Еврейлерге 7 - Zhana Osiet

¹ Мәліксадық Сәлімнің патшасы әрі мәңгі тірі Құдайдың бас қызметкері болды. Ыбырайым патшаларды жеңіп, еліне қайтып келе жатқанда, Мәліксадық оның алдынан шығып, қарсы алды, жарылқап, оған батасын берді.

² Ыбырайым өзінде бардың бәрінің оннан бір бөлігін оған бөліп берді. Мәліксадықты сол кезде, ең алдымен, «әділдіктің патшасы», сосын «Салимнің патшасы» деп атайтын, егер мұны толық аударатын болсақ, «тыныштық әкелуші патша» деген мағынаны береді.

³ Оның не әкесі, не анасы, не ата-тегі және оның өмірінің қашан басталып, қай кезде аяқталғаны бізге белгісіз, бірақ ол Құдайдың Ұлына ұқсас болды, сондықтан Ол Құдайдың мәңгі қызметкері болып қала береді.

⁴ Оның мәртебесінің қандай биік болғанын көрдіңдер ме!? Міне, сондықтан біздің түп атамыз Ыбырайым оған өзінің алғашқы табысының ең жақсысын таңдап, бөліп берді.

⁵ Ал Леуінің ұлдарына келсек, олар өздеріне жүктелген қызметті Таурат заңының талаптарына сай атқаруға тиіс болған, сол үшін олар өздеріне берілетін ондықты халықтан, яғни, өздері сияқты Ыбырайымның ұрпағынан тараған бауырластарынан алатын.

⁶ Мәліксадық болса, Ыбырайымның өзі берген және леуіліктерге еш қатысы жоқ ондықтан алды, сонда Ол Құдайдың уәдесіне ие болған Ыбырайымды жарылқап, оған батасын берді.

⁷ Бұл жерде ешқандай қарама -қайшылық жоқ, өйткені кім үлкен болса, сол өзінен кішіні жарылқап, бата береді.

⁸ Ал енді қазіргі жағдайға келер болсақ, әдетте оннан бір бөлікті өлетін адамдар қабылдайды, ал ол кезде мәңгі өлмейді деген Мәліксадықтың өзіне берілді.

⁹ Леуіліктердің халықтан алып жүрген ондығы Ыбырайым арқылы Мәліксадыққа берілді деп айтсақ та болады,

¹⁰ өйткені Ыбырайым Мәліксадықты кездестірген кезде, Леуінің ұрпақтары Ыбырайымның белінде болған еді.

¹¹ Сонымен, егер де Заңның талаптарына сай пайда болған қызмет леуіліктер арқылы адамдарды толыққанды кемелділікке жеткізе алатын болса, онда Аронның дәрежесіндей емес, Мәліксадықтың атақ-дәрежесіне сай, басқа бір бас қызметкерді өлімнен қайта тірілтіп алудың қажеті бар ма?

¹² Егер де Құдай мен адамдардың арасын байланыстыратын қызметтің бағытын өзгерту қажет болса, онда берілген Заңды да өзгерту қажет болады.

¹³ Мәсіхке байланысты айтатын болсақ, Оның шыққан тегі басқа, сондықтан оның руынан ешкім құрбандық шалатын орынның басында қызмет еткен жоқ.

¹⁴ Біздің Иеміздің яһудей руынан шыққаны бәріне белгілі, сол рудың атқаратын қызметі туралы Мұса еш нәрсе айтқан жоқ.

¹⁵ Сонымен, нақты қойылатын талап мынау: егер Мәліксадыққа ұқсас басқа біреуді осы қызметке тағайындау қажет болса,

¹⁶ онда Оның бойында тек Заңның өсиеттерін орындайтын тәндік қасиет емес, ешқашан сарқылмайтын өмір күші болуы тиіс екені түсінікті болып тұр.

¹⁷ Бұған: «Сен Мәліксадықтың атақ-дәрежесіне сай мәңгі Бас қызметкерсің», - деп айтылған куәлік дәлел болады.

¹⁸ Сондықтан алғашқы берілген өсиет әлсіз әрі пайдасыз болды,

¹⁹ Заң еш нәрсені жетілдірген де, кемелділікке жеткізген де жоқ, ал жаңадан енгізілген Жаңа келісім бізге үміт береді, міне, сол арқылы біз Құдайға жақындай аламыз.

²⁰ Қалай десек те, бұл жерде антсыз еш нәрсе орындалмайды, өйткені сол кезде де Құдайға ант бермейақ қызмет атқарған қызметшілер болды.

²¹ Бұл қызмет Құдайдың берген анты арқылы келді, себебі Құдай Оған: «Ием былай деп ант берді, Ол бұдан бас тартпайды: Сен мәңгі тірі Бас қызметкер боласың», -деп Ұлы арқылы айтқызды.

²² Сондықтан бұрынғыдан жақсы әрі Жаңа келісімнің кепілі-Иса.

²³ Құдайдың қызметін атқарып жүрген бас қызметкерлердің саны өте көп болды, бірақ олар сол қызметті одан әрі жалғастыра алмайтын, себебі олар қайтыс болып кететін.

²⁴ Ал Иса ғасырдан ғасырға, яғни, мәңгілікке бірінші Бас қызметкер болып қала береді, сондықтан Оның атқартын қызметі ешқашан бұзылмайды әрі ешкімге берілмейді.

²⁵ Ол сол жерде тұрып-ақ Өзі арқылы Құдайға жақындағандарың бәрін толығымен құтқарып алады, себебі Ол -оларға арашашы бола алатын мәңгі тірі бірінші Бас қызметкер.

²⁶ Бізге дәл осындай, киелі, ешбір зұлымдығы жоқ, мінсіз, таза, күнәкарларға елікпейтін, Көкке көтеріліп кеткен Бас қызметкер қажет.

²⁷ Енді Оған бұрынғы бас қызметкерлер сияқты, ең алдымен, күнде өзінің жасаған күнәлары үшін, одан кейін бүкіл халықтың күнәлары үшін құрбандық шалудың қажеті жоқ. Өйткені Ол бір рет және мәңгілікке Өзін қайталанбайтын құрбандық ретінде ұсынды.

²⁸ Заң бойынша бас қызметкерлікке табиғатынан әлсіз, қарапайым адамдар тағайындалатын, ал Заңнан кейін антпен бекітілген Құдайдың сөзі Өзінің Ұлын мәңгілікке бірінші Бас қызметкер етіп бекітті.