Еврейлерге 4 - Zhana Osiet

¹ Сондықтан Құдайдың Өзінің тыныштығына кіру туралы уәдесі әлі де өз күшінде, сондықтан әрқайсысың осы тыныштыққа кіруге кешігіп қалмау үшін, бұл мүмкіндікті пайдалануға ұмтылып, аса сақ болайық.

² Себебі олар секілді бізге де Ізгі хабар жетіп, жарияланды, алайда олардың сол естігендері өздеріне ешқандай пайда әкелмеді, өйткені олар естіген сөзді сеніммен байланыстырмады, тек естіп қана қоя салды.

³ Ал біз Оның сол тыныштығына кіреміз, өйткені Оған сенеміз. Оның ант беріп: «Олар Менің тыныштығыма кірмейді!» -деген сөзін Ол осы әлемдегі барлық ісін аяқтап болғаннан кейін айтқан еді.

⁴ Өйткені жетінші күн туралы басқа бір жерде: «Құдай жетінші күні Өзінің барлық жұмысын аяқтап болған соң, Ол демалып, тыныштықта болды», - деп жазылған.

⁵ Бірақ жоғарыда: «Менің тыныштығыма кірмейді!» -деп айтылған.

⁶ Сонымен, кейбіреулерге әлі де Оның сол тыныштығына кіруге мүмкіндік бар, ал бұдан бұрын Ізгі хабарды естігендер бұған мойынұсынған жоқ, сондықтан олар кіре алмады.

⁷ Міне, сол үшін де Құдай тағы да бір күнді белгілеп қойды, бұл күн-бүгін. Көп уақыттан бері осы бүгінгі күн туралы айтылып келеді, Дәуіт арқылы да: «Егер сендер бүгін Оның даусын естісеңдер, жүректеріңді қатайтпаңдар», -деп айтылған.

⁸ Егер де Нұнұлы Ешуа оларды тыныштыққа жеткізген болса, онда Құдай бұдан кейін бүгінгі күннен басқа күн туралы айтпас еді.

⁹ Онда Құдайдың халқы тек сенбі күнді ғана тойлап, сонымен шектеліп қалушы еді.

¹⁰ Құдайдың Өзі бар жұмысын аяқтап, содан кейін демалып, тыныштыққа бөленгені сияқты Құдайдың тыныштығына кірген адам да дәл солай тыныштыққа бөленеді.

¹¹ Сондықтан тездетейік, кейбіреулердің Оған мойынұсынбай құлаған сәттері бізге үлгі болмасын, одан да сол тыныштыққа кіруге тырысайық.

¹² Себебі Құдайдың сөзі тірі де әсерлі, ол екіжүзді қылыштан да өткір, ол біздің болмысымызға терең еніп, жан мен рухқа дейін енеді, буын мен сүйектің кемігіне дейін жетіп, ой-сана мен жүректегі ойларды ажыратады.

¹³ Сондықтан жаратылыстың ештеңесі де Оның көз алдында жасырынып қала алмайды, себебі Ол бәрін жалаңаштап аршып, ішіне дейін ашып, ақтарып бере алады, ал біз Оның алдында есеп береміз.

¹⁴ Сонымен, көкке ұлылықпен көтеріліп кеткен біздің Бас қызметкерміз бар, Ол-Құдайдың Ұлы Иса, сенімізді Оған артайық.

¹⁵ Өйткені Ол бізге жаны ашымайтын немесе әлсіздігімізді түсінбейтін Бас қызметкер емес, керісінше, Ол-бізге жанашыр, әлсіздігімізді түсінетін Бас қызметкер, Ол барлық жағынан бізге ұқсас болғанмен, басына сынақ түскен кезде, Ол ешқандай күнә жасаған жоқ.

¹⁶ Міне, сондықтан да біз Ол отырған таққа, рақымдылықтың тағына, сеніммен жақындайық, сол кезде біз мейірім мен рақымды және өзімізге қажетті көмекті дер кезінде алатын боламыз.