылық көрсетіп жүрдіңдер, енді мен араларыңда жоқ кезде де соған көбірек көңіл бөліп, өздерің ие болған құтқарылуға аса мән беріп, соны қастерлеп, сол үшін қалтырап, дірілдеп, оны аяғына дейін сақтап қала аламыз ба деген қорқынышпен өмір сүріңдер.

¹³ Өйткені Құдай өзінің әрбір іс-әрекетін сендер арқылы жасайды, әрі Ол сендердің де сондай ізгі ниетте болғандарыңды қалайды, сол үшін Ол сендерге жақсы іс-әрекет жасауға ынта беріп, сендерді соған жетелеп отырады.

¹⁴ Сондықтан атқаратын істердің бәрін де күңкілдемей, әрі күмән келтірмей істеңдер,

¹⁵ өйткені сендер Құдайдың мұнтаздай тап-таза етіп тазалап қойған баласы болдыңдар, сондықтан мына қисық та азғын ұрпақтың арасында тап-таза болып, осы әлемге жарқыраған жарық бола жүріп,

¹⁶ оларға өмір сөзін ұсыныңдар. Қандай кез болса да осылай істеңдер, сонда мен Мәсіх келген күні Одан мақтау алатын боламын, өйткені бұл менің тектен-текке жүгірмегенімді, әрі еңбегімнің бостан-босқа кетпегенінің дәлелі болмақ.

¹⁷ Ал егер де сендердің сенімдеріңді нығайту үшін, менің қаным төгіліп, Құдайға берілген құрбандықтай сендерге қызмет ететін болса оған да қуанамын, бәріңмен бірге қуанамын.

¹⁸ Міне, сол үшін сендер де менімен бірге қуанып, қуанышыма ортақтасыңдар!

¹⁹ Мен бар үмітімді Иеміз Исаға артамын, ал жақын арада Тімотені өздеріңе жіберіп, ол арқылы сендердің жағдайларыңды білсем болды, тек сонда ғана менің жаным тынышталмақ.

²⁰ Өйткені ол секілді шын жүректен сендердің жағдайларыңды ойлап, қамқор болуға тырысып жүрген ешкімім де жоқ.

²¹ Себебі одан басқаларының бәрі Иса Мәсіхті емес, тек өз қара бастарының қамын жеп, соны іздеуде.

²² Ал оның сынақтан қалай өткенін өздерің білесіңдер, себебі мен ізгі хабар таратқан кезде, ол әкесіне қызмет еткен баладай менімен бірге жүріп қызмет етті.

²³ Сондықтан, өзімнің жағдаймның қалай болатынын біліп алған соң, оны сендерге тез арада жіберемін деген үмітім бар.

²⁴ Өзім де Иемізге үміт артумен жүрмін, сондықтан өзім де сол жаққа барып қалатыныма сенімдімін.

²⁵ Сонымен қатар мен сендерге менің баурым, әрі әріптесім, әрі сенімді серігім, әрі сендердің маған қамқорлық көрсетіп маған қызмет етсін деп жіберген Епафродитті де сендерге жібергелі отырмын.

²⁶ Өйткені ол сендердің барлықтарыңды көруге қатты құмар болып жүр, әрі өзінің ауырып қалғанын сендерде естіді деген кезден соң, ол зарығып қалды.

²⁷ Шыны керек, ол қатты ауырып, өлім аузында жатты, алайда Құдай оны кешіріп оған да, маған да мейірімін көрсетіп, менің уайымыма уайым қоспайын деді ме, оны сауықтырып жіберді.

²⁸ Сонымен сендерді тағы да бір қуанту үшін тездедіп, оны сендерге жіберіп отырмын, мүмкін осы арқылы менің де уайымым азаятын шығар.

²⁹ Оны бар қуанышпен, Иеміздің атынан қабылдаңдар, әрі осындай адамды бағалай біліңдер,

³⁰ өйткені ол Мәсіхтің ісі үшін, өлімге өте жақын барып, өз өміріне қауіп төндірді, сөйтіп, сендердің маған көрсете алмаған қызметтеріңді ол өзінің қызметімен толтырып, толықтырып тастады.