Еврейлерге 6 - Zhana Osiet

¹ Сондықтан Мәсіх туралы айтылған алғашқы сөзде тоқтап қалмау үшін, алға қарай кемелді болуға ұмтылайық, өлімге әкелетін істерден бас тартып, тәубе ету,

² Құдайға сену, суға батырып шомылдыру мен қол қою, өлімнен қайта тірілу, мәңгілік сот туралы тәліміміздің негізі болып қалған ілімге қайта-қайта айналып келе берудің қажеті жоқ.

³ Егер де Құдай Өз еркіне сай бұған рұқсат берсе, болашақта да тәлім беруді жалғастыра береміз.

⁴ Бір кездері Киелі Рухтың іс-әрекетіне куәгер болып, көктен келген сыйдың дәмін татып, жұлдыздай жарқырап,

⁵ Құдайдың сөзіндегі жақсылық пен болашаққа апаратын құдіретті күштен дәм татып,

⁶ одан кейін үзіліп түскен жемістей сенімнен тайқып кеткендерді тәубеге әкеліп, қайтадан жаңарту мүмкін емес, өйткені олар Оған деген сенімдерін жоғалтып алды, сөйтіп, Құдайдың Ұлын айқышқа қайта шегелеп, Оны мазақ етуде.

⁷ Жаңбыр жер бетіне жауған сайын қара жер сол жаңбырдың суымен қоректеніп, бойына сіңіреді, кейін сол жер құнарланады, жер құнарланған соң, пайдалы өсімдіктерді өсіріп шығарады, ал оны өңдегендердің әрқайсысы Құдайдан бата алады.

⁸ Егер де сол жерге еш пайдасы жоқ тікенді өсімдіктер мен ошағандар өсіп шықса, онда бұл қарғыстың жақындап қалғанын білдіреді, ақырында оларды өртеуге тура келеді.

⁹ Қымбатты бауырластар, біз сендердің құтқарылу жолын берік ұстанып келе жатқандарыңа сенімдіміз, нақты айтар болсам, сенім жолымен жақсы жүріп келе жатырсыңдар.

¹⁰ Құдайда ешқандай әділетсіздік жоқ, сондықтан Ол сендердің атқарып жүрген істеріңді, Оның атынан басқаларға көрсетіп жүрген сүйіспеншіліктеріңді, киелі халқына қамқорлық жасаған қызметтеріңді Ол ешқашан ұмытпайды.

¹¹ Сондықтан сендердің әрбіреуіңнің нық сенім танытып, барлық күш-жігерлеріңді аямай, берілген үмітке ұмтыла бергендеріңді тілейміз.

¹² Сол үшін де жалқаулыққа берілмей, сенім арқылы төзімділікке ие болғандарға еліктеп, өздеріңе берілген уәдеге мұрагер болуға тырысыңдар.

¹³ Құдай Ыбырайымға уәде берген кезде, Құдай Өзінен жоғары ант беретін ешкім болмағандықтан, Ол Ыбырайымға Өз атынан:

¹⁴ «Мен сені молынан жарылқап, саған бата үстіне бата беремін әрі ұрпағыңды молынан көбейтемін», -деп уәде берді.

¹⁵ Ыбырайым шыдамдылықпен, күдерін үзбей, сол уәдені күтті, ақырында сол уәдеге қол жеткізді.

¹⁶ Көп адамдар ант береді, олар араларында болып жатқан неше түрлі келіспеушіліктерді шешу үшін, осылай антпен бекітеді.

¹⁷ Ал Құдай Өзінің берген уәдесіне мұрагер болатындарға сол уәденің нақты орындалатынын және Өзінің ниетінің тұрақтылығын, яғни, оның ешқашан бұзылмайтынын көрсету үшін, сол антты Ол дәнекер ретінде пайдаланды.

¹⁸ Сонымен, біз ешқашан өзгермейтін осы екі іс-әрекет арқылы (уәде мен ант) Құдайда жалғандықтың жоқ екенін, Оның өтірік айтпайтынын білеміз, бұл бізге үлкен жұбаныш береді, сондықтан біз алдымызда тұрған осы үмітке қарай жүгіріп, мықтап ұстап алуымыз қажет.

¹⁹ Себебі сол үміт біздің ішкі жан дүниемізді шайқалтпай, берік ұстайтын зәкір сияқты. Біз сол арқылы шымылдықпен бөлінген Киелі орынның ішкі бөлігіне кіре аламыз,

²⁰ ол жерге ең бірінші болып, біз үшін Иса кірді, сондықтан Оған Мәліксадықтың атағына сай мәңгі бірінші Бас қызметкер деген атақ берілді.